បង្ហាញហេតុផល៥យ៉ាង ដែលមនុស្សស្រីមិនគួរចាប់ផ្តើមស្នេហ៍ចាស់ម្តងទៀត

2020-07-14 05:05:00
ចំនួនមតិ 0 | ចំនួនចែករំលែក 0

នៅពេលចិត្តអ្នកមិនទាន់អស់ស្រលាញ់នៅឡើយ ហើយស្រាប់តែគេវិលមកវិញ នោះហើយគឺជារឿងស្ទាក់ស្ទើរបំផុត។ នៅពេលដែលគេទៅចោលអ្នក បេះដូងអ្នកប្រាកដជាធ្លាប់រំពឹងថាថ្ងៃណាមួយគាត់នឹងវិលមកវិញ ដូច្នេះពេលដែលឱកាសនេះមកដល់ អាចថាអ្នកច្បាស់ជាអរបន្តិច ភ័យបន្តិច។ តែត្រូវគិតឲ្យបានច្បាស់លាស់ មុនពេលអ្នកត្រូវរឿងដដែល លងបន្លាច ព្រោះគុណវិបត្តិវាក៏នឹងមកជាមួយដែរ។

១. ពិបាកទុកចិត្ត

នៅពេលឃើញគាត់ចង់វិលមកជានាវិញ អារម្មណ៍របស់អ្នកប្រហែលជាអរជាងមុនបន្តិចហើយ មែនទេ?។ តាមពិត ការត្រលប់មកម្តងនេះ ការជឿជាក់លើគាត់អាចថាមាន៥០%ប៉ុណ្ណោះ ព្រោះជម្រៅចិត្តរបស់អ្នកប្រាកដជានៅតែភ័យខ្លាច មិនដឹងថាត្រូវរស់ក្នុងរណ្តៅទុក្ខបន្តឬអត់ ហើយតើអាចជឿបានកម្រិតណាលើមនុស្សប្រុសដែលធ្លាប់បោះបង់អ្នកចោល?

ថ្វីបើការវិលមកផ្សះផ្សាគ្នាវិញ មិនមែនសុទ្ធតែអាក្រក់ទាំងអស់ក្តី តែតើអ្នកប្រាកដប៉ុន្មានភាគរយថាគាត់ពិតជាស្រលាញ់អ្នកមែន? តើលើកនេះ គាត់នៅតែថែទាំអ្នកដូចគ្រាដំបូងអត់? ប្រសិនបើអ្នកបែកគ្នាមិនមែនដោយសារជនទី៣ទេ អូខេ! អ្នកអាចពិចារណាត្រលប់មកជានាជាមួយគាត់វិញ។ តែបើអ្នកទាំង២បែកគ្នាដោយសារតែការក្បត់ ឬអំពើហិង្សាមកលើអ្នក នោះអ្នកគួរតែពិចារណាឲ្យបានល្អិតល្អន់។ ការសម្រេចចិត្តលើកនេះ ពិតជាសំខាន់ណាស់ ដូច្នេះត្រូវសួរខ្លួនឯងឲ្យច្បាស់ជាមុនថា តើបេះដូងអ្នកអាចទ្រាំទ្រទារុណកម្មផ្លូវចិត្តបានម្តងទៀតឬអត់?

២. អាចថាមកពីគាត់លែងមានអ្នកណានៅសល់ទៀត

ពេលខ្លះការវិលត្រលប់របស់គាត់សារនេះ ដោយសារតែគាត់ឯកា ឬគេបោះបង់គាត់ចោលជាដើម។ កុំចាត់ទុកខ្លួនឯងដូចតុក្កតាជ័រ ចង់គេវិលមកឱបពេលណាក៏បាន បោះចោលពេលក៏បាន។ កុំភ្លេចថា ថ្ងៃដែលគេចាកចេញ អ្នកឯកាកម្រិតណា ឈឺប៉ុនណា ខ្ទេចខ្ទាំបេះដូងយ៉ាងណា។ ដូច្នេះ ទម្រាំអ្នកអាចវិលមកសភាពដូចរាល់ថ្ងៃបាន វាមិនងាយស្រួលឡើយ។ ហេតុនេះ កុំងាយនឹងយល់ព្រមពាក្យថាត្រូវគ្នាវិញបាន។ កុំឲ្យឱកាសមនុស្សប្រុសដូចជាគាត់ម្តងទៀត ព្រោះគេជ្រើសផ្លូវត្រលប់វិញដើម្បីតែបំពេញភាពឯការបស់គេប៉ុណ្ណោះ។

៣. គ្រាន់តែជាទំនាក់ទំនងដែលមានតែសម្បកកាយ

ការពិតមួយ នៅពេលមនុស្សស្រីបានបាក់ចិត្តស្រលាញ់បុរសណាម្នាក់ហើយ តែបែរជាបែកគ្នាវិញ នាងតែងតែចោទសួរសំនួរមួយដែលពិបាករកដំណោះស្រាយ។ ហេតុអ្វីអ្នកធ្វើបែបនេះដាក់ខ្ញុំ? តើពេលនេះ អ្នកនៅទីណា? ហើយចុងបញ្ចប់ សូម្បីតែខ្លួនឯងផ្ទាល់ក៏មិនអាចរកចម្លើយឃើញ ហើយនៅតែរក្សាសំនួរនេះក្នុងចិត្តជារៀងរហូត។ បើទោះអ្នកព្យាយាមបំភ្លេចក៏ដោយ ក៏នៅមិនអាចភ្លេចបាន។ ហេតុអ្វីក៏គេបោះបង់អ្នកចោលនៅថ្ងៃនោះ ហើយបែរជាវិលមកវិញនៅថ្ងៃនេះទៅវិញ? តើមកពីគេរកមិនបានមនុស្សស្រីពិសេសម្នាក់មែន? បើសិនអ្នកនៅតែមានអារម្មណ៍ឈឺចាប់នៅឡើយ អ្នកមិនគួរខ្ជះខ្ជាយពេលវេលា ចិត្តកាយជាមួយគាត់ម្តងទៀតទេ ព្រោះអ្នកត្រូវរកតម្លៃឲ្យខ្លួនឯងបន្តទៀត។

៤. រូបភាពអាក្រក់នៅថ្ងៃនោះ នៅតែដិតដាម

មិនដឹងថា អត្តចរិតយ៉ាប់ៗដែលគាត់ធ្លាប់សាង តើគាត់នឹងផ្លាស់ប្តូរឬអត់ ហើយតើអ្នកអាចទទួលយកបានឬទេ? បើគាត់គ្រាន់តែជាមនុស្សពូកែនិយាយ ហើយចរិតមិនកែតើអ្នកនឹងឈឺម្តងទៀតយ៉ាងណា? តើអ្នកនៅស្រមៃរូបភាពថ្ងៃដែលគាត់ចោលអ្នក ឃើញឬអត់ពេលនេះ? ប្រសិនបើអ្នកជ្រើសរើសវិលជួបគ្នាវិញ អ្នកដាច់ខាតត្រូវតែហ៊ានទទួលយកការឈឺចាប់បម្រុងមួយទុកឲ្យហើយ ការភ័យខ្លាចដែលមានក្នុងចិត្តរបស់អ្នក ត្រូវតែហ៊ានគ្រប់គ្រងវា។ ហេតុនេះ ត្រូវព្យាយាមសួរខ្លួនឯងឲ្យច្បាស់លាស់ ថាតើអ្នកត្រៀមខ្លួនទទួលយកហានិភ័យស្នេហាបែបនេះម្តងទៀតហើយមែនទេ?

៥. វិលរកស្នេហាចាស់វិញ វាមិនខុសពីក្នុងសាច់រឿងដែលបានដឹងពីចុងបញ្ចប់រួចទៅហើយ

ត្រូវហើយ! ត្រលប់មកជានាគ្នាវិញ គឺជារឿងល្អ តែត្រូវចាំថាវាមិនមែនល្អគ្រប់គូនោះទេ។ និយាយឲ្យសាមញ្ញទៅ គូខ្លះពេលត្រូវគ្នាម្តងទៀត គេអាចកាន់ដៃរហូតដល់ចាស់ តែខ្លះវិញគ្រាន់តែមួយចំហាយ។ នោះដោយសារតែភាពភ័យខ្លាចបានរស់នៅក្នុងបេះដូងរបស់អ្នករួចទៅហើយ ដូច្នេះនៅពេលណាត់ជួបគ្នាម្តងទៀត ក៏មិនរលូនដែរ ហើយរបួសបើឈឺវិញ ក៏មិនងាយជាសះដូចមុនដែរ។ មិនខុសពីសាច់រឿងមួយ ដែលយើងកំពុងមើល បើទោះជាវាមិនទាន់ដល់ភាគបញ្ចប់នៅឡើយ តែយើងអាចទាយដឹងមុនខ្លះហើយថា ចុងក្រោយគូនោះបានជួបគ្នាឬអត់? ប៉ុន្តែសួរថា ហេតុអីរឿងខ្លះយើងដឹងថាចុងបញ្ចប់យ៉ាងណាហើយ តែនៅទ្រាំអង្គុយតាមដានបន្តទៀត? តើហេតុអ្វី យើងមិនទៅប្តូរមើលរឿងថ្មីវិញ?