ត្រឹមរយៈពេល១ខែប៉ុណ្ណោះ ជីវិតនឹងប្រសើឡើង បើអ្នកអនុវត្តទម្លាប់ ៨ យ៉ាងនេះ

2020-05-07 07:00:00
ចំនួនមតិ 0 | ចំនួនចែករំលែក 0

ទម្លាប់ប្រចាំថ្ងៃអាចកំណត់ប្រភេទនៃមនុស្សបាន។ ជាមធ្យមមនុស្សយើង ត្រូវការរយៈពេលចន្លោះចាប់ពី ២០-៣០ ថ្ងៃ ដើម្បីសម្របខ្លួនទៅនឹងទម្លាប់ថ្មី។ ហេតុនេះហើយទើបបានជាអ្នកត្រូវចាប់ផ្តើមចេញពីរឿងតូចៗ ដែលតែងតែធ្វើជាប្រចាំជាមុនសិន នោះអ្នកនឹងបានឃើញពីភាពរីកចម្រើន ចំណុចវិជ្ជមាន ជីវិតប្រែជាប្រសើរឡើងត្រឹមរយៈពេល១ខែតែប៉ុណ្ណោះ។

១. ធ្វើអ្វីដែលអ្នកស្រលាញ់ចូលចិត្តឲ្យបានយ៉ាងហោចណាស់១ម៉ោងក្នុងមួយថ្ងៃ

រូបតំណាង

ចំណាយពេល១ម៉ោង ដើម្បីផ្គាប់តាមបេះដូង ធ្វើរឿងណាដែលអ្នកយល់ថាខ្លួនឯងស្រលាញ់ចូលចិត្តបំផុត ដូចជាដើរស្រូបរកខ្យល់អាកាស លេងកីឡា អានសៀវភៅ មើលរឿងជាដើម។ ទម្លាប់សាមញ្ញទាំងនេះ អាចជួយឲ្យអារម្មណ៍ស្រស់ស្រាយ កាត់បន្ថយទុក្ខកង្វល់ និងកាន់តែមានកម្លាំងថាមពលសម្រាប់ជីវិតថ្ងៃនេះនិងថ្ងៃស្អែក។

២. មានទឹកចិត្តល្អ

មានចិត្តទូលាយ មានសណ្តានចិត្តល្អ ចំពោះមនុស្សជុំវិញខ្លួន ឬសូម្បីចំពោះមនុស្សមានចិត្តចង្អៀតក៏ដោយ។ ព្យាយាមបន្តភាពស្មោះត្រង់ ការគោរពឲ្យតម្លៃចំពោះអ្នកដទៃ។ ធ្វើបែបនេះមិនមែនត្រឹមតែចង់ទទួលបានពាក្យសរសើរ ឬល្អមើលតែសំបកក្រៅនោះទេ ប៉ុន្តែវាជាការហ្វឹកហាត់ចិត្តគំនិតផ្ទាល់ខ្លួន ឲ្យស្រស់ថ្លាបរិសុទ្ធចេញពីខាងក្នុង។ បើអ្នកអាចអនុវត្តបានជាប់ ក្នុងរយៈពេល១ខែ ទឹកចិត្តល្អនឹងកាន់តែរីកលូតលាស់នៅក្នុងខ្លួនរបស់អ្នក។

រូបតំណាង

៣. រក្សាគំនិតវិជ្ជមានឲ្យបានខ្ជាប់ខ្ជួន

បុគ្គលជោគជ័យភាគច្រើនជាមនុស្សប្រកបដោយគំនិតសុទិដ្ឋិនិយម។ ពួកគេតែចេះរៀបចំផែនការ ពង្រឹងសមត្ថភាព បង្កើនភាពរីករាយ និងបណ្តុះគំនិតច្នៃប្រឌិតថ្មីៗ។ ស្ថានភាពលំបាកមិនមែនជាឧបសគ្គឡើយ សំខាន់ឲ្យតែអ្នកអាចរក្សាគំនិតវិជ្ជមានឲ្យបានខ្ជាប់ខ្ជួន អ្នកនឹងមើលឃើញពីជម្រើសត្រឹមត្រូវ និងដំណោះស្រាយជាច្រើន ដើម្បីជៀសពីបញ្ហា។

៤. រៀនរស់នៅដោយក្តីរីករាយ

ស្តាប់ទៅដូចជាមិនមែនងាយស្រួលធ្វើទេ ប៉ុន្តែស្របពេលដែលជីវិតកំពុងតែឆ្ពោះទៅមុខពីមួយថ្ងៃទៅមួយថ្ងៃ មានមនុស្សជាច្រើនខំរត់តាមយ៉ាងដង្ហក់ ដោយភ្លេចចាប់អារម្មណ៍ក្រឡេកមើលនូវទិដ្ឋភាពស្រស់ត្រកាលជុំវិញខ្លួន។ ទម្រាំអាចរកឃើញកំណប់ធំនាពេលអនាគត អ្នកពិតជាហត់នឿយខ្លាំងណាស់ ដូច្នេះគួរចេះសប្បាយរីករាយជាមួយពេលបច្ចុប្បន្ន ដែលអ្នកកំពុងតែមានក្នុងដៃស្រាប់ កុំឲ្យកន្លងផុតទៅទទេៗឥតន័យ។

រូបតំណាង

៥. ស្កប់ស្កល់នឹងអ្វីដែលទទួលបាន

ដរាបណាអ្នកចេះស្កប់ស្កល់ ពេញចិត្តនូវអ្វីដែលខ្លួនទទួលបានមិនថាតូចឬធំក្តី ប្រៀបបានដូចជាអ្នកបន្ថែមពណ៌ចម្រុះស្រស់ស្រាយសម្រាប់ជីវិត។ ជារៀងរាល់ព្រឹក ក្នុងរយៈពេល១ខែនេះ អ្នកអាចកត់ត្រានូវរឿង៥យ៉ាង ដែលជាស្នាដៃសមិទ្ធផលផ្ទាល់ខ្លួន ដើម្បីជំរុញកម្លាំងចិត្តឲ្យធ្វើរឿងល្អៗបន្តបន្ទាប់។

៦. ព្យាយាមឈប់កុហកខ្លួនឯង ក្នុងអំឡុងពេល ៣០ថ្ងៃនេះ

រូបតំណាង

ពាក្យកុហក គ្រាន់តែជាលេស ដើម្បីបោកបញ្ឆោតខ្លួនឯងតែប៉ុណ្ណោះ។ វាក៏ជាអាវុធដ៏សាហាវ ដែលអាចសម្លាប់អ្នកឲ្យនៅជាប់ផុងជាមួយទម្លាប់អាក្រក់ៗ។ ដូចជាពេលដែលអ្នកសន្យានឹងខ្លួនឯងថា ឈប់ខ្ជិល ត្រូវខំរៀន ត្រូវរៀបចំបន្ទប់ លែងខូចចិត្ត...ប៉ុន្តែនៅតែធ្វើមិនបាន មិនព្រមផ្លាស់ប្តូរ គ្រប់យ៉ាងក៏គ្មានថ្ងៃប្រសើរឡើងដែរ។ ឈប់បន្តកុហកបោកប្រាស់ខ្លួនឯងទៀតទៅ ត្រូវតាំងចិត្តមោះមុត ពង្រឹងស្មារតី ជំនួសមកវិញដោយទម្លាប់ល្អៗ។

៧. អានសៀវភៅឬមើលរឿងណាដែលអាចជួយលើកទឹកចិត្ត

នេះគឺជាគន្លឹះដ៏មានថាមពលខ្វះពុំបាន ព្រោះការអានសៀវភៅឬមើលរឿងណាដែលអាចផ្តល់កម្លាំងចិត្តឲ្យអ្នក ប្រៀបបានដូចជាអ្នកបានផ្តល់ចំណីអាហារដែលមានសារជាតិចិញ្ចឹមៗល្អសម្រាប់ខួរក្បាលដូច្នោះដែរ។ ជាពិសេសអ្នកនឹងអាចបង្កើនចំណេះដឹង កាន់តែច្រើន អាចយកវាមកអនុវត្តឬធ្វើជាដំណោះស្រាយសម្រាប់ជីវិតរស់នៅប្រចាំថ្ងៃផងដែរ។

រូបតំណាង

៨. ហាត់ប្រាណឲ្យបាន១០នាទីរាល់ថ្ងៃ

១០នាទីស្តាប់ទៅដូចជាតិចមែន តែបើអ្នកអាចអនុវត្តរាល់ថ្ងៃ វាប្រសើរជាងមិនបានធ្វើសូម្បី១នាទី។ រាងកាយនឹងបានបញ្ចេញជាតិពុល មានភាពរឹងមាំ មានសុខភាព និងធ្វើឲ្យអារម្មណ៍ស្រស់ថ្លាផងដែរ៕

ចុចអានបន្ត៖ ប្រជ្រុយនាំលាភ ៨ ទីតាំងនៅលើរាងកាយ ដែលអ្នកមិនគួរកាត់ចេញឡើយ

ប្រភព៖ Beautyandtips ប្រែសម្រួល៖ ដេត ឈុនអ៉ី