ដាក់ហឹងក្នុងបន្ទប់ទទួលភ្ញៀវ ត្រូវដឹងរឿងទាំងនេះ បើចង់មានបាន ទ្រព្យហូរចូលឥតឈប់

2021-01-26 02:50:00
ចំនួនមតិ 0 | ចំនួនចែករំលែក 0

ឧបករណ៍បច្ចេកវិទ្យាជាច្រើនដូចជា ឧបករណ៍បំពងសំឡេង ធុងបាស និងទូរទស្សន៍គឺសុទ្ធតែត្រូវដាក់ឲ្យឆ្ងាយពីហឹង បើមិនចង់ធ្វើឲ្យរំខាន ដល់ទេវតាដូនតា។ រឿងទាំងនេះ អ្នកត្រូវចាប់អារម្មណ៍ពេលរៀបចំទុកដាក់ហឹងនៅក្នុងបន្ទប់ទទួលភ្ញៀវ។

១. ទីតាំងដាក់ហឹង

ហឹងគឺប្រើសម្រាប់ដាក់តាំងព្រះ ទេវតា វត្ថុស័ក្ដិសិទ្ធិ និងដូនតាជាដើម។ ដូចនេះហើយ មានទីតាំងមួយចំនួន គឺដាច់ខាតត្រូវជៀសឲ្យឆ្ងាយពេលរៀបហឹង។ កន្លែងដែលហាមដាច់ខាតមានដូចជា ក្រោមជណ្ដើរ ក្រោមធ្នឹម ជាប់បន្ទប់ទឹក ជាប់ចង្ក្រាន ដែលសុទ្ធសឹងតែជាកន្លែងដែលមានបរិយាកាសមិនល្អ ធ្វើឲ្យទីសក្ការៈលែងស័ក្ដិសិទ្ធិ និងមើលមិនសម។ ត្បិតតួនាទីមួយរបស់ហឹងដាក់តាំងនេះ គឺផ្ដល់ជំនឿចិត្ត និងការពារដល់ម្ចាស់ផ្ទះ ដូចនេះយើងត្រូវដាក់នៅទីដែលល្អបំផុតដូចគ្នា។

២. ទីដាក់ហឹងត្រូវតែស្ងប់ស្ងាត់

ឧបករណ៍បញ្ចេញសំឡេងដូចជា Speaker ធុងបាស ទូរទស្សន៍ ម៉ាញេ សុទ្ធតែត្រូវដាក់ឲ្យឆ្ងាយពីហឹងទាំងអស់ ត្បិតនៅពេលយើងប៉ងសុំអ្វីមួយ មិនអាចបែកអារម្មណ៍បានឡើយ។ បន្ថែមពីនេះ ភ្លើងពណ៌ប្រភេទខ្សែដែលតែងយកតាំងពេលចូលឆ្នាំនោះ គ៏ជៀសវាងមិនឲ្យតែងនៅហឹងដែរ ព្រោះនឹងនាំឲ្យមានអារម្មណ៍រញ៉េរញ៉ៃ មិនជ្រះស្រឡះ។

៣. ហឹងត្រូវដាក់ឲ្យខ្ពស់ជាងក្បាលមនុស្ស

ដើម្បីបង្ហាញពីទឹកចិត្តគោរពរបស់សក្ការៈ ហឹងត្រូវតែដាក់ឲ្យខ្ពស់ជាងក្បាលមនុស្ស ដើម្បីឲ្យដឹងថា ពួកគាត់មានឋានៈខ្ពស់ជាងកូនចៅនៅក្នុងផ្ទះ។ តាមក្បួនហុងស៊ុយចិន ហឹងដែលមានកម្ពស់ស្មើនឹងក្បាលមនុស្សគឺត្រណមខ្លាំងបំផុត ព្រោះបង្ហាញឲ្យឃើញថា សមាជិកក្នុងផ្ទះមិនគោរពដូនតា ដែលធ្វើឲ្យពិបាករកស៊ី។ ទន្ទឹមនឹងនេះ ហឹងក៏ត្រូវតែថែរក្សា និងសម្អាតឲ្យបានទៀងទាត់កុំឲ្យជាប់ធូលីដី៕

ប្រភព៖ Eva ប្រែសម្រួល៖ Caramel