តារាប្រុសតៃវ៉ាន់រកបាន ៧៥០០០ដុល្លារ ក្នុងមួយនាទីដោយការឡាយហាត់ប្រាណ

2022-05-05 02:45:00
ចំនួនមតិ 0 | ចំនួនចែករំលែក 0

តារាសម្ដែងប្រុសល្បីឈ្មោះតៃវ៉ាន់ Liu Jing Huang ត្រូវបានគេចាប់អារម្មណ៍ខ្លាំងក្រោយឡាយហាត់ប្រាណ។ ពេលនេះ ប្រេនជាច្រើនចង់ទាក់ទងធ្វើការជាមួយលោក។

កាលពីថ្ងៃទី ៣ ខែឧសភាកន្លងទៅនេះ បណ្ដាញព័ត៌មាន China Times បានរាយការណ៍ថា ប្ដីប្រពន្ធតារាសម្ដែងប្រុសជួរមុខតៃវ៉ាន់ Liu Jing Huang កំពុងក្លាយជាបុគ្គលដែលគេនិយមចូលចិត្តលើបណ្ដាញសង្គម។ អ្នកទាំងពីរចាប់ផ្ដើមល្បីឈ្មោះខ្លាំង ក្រោយពេលឡាយហាត់ប្រាណ និងចាក់បទ Herbalist’s Manual របស់ Jay Chou។

ប្រភពដដែលបានឲ្យដឹងថា ក្រោយពេលឡាយតែ២សប្ដាហ៍ ប្រុសស្អាតអាយុ ៥០ឆ្នាំ ជាប់ក្នុងចំណោម អ្នកឡាយមានអ្នកមើលច្រើនជាងគេនៅប្រទេសចិន ដោយមានអ្នកមើលម្ដងប្រមាណ ១០លាននាក់។

នៅក្នុងការឡាយម្ដងៗ លោកទទួលបានកាដូ គិតជាទឹកប្រាក់ប្រមាណ ៤៥០០០ដុល្លារ។ សម្រាប់ប្រេននានាដែលចង់ឲ្យលោកផ្សាយគឺគិត ១នាទី ៧៥០០០ដុល្លារ។ និយាយពីតម្លៃខ្លួន តារាកើតឆ្នាំ ១៩៧២ បានឲ្យដឹងថា លោកទទួលតែផលិតផលស័ក្ដិសមប៉ុណ្ណោះ មិនទទួលផ្សាយគ្រប់របស់ឡើយ ព្រោះអាចធ្វើឲ្យប៉ះពាល់ដល់ទស្សនិកជនរបស់ខ្លួន៕