គួរគិតឡើងវិញ! បើនៅលីវយូរឆ្នាំ មិនហ៊ានទទួលយកស្នេហាព្រោះតែខ្លាចការបែកបាក់

2020-04-21 05:40:00
ចំនួនមតិ 0 | ចំនួនចែករំលែក 0

កាលនៅពីក្មេងមិនទាន់ដឹងក្តី ទទួលស្គាល់ថាការមិនប្រឡូកប្រឡាក់ជាមួយស្នេហា វាជារឿងត្រឹមត្រូវ។ ពេលឈានចូលដល់វ័យខ្ទង់២០ឆ្នាំ ខ្ញុំនៅតែមិនខ្វល់ខ្វាយពីស្នេហាដដែល ព្រោះខ្ញុំឲ្យតម្លៃលើលើការសិក្សា និងកិច្ចការផ្ទាល់ខ្លួនច្រើនជាង។ ឥលូវនេះចូលដល់វ័យជាង២០ឆ្នាំហើយ នៅក្នុងចិត្តគិតចង់មានស្នេហាខ្លះដែរ តែខ្ញុំនៅភ័យខ្លាចច្រើនណាស់។ ខ្ញុំបានឃើញមិត្តភ័ក្តិ បងស្រី និងមនុស្សនៅជុំវិញខ្លួន ធ្លាប់ឈឺចាប់ ខូចចិត្ត ដោយសារស្នេហា ទើបមិនហ៊ានបើកបេះដូងសាកល្បងទទួលយកនរណាម្នាក់ ។ រហូតមានថ្ងៃមួយពួកគាត់បាននិយាយប្រាប់ខ្ញុំ "កុំរំពឹងទុកថាស្នេហាដំបូងអាចនឹងឋិតថេរជារៀងរហូត កុំខ្លាចការបែកបាក់ ព្រោះវាជាបទពិសោធន៍ដ៏ល្អ និងជាការបើកផ្លូវឲ្យខ្លួនឯង ដើម្បីជួបស្នេហាពិតដូចជាពួកគាត់សព្វថ្ងៃនេះ។"

រូបតំណាង

ក្រោយបែកបាក់ស្នេហា សម្ងំកើតទុក្ខ ទឹកភ្នែកហូរទប់មិនឈ្នះជារឿងធម្មតា សំខាន់អ្វីដែលត្រូវធ្វើបន្ទាប់ គឺជូតទឹកភ្នែកចេញឲ្យអស់ ឈរឲ្យមាំ ញញឹមឲ្យស្អាត។ បើធ្វើបានពិតមែន បញ្ជាក់ថាអ្នកជាមនុស្សរឹងមាំ អាចជម្នះក្តីឈឺចាប់គ្រប់យ៉ាង ហើយទោះបីមានលើកក្រោយម្តងទៀត ការឈឺចាប់នឹងត្រូវកាត់បន្ថយច្រើន មិនខ្លាំងក្លាដូចជាពេលដំបូងឡើយ ព្រោះអ្នកបានចាត់ទុកវាជាបញ្ហាសាមញ្ញ ដែលអ្នកមានស្នេហាទាំងអស់មិនអាចគេចផុត។

រូបតំណាង

មួយវិញទៀត អ្នកអាចរៀនពីកំហុសដែលបានសាងជាមួយស្នេហាចាស់ ដើម្បីយកមកកែប្រែឲ្យល្អប្រសើរជាមួយដៃគូថ្មី នោះអ្នកនឹងស្វែងយល់កាន់តែច្បាស់ និងអាចការពារមិនឲ្យបញ្ហាកើតឡើងដោយដើរតាមដានចាស់ដដែលៗនោះទេ។

អ្នកដឹងអត់ថា ការបែកបាក់ស្នេហា អាចធ្វើឲ្យអ្នកចេះសង្កេតមើលចរិតមនុស្សបានល្អជាងមុន។ គ្រាន់តែសម្លឹងឃើញកាយវិការ ស្តាប់ពាក្យសម្តី ក៏អាចវាយតម្លៃថាម្នាក់នោះ ជាមនុស្សប្រភេទណាដែរ។ អ្នកបានបង្រៀនខ្លួនឯងដោយមិនដឹងខ្លួន ពីវិធីសាស្រ្តត្រឹមត្រូវ ក្នុងការជ្រើសរើសមនុស្ស។ បន្ទាប់ពីជួបរឿងរ៉ាវឈឺចាប់ អ្នកនឹងស្រលាញ់ឲ្យតម្លៃខ្លួនឯងកាន់តែច្រើន មានគំនិតចាស់ទុំ មានហេតុផល លែងពុះកញ្ជ្រោលខ្លាំងដូចគ្រាដំបូង។

រូបតំណាង

កាលណាបែកហើយបែកទៀត រហូតបានជួបមនុស្សថ្មី ដែលស័ក្តិសមស្រលាញ់គ្នាគ្មានព្រំដែន អ្នកនឹងបន្តទំនុកចិត្ត ជឿជាក់ថាស្នេហាពិត គឺមានមែនលើលោកនេះ ហើយថែមទាំងចង់ចែករំលែក បទពិសោធន៍ដ៏ល្អ ទៅកាន់អ្នកដែលលីវនៅយូរទាំងអស់គ្នា ត្រូវក្លាហាន បើកចិត្តឲ្យទូលាយ ហ៊ានប្រឈមនឹងការបែកបាក់ រៀនមើលមនុស្សឲ្យបានច្រើន មុនជ្រើសរើសជាគូជីវិត ដើម្បីកុំឲ្យមានវិប្បដិសារី ៕