របៀបរៀបចំហុងស៊ុយទុកដាក់ទូទឹកកក ឲ្យលាភហូរចូលផ្ទះអត់ដាច់ ធ្វើអ្វីក៏បានសម្រេច

2021-06-29 09:35:00
ចំនួនមតិ 0 | ចំនួនចែករំលែក 0

ទូទឹកកកគឺជារបស់ប្រើប្រាស់ដ៏សំខាន់របស់គ្រួសារគ្រប់គ្នា ដែលសឹងតែខ្វះមិនបាន តែប្រសិនបើរៀបចំទុកដាក់របស់នេះមិនត្រឹមត្រូវ នឹងធ្វើឲ្យអ្នកជួបរឿងមិនល្អច្រើន។ ខាងក្រោមនេះគឺជារបៀបរៀបចំទូទឹកកកឲ្យមានលាភសំណាងហូរចូលផ្ទះ។

១. ទូទឹកកកហាមទុកឲ្យទូលាយ

នៅក្នុងតម្រាហុងស៊ុយ ទូទឹកកកប្រៀបបានដូចជាឃ្លាំងទ្រព្យដែរ ដូចនេះហើយ ការដែលស្ដុកឥវ៉ាន់ឲ្យពេញទូទឹកកក នឹងជួយឲ្យយីអ៊ុនរបស់ម្ចាស់ផ្ទះ និងសមាជិកនៅក្នុងគ្រួសារ ឡើងទៅតាមទំនិញដែលស្ដុកនៅក្នុងទូដូចគ្នាដែរ។ គេជឿជាក់ថា ក្នុងទូរបស់ហូបចុកកាន់តែច្រើន លាភសំណាងរបស់អ្នករស់នៅក្នុងផ្ទះក៏កើនឡើងតាមនោះដែរ។ អាស្រ័យហេតុនេះហើយ អ្នកទាំងអស់គ្នា គួរជៀសវាងការទុកទូទឹកកកឲ្យទទេស្អាតឲ្យសោះ។

២. ហាមដាក់របស់ធ្ងន់លើទូ

មនុស្សមិនតិចឡើយ ដោយសារតែគិតថា នៅលើក្បាលទូគឺជាកន្លែងដ៏ទំនងសម្រាប់ដាក់ឥវ៉ាន់នានា ដូច្នេះហើយ ក៏យកឥវ៉ាន់មិនតិចនោះទេ មកដាក់នៅទីនេះ រហូតដល់ថ្នាក់មានអ្នកដាក់ម៉ាស៊ីនកម្ដៅអាហារដាក់ទីនេះទៀតផង។ ការដែលហាមមិនឲ្យដាក់របស់ធ្ងន់លើទូ គឺមកពីគេជឿថា នៅពេលទូទ្រទម្ងន់ធ្ងន់ខ្លាំងពេក អ្នករស់នៅក្នុងផ្ទះ ក៏មានអារម្មណ៍ហប់ណែន ពិបាករស់នៅដូចគ្នា ព្រោះវាមិនជ្រះស្រឡះខួរក្បាល ប្រៀបបានដូចមានគេយកអ្វីមកសង្កត់។

៣. ហាមដាក់ទូទឹកកកក្បែរចង្ក្រាន

នៅក្នុងតម្រាហុងស៊ុយ ទូទឹកកកមានធាតុទឹក និងចង្ក្រានមានធាតុភ្លើង ធាតុទាំង២ គឺឆុងគ្នាខ្លាំង ដាក់ក្បែរគ្នា ក្រៅពីមានគ្រោះហានិភ័យ ព្រោះភ្លើងនៅជិតហ្គាសនោះ ជំនឿហុងស៊ុយក៏ជឿថា ការរៀបចំបែបនេះ ក៏ធ្វើឲ្យសមាជិកក្នុងគ្រួសារមានរឿងក្ដៅក្រហាយឥតឈប់ ឈ្លោះប្រកែកគ្នាគ្មានថ្ងៃស្រាកស្រាន្ត។ ដូចនេះហើយ ដើម្បីជៀសវាងរឿងនេះ អ្នកគួរគប្បី ដាក់ចង្ក្រាន និងទូទឹកកក កាន់តែឆ្ងាយពីគ្នា កាន់តែល្អ៕

ប្រភព៖ Eva ប្រែសម្រួល៖ Caramel