ថាមិនទៅជួបជុំគ្រួសារ មានណាកំពូល Idol ដែលខ្លួនស្រលាញ់គឺបងប្រុសជីដូនមួយសោះ

2022-01-18 02:35:00
ចំនួនមតិ 0 | ចំនួនចែករំលែក 0

នារីម្នាក់មិននឹកស្មានថា តារាចម្រៀងដែលខ្លួនស្រលាញ់ពេញបេះដូង Baekhyun មកពីក្រុមចម្រៀង EXO តាមការពិតគឺជាបងប្រុសជីដូនមួយខ្លួនសោះ។

កាលពីថ្ងៃទី ១៥ ខែមករាកន្លងទៅនេះ បណ្ដាញព័ត៌មាន Sports Chosun បានរាយការណ៍ថា នារីម្នាក់មកពីខេត្ត Gyeonggi បានធ្វើឲ្យគេចាប់អារម្មណ៍ជាខ្លាំង ក្រោយពេលនាងចែករំលែកពីសាច់រឿងនាងទៅជួបជុំមហាគ្រួសារនៅស្រុកកំណើត។

តាមនោះដែរ នារីវ័យក្មេងខាងលើ គឺជាអ្នកគាំទ្ររបស់ក្រុមចម្រៀងល្បីឈ្មោះកូរ៉េ EXO ហើយសមាជិកដែលនាងស្រលាញ់ជាងគេនោះគឺ Baekhyun។ កាលពីពេលថ្មីៗនេះ មហាគ្រួសាររបស់នាង បានសំណូមពរឲ្យសមាជិកទាំងអស់ជួបជុំគ្នា ត្បិតកំឡុងពេលជំងឺកូវីដ១៩រាតត្បាត ពួកគេមិដែលជួបជុំគ្នាទាំងអស់ឡើយ។

ដើមឡើយ នារីខាងលើមិនមានបំណងចូលរួមក្នុងការជួបជុំនេះឡើយ តែក្រោយមកក៏ប្ដូរចិត្តថាទៅវិញ។ នៅពេលទៅដល់ស្រុកកំណើតនាង ភ្ញាក់ព្រើតនៅពេលឃើញម្ចាស់បទ Love Shot កំពុងជជែកគ្នានៅក្នុងផ្ទះតាយាយរបស់ខ្លួន ហើយក៏បានសួរម្ដាយថាតើ តារាប្រុសនេះមកផ្ទះខ្លួនធ្វើអ្វី ដោយម្ដាយនាងឆ្លើយថា ប្រុសស្អាតអាយុ ២៩ឆ្នាំគឺជាបងប្រុសជីដូនមួយសាច់ឆ្ងាយរបស់នាង។

នារីខាងលើបានប្រាប់ទៅម្ដាយខ្លួនថា ចាប់ពីពេលនេះតទៅ នាងនឹងលែងខកខានក្នុងការទៅជួបជុំមហាគ្រួសារទៀតហើយ៕