តារាស្រីខ្មែរល្បីៗ ស្អាតៗប៉ុន្មានដួងនេះ ហ៊ឺហាណាស់ជិះរថយន្តប្រណិតម៉ាកដូចៗគ្នា!

2020-06-11 08:51:31
ចំនួនមតិ 0 | ចំនួនចែករំលែក 0

ជារឿយៗ តែងឃើញសារព័ត៌មានបង្ហាញពីជីវិតហ៊ឺហារបស់សិល្បករអន្តរជាតិដែលលុយ ឡាន វីឡា រស់ក្នុងភាពស្តុកស្តម្ភ។ ប៉ុន្តែបើក្រឡេកមកមើលតារាក្នុងស្រុករបស់យើងវិញ ត្បិតតែមិនអានប្រៀបផ្ទឹមបានជាមួយគេ ប៉ុន្តែសិល្បករយើង ពិសេសអ្នកល្បីៗ ក៏រស់ភាពហ៊ឺហាមិនធម្មតាឡើយ ស្របពេលពួកគេម្នាក់ៗមានទ្រព្យ និងអចលនទ្រព្យសរុបខ្ទង់រាប់លានដុល្លារអាមេរិកដែរ។

លើកយកសិល្បការិនីខ្មែរៗល្បី ៥នាក់ខាងក្រោម ដែលពួកគេមានរឿងដូចគ្នាត្រង់ថា ម្នាក់ៗសុទ្ធតែមានរថយន្តប្រណិតម៉ាក Porsche ធ្វើជាមធ្យោបាយម្នាក់១គ្រឿងដូចគ្នា នេះមិនគិតពីរថយន្តផ្សេងទៀតដែលពួកគេមានផង។ និយាយត្រឹមរថយន្តម៉ាកខាងលើនេះ គឺថាតម្លៃពិតជាខ្ពស់ធម្មតា ដែលមានចាប់ពីជាង ១០ម៉ឺន ទៅជាង ២០ម៉ឺនដុល្លារអាមេរិកឯណោះ។

១.ពេជ្រ សោភា៖ តារាចម្រៀងរៀមច្បងរូបនេះ ត្រូវបានគេដឹងថា បាននាំចូលរថយន្ត Porsche បន្ថែមពីលើរថយន្តរបស់នាងដែលមានស្រាប់ម៉ាក Rank Rover កាលពីចុងឆ្នាំ ២០១៩។ រថយន្តថ្មីរបស់នាង ត្រូវបានគេប៉ាន់ប្រមាណតម្លៃថា ខ្ទង់ប្រមាណជាង ២០ម៉ឺនដុល្លារអាមេរិក។ ទាំងពីររថយន្តបូកបញ្ចូលគ្នា ខ្លាញីរបស់ហង្សមាស បានចំណាយដល់ទៅជាង ៣០ម៉ឺនដុល្លារអាមេរិកឯណោះ។

ភាពហ៊ឺហានេះ គេដឹងថា សោភា បានកាក់កបខ្លាំងជាមួយមុខជំនួញរកស៊ីលក់គ្រឿង Cosmetics បន្ថែមពីលើអាជីពសិល្បៈច្រៀង និងធ្វើតារាតំណាងផលិតផល ដែលជាប្រភពចំណូលសំខាន់របស់នាង ដែលមួយ១ឆ្នាំនាងអាចប្រមូលបានរាប់សិបម៉ឺនដុល្លារឯណោះ។

២.ពេជ្រ សូលីកា៖ តារាស្រី ដែលទើបនឹងសម្រាលបុត្ររួចនេះ ក៏ហ៊ឺហាដោយ Porsche ដែរ។ ត្បិតថា បានបាត់មុខច្រើនឆ្នាំជាមួយចចាមអារ៉ាមស្នេហ៍ជាមួយលោកផ្កាយ២ ប៉ុន្តែ សូលីកា បានលេចមុខវិញ ដោយនៅតែរក្សាបាននាមជាតារាស្រីកំពូលមួយរូប។ ដូច្នេះហើយ ទើបនឹងទទួលបានឱកាសថ្មីជាមួយហង្សមាស។ និយាយពីរថយន្តប្រណិតដែលតារាស្រី ប្រើវិញនោះ គឺមានតម្លៃជាង ២០ម៉ឺនដុល្លារអាមេរិក។

៣.ស៊ិន យូប៊ិន៖ តីត Freshie Girl លេខ១ ឆ្នាំ២០១៣នេះ ក៏ត្រូវបានគេដឹងថា នាងក៏ជិះរថយន្ត Porsche ពណ៌ស មួយគ្រឿងដែរ ដែលរថយន្តនោះតម្លៃជាង១០ម៉ឺនដុល្លារ។ ភាពហ៊ឺហា របស់តារាសម្ដែង បាននាំឲ្យការសង្ស័យមួយចំនួនពីប្រភពទុនប្រើសម្រាប់នាំយករថយន្តប្រណិតនេះធ្វើជាកម្មសិទ្ធិ ខណៈនាងត្រូវបានគេចងភ្ជាប់ជាមួយកូនប្រុសសេដ្ឋីមួយរូបនៅស្រុកខ្មែរ។ តាមព័ត៌មាន យូប៊ីន ត្រូវកូនរបស់អភិជនរូបនោះ តាមស្រឡាញ់នាងច្រើនឆ្នាំមកហើយ។ ដូច្នេះហើយ គេមិនដឹងនៅឡើយថា នេះជាកាដូពីបុរសត្រកូលអភិជន ឬយ៉ាងណា។

៤.តេង លក្ខិណា៖ តារាស្រីសាច់សដូចពងមាន់បករូបនេះ ហាក់មិនសូវចេញមុខចេញមាត់ឡើយនៅប៉ុន្មានឆ្នាំចុងក្រោយនេះ រាប់ចាប់ពីនាងបានប្ដូរអាជីពពីពិការិនីទូរទស្សន៍មកជាតារាចម្រៀង។ ទោះយ៉ាងនេះក្ដី តារាស្រី ត្រូវបានគេដឹងថា នាងក៏រស់នៅក្នុងភាពស្តុកស្ដម្ភមិនធម្មតាដែរ។ លក្ខិណា ត្រូវបានគេឃើញនាងមានប្រើរថយន្តទំនើបមួយគ្រឿងម៉ាក Porche ម៉ូដែល Panamera។ តាមអ្នកនៅកៀកនឹងរថយន្ត បានឲ្យដឹងថា រថយន្តទំនើបមួយគ្រឿងនេះ មានតម្លៃមិនក្រោម ១០ម៉ឺនដុល្លារឡើយ ពោលគឺចាប់ពីជាង១០ម៉ឺនឡើងទៅ ដោយប្រែប្រួលទៅតាមប្រភេទឆ្នាំ និងលក្ខណៈ Full Option ឬអត់ទៀត។

៥.គង់ វង្សយ៉ាទី៖ តារាស្រីដើមទ្រូងទ្រលុកទ្រលន់ ត្រូវបានគេដឹងថាមាន រថយន្ត Lexus LX 570 ពណ៌ខ្មៅ តម្លៃជាង២០ម៉ឺនដុល្លារហើយ។ ប៉ុន្តែកាលពីចុងឆ្នាំ ២០១៩ នាងក៏បានទិញបន្ថែមរថយន្ត Porsche មួយគ្រឿងទៀតដែលមានតម្លៃប្រហាក់ប្រហែលនឹងរថយន្តទី១។ ដោយសារតែបែបនេះ នាងគេត្រូវភ្ជាប់ជាមួយចំណងស្នេហ៍លោកផ្កាយ ៤ មួយរូប។ ប៉ុន្តែខុសពីតារាស្រីផ្សេងៗ យ៉ាទី ចេញមុខបកស្រាយភ្លាមៗថា សម័យនេះ គេអាចទិញរថយន្តដោយបង់រំលស់បាន។ ម្យ៉ាងនេះ គ្រួសារនាង ជាអ្នកធូរធារ ស្រាប់ដែលបច្ចុប្បន្នមានរថយន្តដល់ទៅ ៥គ្រឿងឯណោះសម្រាប់ជិះឆ្លាស់គ្នា៕

អត្ថបទ៖ ទារិកា