ប៉ុស្តិ៍លេខ៣ថៃទិញសិទ្ធិរឿង The World of the Married ថតឡើងវិញ

2022-04-25 03:42:00
ចំនួនមតិ 0 | ចំនួនចែករំលែក 0

ខ្សែភាពយន្តភាគល្បីឈ្មោះកូរ៉េ The World of the Married ត្រូវបានផលិតករថៃទិញសិទ្ធិ ដោយមានការចូលរួមសុទ្ធតែជាសិល្បករជួរមុខ។

កាលពីថ្ងៃទី ២០ ខែមេសាកន្លងទៅនេះ បណ្ដាញព័ត៌មាន Thairath បានរាយការណ៍ថា ប៉ុស្តិ៍ទូរទស្សន៍លេខ ៣របស់ថៃ បានទិញសិទ្ធិផលិតរឿង The World of the Married ពីអង់គ្លេសបានសម្រេចហើយ ដោយរឿងប្រមូលផ្ដុំទៅដោយកំពូលតារាសម្ដែងដូចជា Ann Thongprasom, Ananda Everedham និង Patricia Good។

ដោយសារតែនេះគឺជាគម្រោងធំ ដូចនេះប៉ុស្តិ៍លេខ ៣ បានសហការជាមួយផលិតកម្ម BBC One ដើម្បីថតស្នាដៃនេះ។ នាយកផ្នែកលក់របស់ប៉ុស្តិ៍លេខ៣បានសម្ដែងការត្រេកអរក្រោយប៉ុស្តិ៍នេះទិញបានសម្រេចត្បិតសាច់រឿង បែបមនុស្សប្រុសសាវ៉ា ក្បត់ប្រពន្ធមានស្រីបែបនេះ គឺមានប្រជាប្រិយភាពនៅប្រទេសថៃជាខ្លាំង។

មុននោះដែរ The World of the Married គឺជាខ្សែភាពយន្តកូរ៉េដែលមានចំនួនអ្នកមើលខ្ពស់បំផុតរបស់ប៉ុស្តិ៍ខ្សែកាបទាំងអស់។ ថៃគឺជាប្រទេសទី៧ដែលមានសិទ្ធិផលិតរឿងនេះ ក្រោយប្រទេសដូចជា បារាំង រុស្សី ឥណ្ឌា កូរ៉េ ទួគី និងហ្វីលីពីន៕