តាមការពិតសេចក្ដីស្រឡាញ់មានការប្រែប្រួលខ្លាំងណាស់គឺវាអាស្រ័យទៅលើបុគ្គលនោះ ឬដៃគូសង្សារប្ដីប្រពន្ធ និងនៅក្នុងដំណាក់កាលនៃទំនាក់ទំនងស្នេហាដែលពួកគេកំពុងតែស្ថិតនៅជាមួយគ្នា។ វាអាចនឹងមានការរីកលូតលាស់កាន់តែខ្លាំង ឬក៏មានការថយចុះខ្លាំងទៅតាមការយកចិត្តទុកដាក់ចំពោះដៃគូសង្សារនោះ។

វាអាចជារឿងងាយស្រួលក្នុងការដាក់ចិត្តលង់ស្រឡាញ់ទៅនឹងអ្វីដែលអ្នកបានមើលឃើញនៅក្នុងប្រព័ន្ធបណ្ដាញសង្គមដែលវាបង្ហាញអំពីស្នេហាដ៏ស្មោះស្ម័គ្រ។ ទោះជាយ៉ាងណាក៏ដោយនៅក្នុងជីវិតពិតអត្ថន័យ ឬការយល់ដឹងអំពី “ការស្រឡាញ់ខ្លាំង” គឺមិនដូចគ្នានោះឡើយ។ មនុស្សភាគច្រើននឹងធ្វើការសួរសំណួរខ្លួនឯងថា “តើដៃគូរបស់ខ្ញុំពិតជាស្រឡាញ់ខ្ញុំខ្លាំងមែនឬអត់?”។ គូស្វាមីភរិយាដែលមានស្នេហាពិតមិនត្រឹមតែមានអារម្មណ៍នោះទេ វាអាចមើលឃើញដោយភ្នែកទទេថែមទៀតផង។

ប្រសិនបើដៃគូសង្សាររបស់អ្នកធ្វើរឿងទាំង ៥ យ៉ាងនេះជាមួយអ្នកជាប្រចាំនោះវាអាចបង្ហាញបានថាដៃគូរបស់អ្នកស្រឡាញ់អ្នកខ្លាំងណាស់ និងខ្លាំងជាងខ្លួនគាត់ទៅទៀត៖

១. គាត់តែងតែផ្ញើសារជាសំឡេងទុកឲ្យអ្នក កុំគិតថាការផ្ញើសារជាសំឡេងគឺជាជម្រើសងាយស្រួលនឹងឆាប់រហ័សនោះ ការពិតនៅក្នុងទំនាក់ទំនងស្នេហាវាបង្ហាញអំពីការយកចិត្តទុកដាក់ខ្លាំង ជាពិសេសវាធ្វើឲ្យអ្នកមានអារម្មណ៍ល្អប្រសើរនៅពេលបានលឺសំឡេងមនុស្សជាទីស្រឡាញ់។ អ្នកត្រូវចាំថាគាត់បានចំណាយពេលវេលា និងខិតខំប្រឹងប្រែងដើម្បីកត់ត្រាវាពីព្រោះគាត់ស្រឡាញ់អ្នក។

២. គាត់ទុកទូរស័ព្ទចោលដោយមិនខ្លាចដៃគូសង្សាររបស់គាត់យកមកឆែកមើលឡើយ អ្នកខ្លះការពារណាស់ពេលនិយាយអំពីរឿងទូរសព្ទដៃនៅពេលមានដៃគូ ជាធម្មតាវាមានន័យថាបុគ្គលនោះមានអ្វីដែលត្រូវលាក់បាំងហើយ នេះមិនមែនជាមូលដ្ឋានគ្រឹះដ៏ល្អសម្រាប់ទំនាក់ទំនងដែលបង្កើតឡើងដោយការជឿជាក់ឡើយ។ ប៉ុន្តែប្រសិនបើដៃគូមិនបារម្ភអំពីរឿងនេះពេលនៅជុំវិញអ្នកវាបង្ហាញថាជាសញ្ញានៃការជឿទុកចិត្ត និងភាពស្មោះត្រង់។

៣. គាត់មានការតស៊ូជាមួយអ្នកគ្រប់គ្រាលំបាកទាំងអស់ នៅពេលដែលមានការលំបាក ឬមានបញ្ហាដែលត្រូវដោះស្រាយ បុគ្គលដែលពិតជាយកចិត្តទុកដាក់ចំពោះទំនាក់ទំនងនឹងស្រឡាញ់អ្នកខ្លាំងពិតប្រាកដនោះតែងតែជ្រើសរើសភាពស្មោះត្រង់សាមគ្គីភាពដើម្បីដោះស្រាយជាជាងការរត់ចោលអ្នក។

៤. គាត់មានមោទនភាពដែលបាននៅជាមួយអ្នក ការមើលឃើញថាដៃគូរបស់អ្នកមានមោទនភាពដែលបាននៅជាមួយអ្នកវាគឺជាសញ្ញាដែលពួកគាត់មិនមានភាពខ្មាស់អៀនចំពោះស្នេហារបស់អ្នកពីរទៅកាន់អ្នកដទៃនៅក្នុងសង្គម បងប្អូន ឬសាច់ញាតិឡើយ។

៥. គាត់មិនចាកចេញពីអ្នកឡើយនៅពេលដែលអ្នកត្រូវការគាត់បំផុត ជីវិតស្នេហាមិនមែនគ្រាន់តែជាភាពសប្បាយរីករាយតែមួយមុខនោះទេ វាក៏មានលាយឡំជាមួយនឹងទុក្ខសោក រឿងអាក្រក់នានាដែលអាចកើតឡើងបានផងដែរ។ បើគាត់មើលថែទាំអ្នកគ្រប់ពេលវេលា និងមិនបោះបង់អ្នកចោលវាជាសញ្ញាបញ្ជាក់ថាគាត់ស្រឡាញ់អ្នកខ្លាំងណាស់។

ដូច្នេះប្រសិនបើអ្នកតែងតែស្រមៃចង់បានបុរសល្អម្នាក់ បុរសដែលគោរពឲ្យតម្លៃ និងស្រឡាញ់អ្នកយកចិត្តទុកដាក់អ្នកខ្លាំងមកធ្វើជាដៃគូសង្សារសម្រាប់ជីវិតរស់នៅរបស់អ្នកនោះ អ្នកត្រូវសម្លឹងមើលទៅលើគុណសម្បត្តិទាំងប្រាំខាងលើនេះ។ ហើយប្រសិនជាបុរសនោះមានគុណសម្បត្តិទាំងនេះមែន អ្នកដឹងថាអ្នកបានរកឃើញមនុស្សពិសេសម្នាក់ហើយសម្រាប់ជីវិតដៃគូទៅថ្ងៃអនាគត់ដែលប្រកបដោយសុភមង្គល៕

ប្រភពរូបភាព៖ Pinterest

ចុចអានបន្ត៖

• គន្លឹះងាយៗទាំង ៦ យ៉ាងនេះនឹងធ្វើឲ្យអ្នកទទួលបានសុភមង្គលដ៏អស្ចារ្យ
• វីធី ៥ យ៉ាងនេះអាចជួយអ្នកក្នុងការបំភ្លេចរឿងកើតទុក្ខដោយសារវិបត្តិស្នេហាបាន