តាមរយៈទំព័រហ្វេងប៊ុកផ្លូវការរបស់ លោក ឃឹម ហ្វីណង់ អភិបាលស្រុកបន្ទាយស្រី នៅថ្ងៃនេះ បានផ្សព្វផ្សាយអំពីឱកាសដ៏កម្រ១ ដែលលោកបានអនុញ្ញាតិឲ្យក្មេងស្រីម្នាក់ អាចចូលកាន់តំណែងជំនួសលោក ក្នុងរយៈពេល១ថ្ងៃ។

ថ្វីត្បិត តែរយៈពេលខ្លីក៏ពិតមែន តែនេះ គឺជាគម្រូដ៏ល្អ១ក្នុងសង្គម ដើម្បីការលើកទឹកស្ត្រីនៅកម្ពុជា ដើម្បីហ៊ានស្រមៃធំ និងបំពេញក្តីស្រមៃនូវអ្វីដែលខ្លួនស្រឡាញ់ក្នុងជីវិត។

ទំព័រហ្វេសប៊ុកដដែលបានសរសេរបន្តថា៖ សូមណែនាំឱ្យស្គាល់ ប្អូនស្រី សារាន! «សារាន» មានក្តីស្រមៃចង់ក្លាយទៅជាអភិបាលស្រុកនៅក្នុងថ្ងៃអនាគត ហើយតាមរយៈអង្គការភ្លែនអន្តរជាតិកម្ពុជា (Plan International Cambodia) ប្អូនស្រីបានជ្រើសរើសយករូបខ្ញុំធ្វើជាគំរូ(Idol) របស់គាត់ ក្នុងដំណើរឈោងចាប់ក្តីស្រមៃមួយនេះ។

ដើម្បីចូលរួមអបអរសាទរទិវា”ក្មេងស្រីអន្តរជាតិ”ជាមួយអង្គការភ្លែនអន្តរជាតិកម្ពុជា និងដើម្បីសម្រេចក្តីស្រមៃរបស់ប្អូនស្រី សារាន ខ្ញុំនឹងចូលរួមក្នុងកម្មវិធី ក្មេងស្រីកាន់តំណែងជំនួស ដែលជាកម្មវិធី​មួយ អនុញ្ញាត​ឱ្យក្មេងស្រីម្នាក់​កាន់តំណែង​”ជានិមិត្តរូប”​ក្នុង​រយៈពេល​មួយថ្ងៃ ដើម្បីបង្កើតជា​ឱកាសឲ្យ​ក្មេងស្រីទទួលបានបទពិសោធន៍ផ្ទាល់នៃក្តីស្រមៃរបស់ខ្លួន អាចចែករំលែកគំនិត និងបង្ហាញការអំពាវនាវរបស់ពួកគេនៅ​កន្លែងដែលពួកគេកម្រមាន​វត្តមាន​ ឬត្រូវ​បាន​គេ​ស្តាប់​។

តាមរយៈកម្មវិធីឆ្លងកាត់បទពិសោធន៍ជាអភិបាលស្រុកក្នុងរយៈពេលពេញមួយថ្ងៃនេះ ក៏​ជា​ឱកាសឱ្យប្អូនស្រីអាច​រៀនសូត្រ ដឹកនាំ សម្រេចចិត្ត និង​អភិវឌ្ឍផងដែរ។

ប្រភពរូបថត៖ ទំព័រហ្វេសប៊ុក លោក ឃឹម ហ្វីណង់