ក្រោយរឿងអាស្រូវរបស់ Wu Yifan ក្រុមហ៊ុន Tencent ប្រកាសបញ្ចប់កុងត្រាជាមួយលោកទាំងអស់

2021-07-20 02:05:00
ចំនួនមតិ 0 | ចំនួនចែករំលែក 0

ក្រោយពេលផ្ទុះរឿងអាស្រូវជាមួយមនុស្សស្រីជាច្រើន នៅពេលនេះ ក្រុមហ៊ុនកម្សាន្តយក្សចិន Tencent បានសម្រេចចិត្តថានឹងផ្ដាច់គ្រប់កិច្ចសន្យាជាមួយតារាសម្ដែងប្រុសជួរមុខ Wu Yifan ទាំងអស់។

កាលពីថ្ងៃទី ១៩ ខែកក្កដាកន្លងទៅនេះ បណ្ដាញព័ត៌មាន Sina បានរាយការណ៍ថា ក្រោយកម្រងរឿងអាស្រូវជាច្រើនដែលត្រូវបញ្ចេញដោយស្រីស្អាតវ័យ ១៩ឆ្នាំ Du Meizhu នោះ នៅពេលនេះ តារាសម្ដែង និងចម្រៀងលំដាប់ A ចិន Wu Yifan កំពុងជួបបញ្ហាធំហើយ។

ជាក់ស្ដែង ក្រុមហ៊ុនយក្សខាងផ្នែកកម្សាន្តនៅប្រទេសចិនគឺ Tencent បានប្រកាសបញ្ចប់កិច្ចសន្យាជាមួយលោកទាំងអស់។ សកម្មភាពនេះមានន័យថា មិនមែនមានតែ Tencent នោះទេដែលផ្ដាច់កុងត្រា ដោយបុត្រសម្ព័ន្ធទាំងអស់ដែសស្ថិតក្រោម Tencent ក៏បញ្ចប់កុងត្រានឹងលោកដូចគ្នា។

តាមនោះដែរ មុននោះ អតីតសមាជិកក្រុមចម្រៀង EXO គឺជាតំណាងរបស់កម្មវិធីមើលរឿង Tencent និងតំណាងឲ្យហ្គេម Honor of Kings។ មកដល់រសៀលថ្ងៃទី ១៩ ខែកក្កដា ផលិតកម្មយក្សនេះបានប្រកាសជាផ្លូវការលើទំព័របណ្ដាញសង្គមរបស់ខ្លួនថា Wu Yifan នឹងលែងជាតំណាងរបស់ខ្លួនទៀតហើយ។ បន្ថែមពីនេះ ប្រេនគ្រឿងសំអាង Lancome និងសាប៊ូបោកខោអាវ១ទៀត ក៏ប្រកាសលែងយកលោកជាតំណាង និងបញ្ចប់កុងត្រាមុនកំណត់ដូចគ្នា៕

ប្រភព៖ zaobao.com ប្រែសម្រួល៖ Caramel