ចូលឆ្នាំនៅផ្ទះ ដោយសប្បាយរីករាយតាមវិធីសាមញ្ញៗទាំងនេះ

2021-04-13 02:40:00
ចំនួនមតិ 0 | ចំនួនចែករំលែក 0

ដោយសារតែបញ្ហាកូវីដ ហេតុនេះរាជរដ្ឋាភិបាលអំពាវនាវឲ្យគ្រួសារទាំងអស់រីករាយបុណ្យចូលឆ្នាំខ្មែរនៅផ្ទះរៀងៗខ្លួន។ យ៉ាងណា អ្នកអាចបង្កើតភាពរីករាយបាន ដោយវិធីទាំងនេះ។

១. Video Call

សម្រាប់អ្នកដែលនៅឆ្ងាយពីស្រុកកំណើត សម័យបច្ចេកវិទ្យានេះ អ្នកអាចទំនាក់ទំនងគ្នាបានតាមរយៈបណ្តាញសង្គមបាន ដែលធ្វើឲ្យការឃ្លាតឆ្ងាយពីឪពុកម្តាយ ឬ សាច់ញាតិបងប្អូន នៅតែដូចជិតបង្កើយ។ ត្រឹមឆាត ជាការវាយអក្សរពេលខ្លះ អាចនឹងពិបាកបង្ហាញអារម្មណ៍ចេញមក តែបើអ្នកប្រើជា Video Call វិញ បានឃើញទាំងកាយវិការ លឺសម្លេង និងមុខគ្នាទៅវិញទៅមក ហាក់ដូចបានជួបផ្ទាល់ ហើយក៏អាចបំបាត់ការនឹករលឹកគ្នាបានខ្លះផងដែរ។

២. លេងល្បែងប្រជាប្រិយក្នុងបរិវេណផ្ទះ

ប្រសិនបើអ្នករស់នៅជួបជុំគ្នាស្រាប់ជាមួយឪពុកម្តាយ បងប្អូនក្នុងផ្ទះតែមួយ ដើម្បីបង្កើនភាពរីករាយដូច្នេះ អ្នកអាចរៀបចំជាការលេងល្បែងប្រជាប្រិយខ្មែរក្នុងបរិវេណផ្ទះបាន ដូចជា លេងបោះអង្គុញ វាយក្អម ស្វាដណ្តើមស្លឹកឈើ.....។ មិនត្រឹមបង្កើនស្នាមញញឹមទេ តែក៏ធ្វើឲ្យអ្នកបានចូលរួមរក្សាល្បែងប្រជាប្រិយខ្មែរផងដែរ។

៣. ចំណាយពេលធ្វើអ្វីដែលអ្នកខកខានយូរហើយ

រយៈពេលបុណ្យចូលឆ្នាំប្រពៃណីខ្មែរមានចំនួន៣ថ្ងៃ ហេតុនេះអាចថាមានរយៈពេលយូរគួរសមដែរ។ ដើម្បីបំបាត់ភាពអផ្សុក អ្នកអាចធ្វើអ្វីតាមចំណង់ចំណូលចិត្តដែលធ្លាប់ខកខានមកយូរដោយសារតែរវល់នឹងការងារ ឬសិក្សារៀនសូត្រជាដើម ដូចជា មើលរឿង លេងហ្គេម ដាំផ្កា ឬរៀនធ្វើម្ហូបទុកញ៉ាំខ្លួនឯងក៏បាន។ ទាំងនេះសុទ្ធតែជាសកម្មភាពជួយអ្នកឲ្យមានអារម្មណ៍ស្រស់ស្រាយ មិនសូវស្រ្តេស។