សំនួរចាក់ដោត ខំប្រឹងធ្វើការដើម្បីលុយឬដើម្បីក្ដីសុខ មួយណាសំខាន់ជាង?
- 2020-07-01 05:30:00
- ចំនួនមតិ 0 | ចំនួនចែករំលែក 0
សំនួរចាក់ដោត ខំប្រឹងធ្វើការដើម្បីលុយឬដើម្បីក្ដីសុខ មួយណាសំខាន់ជាង?
ប្រាកដហើយថា ពេលក្រក៏មានក្ដីសុខបែបក្របានដែរ តែវាបានត្រឹមតែមួយរយៈពេលប៉ុណ្ណោះ ព្រោះក្រមិនអាចមានក្ដីសុខរហូតបានឡើយ
ជីវិតរស់នៅគឺពោពេញទៅដោយចម្រូងចម្រាស។ ជាក់ស្ដែង គ្រាន់តែរឿងធ្វើការ ក៏បញ្ហាចោទសួរដែរថា ចុងបញ្ចប់ជីវិតការងារ លុយសំខាន់ជាង ឬក្ដីសុខទើបសំខាន់? សម្រាប់ខ្លួនខ្ញុំផ្ទាល់គិតថា ទាំងលុយ និងក្ដីសុខគឺសំខាន់ដូចគ្នា តែអ្នកមិនអាចលោភលន់ពេកនោះឡើយ។
តែបើត្រូវរើសមួយ ក្នុងចំណោម២ ខ្ញុំនឹងរើសយកលុយ។ មនុស្សជាច្រើននឹងគិតថា ការសម្រេចចិត្តនេះគឺរាក់កំផែល គ្មានគិតជ្រាលជ្រៅ។ ប៉ុន្តែ និយាយឲ្យត្រង់ទៅ នៅសម័យនេះ សួរថាបើគ្មានលុយ តើអាចដោះស្រាយបញ្ហាអ្វីបាន។ អ្វីដែលហៅថា ជីវិតនៅក្មេង សប្បាយសិនទៅ កុំគិតច្រើន តាមការពិតក៏គ្រាន់តែលេសដើម្បីបន្លប់ភាពអាត្មានិយមតែប៉ុណ្ណោះ។
ជីវិតយើងមួយនេះ មិនមែនរស់នៅតែដើម្បីខ្លួនឯងនោះទេ គឺនៅដើម្បីមនុស្សជុំវិញយើងទៀត។ នៅពេលមិនទាន់ជួបសម្ពាធនៃអាយុ និងជីវភាព គឺមានលុយប៉ុណ្ណាចាយប៉ុណ្ណឹង ថ្ងៃស្អែកទៅជាយ៉ាងម៉េចក៏មិនរវល់។ ប៉ុន្តែអ្នកច្បាស់ប៉ុន្មានភាគរយថាថ្ងៃស្អែកអ្វីៗនឹងរលូននោះ។
ចុះដល់ថ្ងៃមួយ អ្នកចង់រៀបការ ចង់មានបុត្រ មានលុយឯណាទៅធ្វើ? ពីធីអាពាហ៍ពិពាហ៍ដ៏តូចមួយឥលូវក៏អស់រាប់ពាន់ ទៅមួយម៉ឺនដុល្លារដែរ។ នេះគឺជាមង្គលការដែលយើងចង់ធ្វើខ្លួនឯង ចុះឧទាហរណ៍ឪពុកម្ដាយយើងឈឺ ត្រូវការលុយប្រញាប់ ត្រូវបង្វិលឯណាបាន? នៅពេលនេះ បានយើងស្ដាយការរស់នៅបែបរស់មួយថ្ងៃ គិតមួយថ្ងៃរបស់យើងកន្លងទៅ ដ្បិតមានប៉ុណ្ណាយើងចាយអស់ហើយ។
ពេលនេះដែរ ការគិតបែប ក្រមានក្ដីសុខបែបក្រ ក៏រលាយសាបសូន្យ ដោយយើងចង់ឲ្យពេលវេលាត្រលប់ទៅក្រោយ ដើម្បីសន្សំលុយឲ្យបានច្រើនជាងនេះ ហើយទោះបីជាលំបាកក្នុងការងារជាងនេះក៏ទទួលយកបាន។ វ័យនៅក្មេង បើស៊ូលំបាកបាន ស៊ូសិនទៅ ព្រោះបើចាស់ទៅ ប្រាកដជាមិនអាចស៊ូបានឡើយ។ ពិបាកដល់អាយុ ៤០ ក៏គ្រាន់ជាងស្រណុកដល់អាយុ ៤០ហើយលំបាកវិញដែរ៕