អាយុទើប៤០ឆ្នាំ កំពូលតារាចម្រៀងហុងកុងបានសរសេរបណ្ដាំមរតកបាត់ទៅហើយ

2022-01-24 04:38:00
ចំនួនមតិ 0 | ចំនួនចែករំលែក 0

ដោយសារតែខ្លាច ខ្លួនឯងជួបគ្រោះថ្នាក់អ្វីមួយ តារាចម្រៀង និងសម្ដែងស្រីលំដាប់ A ហុងកុង Charlene Choi បានធ្វើបណ្ដាំមរតករួចហើយ។

កាលពីថ្ងៃទី ២៣ ខែមករាកន្លងទៅនេះ បណ្ដាញព័ត៌មាន HK01 បានរាយការណ៍ថា តារាចម្រៀង និងសម្ដែងស្រីជួរមុខហុងកុង Charlene Choi នៅពេលចូលរួមក្នុងកម្មវិធី Because I’m a Friend បានប្រាប់ថាខ្លួនបានធ្វើបណ្ដាំមរតករួចហើយ ព្រមទាំងបានរើសរូបតាំងពេលស្លាប់រួចហើយដូចគ្នា។

“ខ្ញុំធ្វើបណ្ដាំមរតក បែងចែកទ្រព្យសម្បត្តិរបស់ខ្លួនឯងរួចហើយ។ សម្រាប់រូបទុកតាំងពេលស្លាប់ គឺខ្ញុំផ្លាស់រៀងរាល់៥ឆ្នាំម្ដង។ ក្រៅពីនោះ ខ្ញុំក៏ថតជាវីដេអូ និយាយជជែកគ្នាជាមួយប៉ាម៉ាក់ និងសង្សារ ដើម្បីទុកឲ្យពួកគេ កុំឲ្យពួកគាត់ពិបាកចិត្ត ក្នុងករណីខ្ញុំត្រូវចាកចេញមុនពួកគេ” ស្រីស្អាតវ័យ៤០ឆ្នាំឲ្យដឹង។

ចែករំលែកពី មូលហេតុធ្វើបណ្ដាំមរតកទាំងវ័យក្មេង តារាស្រីកើតឆ្នាំ ១៩៨២ បានប្រាប់ថា នាងធំដឹងក្ដីក្នុងគ្រួសារដែលតែងបង្រៀនឲ្យមានផែនការសម្រាប់ខ្លួនឯង ដូចនេះគ្មានអ្វីប្រសើរជាងធ្វើបណ្ដាំមរតកឲ្យហើយនោះទេ។

បណ្ដាញព័ត៌មាន On បានឲ្យដឹងថា Charlene Choi គឺជារាជិនីអចលនទ្រព្យនៅហុងកុង ដោយនាងមានអគារតម្លៃ១២លានដុល្លារ ជាច្រើនខ្នងនៅទីក្រុងនេះ។ នៅក្នុងកម្មវិធីខាងលើ ស្រីស្អាតរូបនេះបានបង្ហាញឪពុកម្ដាយគឺជាអ្នកគ្រប់គ្រងទ្រព្យសម្បត្តិរបស់នាង។

បច្ចុប្បន្ន Charlene មានមិត្តប្រុសឈ្មោះ Anthony Shek ដែលជាមហាសេដ្ឋីកាស៊ីណូ និងអចលនទ្រព្យដែលមានទ្រព្យសម្បត្តិឡើងដល់ពាន់លានដុល្លារ។ ទោះស្រលាញ់គ្នា៣ឆ្នាំហើយក៏ដោយ តែអ្នកទាំង២មិនទាន់មានគម្រោងរៀបការនោះទេ៕

អត្ថបទ៖ Caramel