មនុស្សស្រីស្អាត ឆ្លាតវៃ ដល់ណាក៏គង់បាត់តម្លៃចំពោះមុខបុរស បើធ្វើរឿងទាំងនេះ

2020-09-11 03:11:00
ចំនួនមតិ 0 | ចំនួនចែករំលែក 0

មនុស្សស្រីខូចចិត្ត ប្រាកដណាស់ថាអ្នកណាក៏វេទនា ពិបាកចិត្ត យំសោក។ អ្នកមានសិទ្ធិទុកឲ្យខ្លួនឯងពិបាកចិត្ត តែអ្នកមិនមានសិទ្ធិបោះបង់ចោលខ្លួនឯងឡើយ។ យប់យំហើមភ្នែកប៉ុណ្ណា ព្រលឹមឡើងនៅតែត្រូវធ្វើខ្លួនឲ្យខ្ញង់ ងើបក្បាលឲ្យខ្ពស់មិនឲ្យគេមើលងាយ។ ខាងក្រោមនេះគឺជាទង្វើដែលត្រូវចៀសជាដាច់ខាតដើម្បីកុំឲ្យមនុស្សប្រុសបន្ទាបតម្លៃ។

១. តោងទាមគេ ក្រោយបែកគ្នា

គេថា អ្នកនៅខាងក្រៅ និយាយស្រួលណាស់ តែអ្នកដែលជួបប្រទះទើបពិបាកធ្វើចិត្ត។ ទទួលស្គាល់ថា ក្រោយបែកគ្នា អ្នកណាក៏ពិបាកធ្វើចិត្ត ហើយបំភ្លេចមនុស្សម្នាក់បានណាស់។ តែអ្នកត្រូវចងចាំថា ខណៈដែលគេព្រមបែកគ្នាជាមួយអ្នកហើយ មានន័យថា គេលែងមានចិត្តលើយើងទៀតហើយ។ ទោះយើងខំប្រឹង អូសទាញ តោងទាមប៉ុណ្ណា ក៏អត់ន័យដែរ។ ផ្ទុយមកវិញ ការធ្វើបែបនេះ កាន់តែធ្វើឲ្យតម្លៃយើងចំពោះមុខគេ តិចជាងមុនប៉ុណ្ណោះ។

២. និយាយដើមសង្សារចាស់

អ្នកធ្លាប់ឮទេថា អ្នកដែលត្រូវគេនិយាយ មានឈ្មោះល្អជាងអ្នកដែលនិយាយដើមគេ? មូលហេតុគឺមកពី អ្នកស្ដាប់ គេមិនដឹងឡើយថា អ្នកត្រូវគេនិយាយដើម ជាមនុស្សបែបម៉េច ព្រោះគ្រាន់តែស្ដាប់តាមសម្ដីគេ តែអ្នកដែលនិយាយដើមគេ គេដឹងច្បាស់ណាស់ ថាជាមនុស្សប្រុសមានអត្តចរិតមិនល្អ។ អស់និស្ស័យហើយ ក៏បណ្ដោយឲ្យគេដើរផ្លូវរៀងៗខ្លួនចុះ ហេតុផលអីត្រូវដើរហែកកេរ្តិ៍គេនោះ។ អ្នកមិនខ្មាសគេទេឬ បើត្រូវគេសួរថា អូហ៍ ពីមុនគេអាក្រក់ចឹង កោតតែឯងស្រលាញ់គេបានដែរ?

៣. បំផ្លាញជីវិតខ្លួនឯង

អ្នកគិតថា ធ្វើខ្លួនឲ្យអាណិត គេនឹងវិលត្រលប់មករកអ្នកវិញ? អ្នកច្រឡំហើយ គេមិនមកវិញទេ គេមានតែធូរចិត្ត ព្រោះគិតថា សំណាងណាស់ដែលបានបោះបង់យើងចោលទាន់ពេល។ មូលហេតុគឺមកពី ការបំផ្លាញខ្លួនឯង មិនត្រឹមតែមើលអស់តម្លៃនោះទេ វាធ្វើឲ្យយើងមើលទៅគួរឲ្យអាណិត ព្រោះបើយើងមិនជួយខ្លួនឯង គ្មានអ្នកណាអាចជួយយើងបានឡើយ៕

ប្រភព៖ Phunutoday ប្រែសម្រួល៖ Caramel