ទម្លាប់នៃការគិតអាក្រក់ ៣ យ៉ាងដែលនឹងធ្វើឲ្យឆាកជីវិតរស់នៅរបស់អ្នកមានការលំបាក

2021-12-06 02:00:00
ចំនួនមតិ 0 | ចំនួនចែករំលែក 0

ក្នុងឆាកជីវិតរស់នៅគ្មាននរណាម្នាក់ដែលចង់ឲ្យជីវិតរស់នៅរបស់ពួកគេមានភាពស្មុគស្មាញនោះទេ បើមានមែនក៏មានតិចខ្លាំងណាស់។ ឧបសគ្គដ៏ធំបំផុតនៅក្នុងជីវិតរបស់អ្នកជួនកាលគឺជាទម្លាប់ផ្លូវចិត្ត ឬហៅថាទម្លាប់នៃការគិត ជាទូទៅគឺទៅលើភាពអវិជ្ជមាន និងរឿងអាក្រក់ៗជាដើម។

អំណាចនៃការគិតគឺមានឥទ្ធិពលខ្លាំងណាស់ចំពោះបុគ្គលម្នាក់ៗ អ្វីគ្រប់យ៉ាងដែលអ្នកធ្វើ អ្វីដែលអ្នកនិយាយ អារម្មណ៍របស់អ្នក និងការជឿទៅលើអ្វីមួយ ប្រសិនបើអ្នកប្រើការគិតនោះទៅលើផ្លូវវិជ្ជមាន វានឹងល្អសម្រាប់ជីវិតរស់នៅ ប៉ុន្តែប្រសិនបើអ្នកប្រើការគិតទាំងនោះទៅលើរឿងអវិជ្ជមានវិញ អ្នកនឹងអាចជួបតែរឿងអាក្រក់ៗនៅក្នុងឆាកជីវិតរស់នៅរបស់អ្នក។ នេះមានន័យថាទម្លាប់ផ្លូវចិត្ត (ការគិត) អាក្រក់ៗដែលអ្នកបានអនុវត្តអាចប៉ះពាល់ខ្លាំងជាងទម្លាប់ដែលអ្នកធ្វើសកម្មភាពទៅទៀត។

ដូច្នេះរឿងដែលអាចកើតឡើងនៅក្នុងខួរក្បាលរបស់អ្នកអាចជាប្រភពចម្បងនៃការតស៊ូរបស់អ្នកជាច្រើនក្នុងជីវិត។ ខាងក្រោមនេះគឺជាទម្លាប់អាក្រក់ផ្លូវចិត្តចំនួន ៣ យ៉ាងដែលធ្វើឲ្យជីវិតរស់នៅរបស់អ្នកមានការលំបាកខ្លាំងបំផុត៖

១. ការគិតទៅលើភាពឥតខ្ចោះ (មួយនៃទម្លាប់អាក្រក់បំផុតខាងផ្លូវចិត្ត) ចាំថាសូម្បីតែមនុស្សដែលមានភាពជោគជ័យក៏ពួកគេធ្វើខុសដែរ។ ការចង់បានភាពល្អឥតខ្ចោះនឹងនាំឲ្យមានទម្លាប់អាក្រក់ខាងផ្លូវចិត្ត និងប៉ះពាល់ដល់ការគិតរបស់អ្នកដូចខាងក្រោម៖

ការរំពឹងទុកខ្ពស់ពេកពីអ្នកដទៃ ដែលបង្កឲ្យមានការអាក់អន់ចិត្ត
ការព្រួយបារម្ភខ្លាំងពេកលើការវិនិច្ឆ័យរបស់អ្នកដទៃ និងរបៀបដែលគេមានទស្សនៈចំពោះអ្នក
ការថប់បារម្ភមានកម្រិតខ្ពស់ ទទួលរងជំងឺធ្លាក់ទឹកចិត្ត និងរោគសញ្ញាផ្លូវចិត្តមួយចំនួនទៀត
អសមត្ថភាពក្នុងការកែលម្អ ឬរៀនសូត្រពីកំហុសរបស់ខ្លួនពីអតីតកាល
ការថយចុះនៃការឲ្យតម្លៃលើខ្លួនឯងដោយសារតែការរំពឹងទុកដែលមិនបានសម្រេចដូចបំណង

២. ការផ្គាប់ចិត្តអ្នកដទៃ ការចង់ធ្វើឲ្យអ្នកដទៃសប្បាយចិត្តគឺជារឿងដ៏ល្អប្រសើរ ប៉ុន្តែការព្យាយាមផ្គាប់ចិត្តមនុស្សជុំវិញខ្លួនគឺជាទម្លាប់អាក្រក់ និងគ្រោះថ្នាក់បំផុតមួយសម្រាប់អារម្មណ៍ផ្លូវចិត្តរបស់អ្នកដែលរួមមានដូចជា៖

អ្នកនឹងធ្វើអ្វីគ្រប់យ៉ាងដែលអាចធ្វើទៅបានដើម្បីធ្វើឲ្យមនុស្សគ្រប់គ្នាចូលចិត្តអ្នក
មានទំនាក់ទំនងមិនល្អជាច្រើន និងការទាក់ទងជាមួយបុគ្គលដែលមិនល្អ
មានការព្រួយបារម្ភជានិច្ចអំពីអ្វីដែលមនុស្សនឹងគិតមកលើអ្នក
អារម្មណ៍ធ្លាក់ចុះជានិច្ចដោយសារតម្រូវការតាមផ្គាប់ចិត្តមនុស្សជុំវិញខ្លួន

៣. ការភ័យខ្លាចចំពោះការបរាជ័យ វាក៏មានផលប៉ះពាល់ដូចគ្នាទៅនឹងគ្រោះមហន្តរាយផងដែរ ពីព្រោះនៅពេលដែលអ្នកខ្លាចបរាជ័យ អ្វីដែលបានកើតឡើងគឺអ្នកនឹងមិនអាចប្រឈមមុខដោះស្រាយ ឬកែលម្អឲ្យបានរីកចម្រើនឡើយ ហើយវានឹងប៉ះពាល់ទៅដល់ការគិតរបស់អ្នក៖

បដិសេធមិនទទួលយកការបរាជ័យ ឬហានិភ័យបើទោះបីជាអ្នកជាមនុស្សពូកែខ្លាំងក៏ដោយ
មិនរៀនអំពីកំហុស និងភាពបរាជ័យពីអតីតកាល ដើម្បីបង្កើនឱកាសជោគជ័យនាពេលអនាគតឡើយ
ការបោះបង់ចោល ឬបញ្ឈប់មុនពេលដែលអ្នកអាចដឹង ឬមើលឃើញអំពីលទ្ធផលណាមួយ

គ្មានវិធីណាដែលធ្វើឲ្យមនុស្សលោកល្អឥតខ្ចោះនោះទេ ហើយភាពល្អឥតខ្ចោះពេលខ្លះធ្វើឲ្យមនុស្សជឿថាវាអាចជាលក្ខណៈវិជ្ជមាន ប៉ុន្តែវាក៏អាចបំផ្លិចបំផ្លាញអ្នកបានដែរ ពីព្រោះដោយសារតែការចង់បានភាពល្អឥតខ្ចោះនោះដែលអ្នកមិនអាចសម្រេចឬទទួលវាបាន។ ភាពល្អឥតខ្ចោះក៏មានផលប៉ះពាល់ដល់សុខភាពផងដែរ ទម្លាប់អាក្រក់នៃផ្លូវចិត្ត (ការគិត) នេះអាចបំផ្លាញសុខុមាលភាពរាងកាយដោយធ្វើឲ្យអ្នកងាយនឹងទទួលរងជំងឺសម្ពាធឈាមខ្ពស់ ជំងឺទឹកនោមផ្អែម ជំងឺសរសៃឈាមបេះដូង និងអាចឈានទៅដល់ការធ្វើអត្តឃាតទៀតផង។

ទម្លាប់ផ្លូវចិត្តអវិជ្ជមានដែលមាននៅក្នុងគំនិតរបស់អ្នកអាចគ្រប់គ្រងជីវិតអ្នក និងធ្វើឲ្យអ្នកកាន់តែមានភាពលំបាកក្នុងជីវិតរស់នៅ។ ដូច្នេះការយល់ដឹងអំពីទម្លាប់អាក្រក់ទាំងនោះមុនអាចជាជំហានដំបូងក្នុងការការពារ និងដោះស្រាយដោយភាពវិជ្ជមាន៕

ប្រភពរូបភាព៖ Pexels

ចុចអានបន្ត៖

អត្ថបទ៖ Chrel Den