នៅក្នុងសង្គមរស់នៅ អ្នកនឹងជួបមនុស្សគ្រប់ប្រភេទជារៀងរាល់ថ្ងៃ គ្រប់ទីកន្លែង គ្រប់ពេលវេលា ទាំងមនុស្សល្អៗដែលយកចិត្តទុកដាក់ និងមនុស្សដែលឆ្លៀតឱកាសកេងចំណេញពីអ្នក។ ប៉ុន្តែត្រូវចាំថានៅលើពិភពលោកមួយនេះក៏មានមនុស្សល្អៗជាច្រើនផងដែរ ដូចច្នេះអ្នកមិនគួរធ្វើការវាយតម្លៃមនុស្សម្នាក់ដោយផ្អែកតែទៅលើការគិតរបស់ខ្លួន ការមើលតែសម្បកក្រៅ ឬក៏ការទើបតែជួបគេជាលើកដំបូងនោះឡើយ។

អ្វីដែលអ្នកអាចធ្វើទៅបាននោះគឺការផ្ដល់សន្តានចិត្តល្អរបស់អ្នកចំពោះអ្នកដ៏ទៃ ការយកចិត្តទុកដាក់មានសុជីវធម៌ ការជួយយកអាសាអ្នកដទៃដែលកំពុងត្រូវការជំនួយ វាគឺជារឿងដែលមនុស្សម្នាក់ៗគួរធ្វើទៅកាន់គ្នាទៅវិញទៅមក និងឲ្យបានញឹកញាប់នៅក្នុងជីវិតរស់នៅក្នុងសង្គមរបស់ពួកគេ។

ហើយរឿងទាំងនេះដែលអ្នកគួរតែធ្វើវាឡើងជាប្រចាំ និងឲ្យបានញឹកញាប់ដើម្បីភាពល្អប្រសើរនៅក្នុងសង្គមដែលអ្នកកំពុងតែរស់នៅ៖

• ការបង្ហាញសុជីវធម៌ ការគោរពឲ្យតម្លៃអ្នកដទៃ និងចេះគោរពភាពឯកជនរបស់ពួកគេ
• អ្នកត្រូវតែផ្ដល់ភាពស្មោះត្រង់ ការកោតសរសើរ និងផ្ដល់ភាពទុកចិត្តសម្រាប់អ្នកដទៃ
• ការជួយយកអាសាអ្នកដទៃនៅពេលណាដែលពួកគេត្រូវការជំនួយ
• ការចូលរួមធ្វើសកម្មភាពសប្បុរសជននានា ការស្ម័គ្រចិត្តជួយនៅក្នុងសង្គមរស់នៅ
• និងមានការការអត់ធ្មត់ខ្ពស់ មិនរករឿងអ្នកដទៃ ហើយតែងតែផ្ដល់ភាពញញឹមដាក់អ្នកដ៏ទៃជានិច្ច

ប្រសិនបើមនុស្សគ្រប់គ្នាបានចំណាយពេលដើម្បីអនុវត្តរឿងទាំងប៉ុន្មានខាងលើនេះ ពួកគេនឹងធ្វើឲ្យសង្គមរស់នៅក្លាយជាកន្លែងដ៏ល្អប្រសើរជាងមុន ហើយវានឹងធ្វើឲ្យអ្នកសប្បាយចិត្តនូវទង្វើល្អទាំងនោះផងដែរ។ ពេលអ្នកយកចិត្តទុកដាក់ និងមានទឹកចិត្តល្អចំពោះអ្នកណាដែលអ្នកបានជួប បានជួយនោះ វាធ្វើឲ្យអ្នកមានអារម្មណ៍ថា អ្នកគឺជាមនុស្សគួរឲ្យគោរពសរសើរម្នាក់នៅក្នុងសង្គមរស់នៅ៕

ចុចអានបន្ត៖ ៦ វិធីអាចជួយពង្រឹងការផ្តោតអារម្មណ៍របស់អ្នកកុំឲ្យមានកំហុសច្រើន