តារាស្រករក្រោយស្លៀកសិចស៊ីមួយជំហរខ្លួន តែនៅតែមិនឈ្នះ Yang Mi លើកម្រាលព្រំក្រហម

2020-12-15 04:30:00
ចំនួនមតិ 0 | ចំនួនចែករំលែក 0

ទោះបីជាមិនស្លៀករ៉ូបសិចស៊ីខ្លាំងពេកក៏ដោយ តែដោយសារសម្រស់ស្រស់ស្អាត និងកេរ្តិ៍ឈ្មោះនៅកំពូលនោះ កំពូលតារាសម្ដែងស្រីចិន Yang Mi នៅតែទទួលចំណាប់អារម្មណ៍ខ្ពស់ជាងតារារៀមប្អូន។ កាលពីយប់ថ្ងៃទី ១១ ខែធ្នូមុននេះ ទស្សនាវដ្ដី Esquire របស់ចិនបានប្រារព្ធកម្មវិធីចុងឆ្នាំរបស់ខ្លួនដែលមានការចូលរួមពីសំណាក់សិល្បករ និងសិល្បការិនីជាច្រើនដួង។

ក្នុងកម្មវិធីនេះដែរ តារាជួរមុខ និងតារាជំនាន់ក្រោយ បានធ្វើខ្លួនស្អាតអស់លេខដើម្បីទាក់ទាញចំណាប់អារម្មណ៍ពីមនុស្សគ្រប់រូប។ ទោះបីជាសីតុណ្ហភាពរបស់ទីក្រុងប៉េកាំង ប្រទេសចិនបានធ្លាក់ក្រោម ០អង្សារហើយក៏ដោយ តែស្រីស្អាតជាច្រើននៅតែជ្រើសយករ៉ូបសិចស៊ីវាលខ្នង ដើម្បីបង្អួតសម្រស់សាច់ដ៏សខ្ចីរបស់ខ្លួន។

នៅក្នុងចំណោមនោះដែរ តារាចម្រៀងស្រីកំពុងឡើងកូដ Xuan Yi ទទួលបានចំណាប់អារម្មណ៍ខ្លាំងជាងគេ ដោយនាងស្លៀករ៉ូបសារូថ្លា ប៉ាក់ឌិនរោមសត្វនៅជើង ចំហរល្វែងខាងលើយ៉ាងសិចស៊ី។ ស្រីស្អាត ២៥ឆ្នាំត្រូវបានគេសរសើរថា ស្ថិតក្នុងចំណោមតារាដែលមានឈុតស្អាតជាងគេនៅក្នុងកម្មវិធីនេះ។

យ៉ាងណាក្ដី នៅលើបណ្ដាញសង្គម Weibo អ្នកដែលត្រូវបានទស្សនិកជនស្វែងរកច្រើនជាងគេ បែរជាកំពូលតារាសម្ដែងស្រីចិន Yang Mi ដែលជាអ្នកស្លៀកមិនសូវសិចស៊ីខ្លាំងទៅវិញ។ តាមនោះដែរ ស្រីស្អាត៣៤ឆ្នាំ ស្លៀករ៉ូបមានចងបូធំនៅពីមុខ និងវែងអូសដី។ មនុស្សជាច្រើនសរសើរអ្នកម្ដាយកូន១ថា ទោះអាយុបងគេជិត ១០ឆ្នាំ ក៏ដោយ តែ Yang Mi មិនចាញ់ប្រៀបតារារលកក្រោយឡើយ៕