ឈប់ច្រឡំទៅ! គ្មានការផ្អាកចាយលុយ ១$ ២$ និង ៥$ ទេ នៅប្រើប្រាស់ធម្មតា

  • 2020-05-29 12:59:00
  • ចំនួនមតិ 0 | ចំនួនចែករំលែក 0

ថ្មីៗ​នេះ​មាន​មតិ​ និង​ការ​បកស្រាយ​ខុស​ៗ​គ្នា​ ស្ដី​ពី​ការ​ផ្អាក​ដំណើរ​ការ​ចាយវាយ និង​ប្រើប្រាស់​ក្រដាស​ប្រាក់​ដុល្លារ ១$ ២$ និង ៥$ នៅ​ក្នុង​ប្រទេស​កម្ពុជា។ ដើម្បី​ចៀសវាង​ការ​យល់​ច្រឡំ និង​ការ​បកស្រាយ​ខុស​បន្ត លោកជំទាវ ជា សិរី អគ្គ​នាយក​បច្ចេកទេស ធនាគារ​ជាតិ​នៃ​កម្ពុជា បាន​បក​ស្រាយ​តាម​រយៈសារ​១ ក្នុង​គណនី​ហ្វេសប៊ុករ​បស់​លោកជំទាវ នាថ្ងៃ២៩ ខែ​ឧសភា ឆ្នាំ២០២០នេះ។

ខ្លឹមសារដើម ពីគណនី​ហ្វេសប៊ុករ​បស់​លោកជំទាវ

លោកជំទាវ ជា សិរី អគ្គ​នាយក​បច្ចេកទេស ធនាគារ​ជាតិ​នៃ​កម្ពុជា បាន​បក​ស្រាយ​ថា៖ ការបកស្រាយតាម សេចក្តីថ្លែងការរបស់ធនាគារជាតិ ច្បាស់លាស់ហើយ។ សូមអានឱ្យចប់មុននឹងឆ្ងល់ និងមានមតិ។ ការបកស្រាយខុស ហើយបំភ័យគ្នាមិនមែនជារឿងល្អសម្រាប់ប្រទេសទេ។ ក្រដាសប្រាក់ ចារឹក ១$ ២$ និង ៥$ នៅតែអាចចរាចរបាន។

ហើយក៏មិនបានបិទសិទ្ធិប្រើប្រាស់ដែរ។ រវាងគ្រឹះស្ថានហិរញ្ញវត្ថុឯកជន និងធនាគារជាតិក៏នៅតែទទួលយកក្រដាសប្រាក់នេះធម្មតា។ គ្រាន់តែថាលើកមុនធនាគារជាតិជាអ្នករ៉ាប់រងសេវាដឹកជញ្ជូនក្រដាសប្រាក់ ចាស់ ទក់ រហែក និងលើស ទៅប្រទេសដើមគេគឺសហរដ្ធអាមេរិក ដើម្បីចាត់ចែងបន្ត ព្រោះកម្ពុជាគ្នានសិទ្ធអ្វីលើក្រដាសប្រាក់ដុល្លារអាមេរិកក្រៅពីចាយនោះទេ។ ប៉ុន្តែ ចាប់ពី ៣ខែ បន្ទាប់ពីនេះទៅ គ្រឹះស្ថានត្រូវទទួលរ៉ាប់រងសេវាដឹកជញ្ជូនដោយខ្លួនឯង។ ការសម្រេចចិត្តនេះគឺធ្វើឡើងដោយមានការឯកភាពគ្នារវាងគ្រឹះស្ថានហិរញ្ញវត្ថុ និងធនាគារជាតិនៃកម្ពុជា។

តាមច្បាប់ការទទួលក្រដាសប្រាក់ប្រភេទនេះជាសិទ្ធិរបស់គ្រឹះស្ថានឯកជន ធនាគារជាតិមិនមានសិទ្ធិលើគេទេ។ ប៉ុន្តែបើគេមិនទទួលក្រដាសប្រាក់រៀល ទោះប្រភេទណាក៏ដោយ នោះទើបធនាគារជាតិមានសិទ្ធិចាត់វិធានការតាមច្បាប់ជាធរមាន។ មួយវិញទៀតធនាគារជាតិមិនបានសម្រេច ថាមិនទទួល យកនោះទេ។ តែធនាគារជាតិនឹងពិចារណា ទៅថ្ងៃក្រោយអំពីបញ្ហានេះ ហើយ សូមឱ្យចាត់ទុកថាជាការជូនដំណឹងដែរចុះ កុំឱ្យថាគេអនុវត្តអីមិនប្រាប់ទុកមុន។

សូមរំឮកថាការប្រើប្រាស់ប្រាក់រៀល ដើម្បីមោទនភាពជាតិ អធិបតេយ្យភាពជាតិ មិនអាចធ្វើទៅបានដោយមិនមានវិធានការអ្វីសោះនោះទេ។ ហើយវិធានការអ្វីក៏ដោយធ្វើហើយ នឹងមានអ្នកទទួលផលច្រើន និងទទួលផលតិច ទទួលផលភ្លាមៗ និងទទួលផលនា ពេលក្រោយ។ ហើយបើចាំឱ្យទទួលប្រយោជន៍បានស្មើៗគ្នា គឺមិនអាចទៅរួចទេ ត្រូវគិតប្រយោជន៍រួមជាធំ។ តែបើមានជួយប្រាប់ផង។ សូមឱ្យការស្រលាញ់លុយរៀល ការស្រលាញ់ជាតិ ចេញពីទឹកចិត្តពិត និងសកម្មភាពជាក់លាក់ កុំឱ្យចេញតែពីមាត់។

អត្ថបទ៖ ពៅ រក្សា

អត្ថបទពេញនិយម