រូបមន្តធម្មជាតិ ៥យ៉ាងជួយស្បែកមុខសដូចបណ្តូលចេក ងាយសម្រាប់នារីអនុវត្តបាននៅផ្ទះ

2021-10-12 03:42:00
ចំនួនមតិ 0 | ចំនួនចែករំលែក 0

មុខសស្អាតដោយប្រើរូបមន្តធម្មជាតិ ត្រូវបានគេជឿជាក់យ៉ាងខ្លាំង ដោយសារវាទទួលបានលទ្ធផលលឿន និងផលប៉ះពាល់តិចតួច។ ខាងក្រោមនេះ ជារូបមន្ត នៅពេលអ្កចង់បានស្បែកមុខសភ្លឺថ្លាដូចប្រាថ្នា។

១. ស្រ្កាប់មុខទៀងទាត់

ស្បែកមុខមិនស្រស់ថ្លា ដោយសារតែធាតុកខ្វក់ពីមជ្ឈដ្ឋានខាងក្រៅប៉ះលើផ្ទៃមុខ និងលាងជម្រះមិនស្អាត។ ដូច្នេះ អ្នកគួរស្រ្កាប់មុខ 2-3 ដងក្នុងមួយសប្តាហ៍ ដើម្បីឲ្យស្បែកសថ្លា និងទន់រលោងជាងមុន។

២. ម៉ាស្សាមុខដោយប្រើយ៉ាអួរ (គ្មានជាតិស្ករ)

គុណប្រយោជន៍ពីយ៉ាអួរនឹងជួយលុបបំបាត់ស្នាមអុជខ្មៅពីផ្ទៃមុខ ជួយស្បែកទន់ស្រស់ថ្លា។ ក្រោយពីលាងមុខស្អាតជាមួយហ្វូមហើយ អ្នកត្រូវលាងជម្រះជាមួយទឹកក្តៅម្តងទៀត បន្ទាប់មកយកយ៉ាអួរលាបលើមុខ ទុកប្រមាណ ១០-១៥mn រួចលាងមុខចេញ។ អ្នកគួរធ្វើនៅពេលល្ងាច និង 2-3 ដងក្នុងមួយសប្តាហ៍ ដើម្បីឃើញប្រសិទ្ធិភាព។

៣. លាងមុខជាមួយទឹកអង្ករ

ទឹកអង្ករផ្ទុកដោយវីតាមីន B5 ដែលមានប្រសិទ្ធិភាពយ៉ាងពិតប្រាកដលើស្បែកឲ្យស។ វិធីធ្វើ ត្រងយកទឹកអង្ករនៅពេលលាងលើកទី២ ទុកក្នុងកូនចានមួយដាក់ទូទឹកកកប្រមាណ៤-៥ ម៉ោង។ ដួសទឹកផ្នែកខាងលើចេញ បន្ទាប់មកយកទឹកអង្ករនៅសល់មកម៉ាស្សាលើមុខថ្នមៗ ហើយទុក១៥នាទី សឹមលាងទឹកចេញ។ អ្នកគួរអនុវត្តនៅពេលល្ងាច ដើម្បីបានលទ្ធផលខ្ពស់។

៤. ម្សៅសណ្តែកក្រហម

ដោយសារតែសណ្តែកក្រហមផ្ទុកដោយវីតាមីន C, E និងជីវជាតិច្រើនជួយស្បែកភ្លឺថ្លា ព្រមទាំងមុខងារប្រឆាំងអុកស៊ីតកម្មជាច្រើន និងទប់ស្កាត់ភាពជ្រីវជ្រួញផងដែរ។ វិធីធ្វើ អ្នកអាចយកម្សៅសណ្តែកក្រហម២ស្លាបព្រា លាយជាមួយទឹកដោះគោស្រស់៣ស្លាបព្រា។ លាងមុខឲ្យស្អាត ចាប់ផ្តើមយកល្បាយមកលាបលើមុខឲ្យសព្វ។ ទុកប្រមាណ ១៥នាទី ដើម្បីឲ្យជីវជាតិស្រូបចូលស្បែកមុខបានជ្រៅ សឹមលាងមុខចេញជាមួយទឹកធម្មតា។ អ្នកអាចអនុវត្ត 2-3 ដងក្នុងមួយសប្តាហ៍ នោះស្បែកនឹងទន់ រលោង សលឿនដូចចិត្តមិនខាន។

៥. លាបឡេការពារកម្តៅថ្ងៃទៀងទាត់

ឡេការពារកម្តៅថ្ងៃ មានមុខងារសំខាន់ការពារស្បែក រាល់ពេលចេញក្រៅម្តងៗ។ ដូច្នេះ បើ គ្មានឡេការពារកម្តៅថ្ងៃទេ ស្បែកពិបាករក្សាភាពសំណើម និងចាត់ទុកថាគ្មានប្រសិទ្ធិភាព។