ក្នុងរយៈពេល៤៨ម៉ោង ប្រេនទាំងអស់ដែលពាក់ព័ន្ធនឹង Wu Yifan បានផ្ដាច់កុងត្រាអស់ហើយ
- 2021-07-21 03:25:00
- ចំនួនមតិ 0 | ចំនួនចែករំលែក 0
ក្នុងរយៈពេល៤៨ម៉ោង ប្រេនទាំងអស់ដែលពាក់ព័ន្ធនឹង Wu Yifan បានផ្ដាច់កុងត្រាអស់ហើយ
កសាងកេរ្តិ៍ឈ្មោះជិត១០ឆ្នាំ តែក្នុងរយៈពេលតែ៤៨ម៉ោង ប្រេនធំៗដែលចុះកិច្ចសន្យាជាមួយតារាសម្ដែង និងចម្រៀងល្បីឈ្មោះចិន Wu Yifan បានសម្រេចដើរចេញចោលលោកទាំងអស់។
កាលពីថ្ងៃទី ២០ ខែកក្កដាកន្លងទៅនេះ បណ្ដាញព័ត៌មាន Sina បានឲ្យដឹងថា ម៉ាកគ្រឿងសំអាងល្បីឈ្មោះពិភពលោក L’oreal គឺជាយីហោចុងក្រោយបំផុតដែលមានចុះកិច្ចសន្យាជាមួយតារាសម្ដែង និងចម្រៀងប្រុស Wu Yifan សម្រេចចិត្តផ្ដាច់កុងត្រាជាមួយលោក។ ប្រភពដដែលបានឲ្យដឹងថា ប្រេនគ្រឿងសំអាងខាងលើបានបង្ហោះលើបណ្ដាញសង្គមផ្លូវការរបស់ខ្លួនថា ចាប់ពីថ្ងៃជូនដំណឹងនេះតទៅ តួរឿង Never Gone នឹងលែងជាអ្នកតំណាងរបស់ខ្លួនទៀតហើយ សូមទស្សនិកជនទាំងអស់ជ្រាបជាដំណឹង។
ជាមួយនឹងការដែលប្រេន L’oreal ផ្ដាច់កុងត្រានេះ ក៏មានន័យដែរថា លែងមានប្រេនដែលពាក់ព័ន្ធនឹងប្រុសស្អាតខាងលើ បន្តកុងត្រាជាមួយលោកទៀតហើយ ក្រោយផ្ទុះរឿងអាស្រូវដែលត្រូវស្រីស្អាតអាយុ ១៩ឆ្នាំ Du Meizhu ចេញមកបកអាក្រាតថា លោកជាមនុស្សទាក់ទងមនុស្សស្រីច្រើនក្នុងពេលតែ១។
Sina បានឲ្យដឹងថា គិតមកដល់ពេលនេះ កេរ្តិ៍ឈ្មោះកំពូលតារាប្រុសមានអ្នកគាំទ្រ៥០លាននាក់ អាយុ ៣០រូបនេះ គឺហាក់ដូចស្មើសូន្យ ព្រោះភាពល្បីខំសាងជិត១០ឆ្នាំមកនេះ ត្រូវរលាយអស់ក្នុងរយៈពេលតែ៤៨ម៉ោងប៉ុណ្ណោះ គឺប្រេនជាង១០ធំៗ បានផ្ដាច់កុងត្រាទាំងអស់ ព្រោះខ្លាចប៉ះពាល់ដល់ផលិតផលរបស់ខ្លួន៕