ការគោរពឲ្យតម្លៃខ្លួនឯងគឺសំដៅទៅលើការយល់ដឹងអំពីគុណតម្លៃរបស់ខ្លួន និងការគិតអំពីសារសំខាន់នានាចំពោះខ្លួនឯង ដែលអាចរួមបញ្ចូលទាំងអារម្មណ៍នៃភាពជឿជាក់លើខ្លួនឯង អារម្មណ៍នៃការទទួលស្គាល់អំពីសមត្ថភាព និងអារម្មណ៍នៃការស្រឡាញ់ទៅលើអ្វីដែលខ្លួនមានបាន ហើយនឹងការផ្ដល់ក្ដីស្រឡាញ់ទៅកាន់អ្នកដទៃវិញផងដែរ។

ការមានភាពជឿជាក់ថាអ្នកសមនឹងទទួលបានក្តីស្រឡាញ់ និងការគោរពឲ្យតម្លៃទៅលើគំនិត ឬចំណាប់អារម្មណ៍របស់អ្នកទៅលើអ្វីមួយនោះ វាដើរតួយ៉ាងសំខាន់ណាស់ក្នុងការអនុញ្ញាតឲ្យអ្នកដទៃមានការគោរពឲ្យតម្លៃចំពោះអ្នក។ ហេតុដូច្នេះហើយបានជាការមិនគោរពឲ្យតម្លៃខ្លួនឯង ឬការគោរពឲ្យតម្លៃខ្លួនឯងទាបអាចចោទជាបញ្ហាធ្ងន់ធ្ងរនៅក្នុងជីវិតរស់នៅប្រចាំថ្ងៃរបស់អ្នក។

ទាំងនេះគឺជាសញ្ញានៃការគោរពឲ្យតម្លៃខ្លួនឯងទាប ឬមិនគោរពឲ្យតម្លៃខ្លួនឯង៖

• អ្នកមានទំនុកចិត្តខ្សោយនឹងទាបបំផុតក្នុងការសម្រេច ឬធ្វើរឿងអ្វីមួយ
• កង្វះនៃការគ្រប់គ្រងអារម្មណ៍របស់ខ្លួន និងធ្វើអ្វីមួយមិនគិតឲ្យបានដិតដល់
• អ្នកមានបញ្ហាក្នុងការស្នើសុំជំនួយ ឬសុំអ្វីមួយដែលអ្នកត្រូវការពីអ្នកដទៃ
• មានបញ្ហាក្នុងការទទួលយកមតិពីអ្នកដទៃ និងតែងតែមានទស្សនវិស័យមិនល្អជានិច្ច
• ការគិតនឹងការនិយាយរបស់អ្នកតែងតែមានភាពអវិជ្ជមាននៅមុខជានិច្ច
• អ្នកមានការការព្រួយបារម្ភ និងសង្ស័យទៅលើខ្លួនឯង ហើយភ័យខ្លាចចំពោះភាពបរាជ័យ
• ហើយអ្នកតែងតែខិតខំព្យាយាមធ្វើការផ្គាប់ចិត្តអ្នកដទៃ ជាជាងការធ្វើដើម្បីខ្លួនឯង

ការស្រាវជ្រាវក៏បានបង្ហាញដែលថាការមិនគោរពឲ្យតម្លៃខ្លួនឯង ឬការគោរពឲ្យតម្លៃខ្លួនឯងទាបអាចនឹងបណ្ដាលឲ្យមានបញ្ហាសុខភាពផ្លូវចិត្តជាច្រើនដូចជា ការថប់បារម្ភ ការមានអារម្មណ៍តានតឹង ការមានអាកប្បកិរិយាភ័យស្លន់ស្លោ និងជំងឺស្ត្រេសជាដើម។ ដូច្នេះមិនថាអ្នកនៅក្នុងកលៈទេសៈណាក៏ដោយ ត្រូវចេះស្រឡាញ់នឹងគោរពឲ្យតម្លៃខ្លួនឯងជានិច្ច៕

ចុចអានបន្ត៖ បើអ្នកធ្វើរឿងទាំង ៩ នេះជាប្រចាំ បញ្ជាក់ថាអ្នកសប្បាយចិត្ត និងមិនខ្វល់ពីរឿងអត់ប្រយោជន៍