អ្នកនៅជាមួយរបស់ លី លានជារស់នៅសុខស្រួលដោយសារភូមិគ្រឹះរយលានគ្មានអ្នកជួល

2021-03-10 02:44:00
ចំនួនមតិ 0 | ចំនួនចែករំលែក 0

ភូមិគ្រឹះទំហំ ៥០០០ម៉ែត្រការ៉េរបស់កំពូលតារាសម្ដែងប្រុសចិន Jet Li មានតែអ្នកនៅជាមួយម្នាក់គត់ដែលកំពុងស្នាក់នៅបានរយៈពេល ៧ឆ្នាំមកហើយ។

ក្រោយប្រឡូកសិល្បៈរាប់សិបឆ្នាំទាំងក្នុងប្រទេស និងលើទីផ្សារអន្តរជាតិ តារាសម្ដែងជើងចាស់ Jet Li បានសល់នូវផ្ទះ និងដីជាច្រើនកន្លែងនៅលើពិភពលោក។ នៅក្នុងចំណោមនោះ គឺរួមមានភូមិគ្រឹះមួយនៅ Qing Dao ដែលមានទំហំ ៥០០០ម៉ែត្រការ៉េ និងមានតម្លៃ ៣០០លានយាន់ (៤៦លានដុល្លារ)។

ទោះបីជាផ្ទះនេះអាចជួលបានរាប់ម៉ឺនដុល្លារក្នុង១ខែក្ដី តែតួរឿង Hero សុខចិត្តទុកឲ្យដុះស្លែក៏មិនឲ្យគេជួលដែរ ត្បិតខ្លាចខូចផ្ទះ។ ដោយប្រុសស្អាតរូបនេះ ឲ្យអ្នកនៅជាមួយម្នាក់នៅមើល និងថែរក្សាផ្ទះ។ ជាក់ស្ដែង ស្រ្តីវ័យកណ្ដាលរូបនេះ បានមកធ្វើការឲ្យសិល្បករ ៥៧ឆ្នាំ បាន៧ឆ្នាំមកហើយ។ មនុស្សជាច្រើនបានលើកឡើងថា ភូមិគ្រឹះមួយនេះប្រៀបដូចជារាជវាំងផ្ទាល់ខ្លួនរបស់នារីនេះដែរ ដោយសារម្នាក់ឯង នៅក្នុងផ្ទះដ៏ស្កឹមស្កៃខាងលើ។

អ្នកជិតខាងបានទម្លាយថា នារីនៅជាមួយរូបនេះ បានដាំបន្លែ បោកគក់ និងហាលខោអាវប្រៀបដូចផ្ទះនេះជារបស់គាត់។ នាងត្រូវបានគេគិតថាជាអ្នកនៅជាមួយដែលសំណាងជាងគេ ព្រោះក្រៅពីបម្រើខ្លួនឯង គាត់មិនចាំបាច់បម្រើអ្នកណាទាំងអស់ ត្បិតសូម្បី លី លានជាក៏មិនដែលមកអើតផ្ទះនេះដែរ៕