ផ្តើមចេញពីក្មេងស្រីដែលធ្លាប់តែអៀនខ្មាសច្រើន រហូតក្លាយជាសហស្ថាបនិកនៃសហគ្រាសសង្គម រួមទាំងស្នាដៃជាច្រើនទៀត
- 2020-03-23 06:20:00
- ចំនួនមតិ 0 | ចំនួនចែករំលែក 0
ផ្តើមចេញពីក្មេងស្រីដែលធ្លាប់តែអៀនខ្មាសច្រើន រហូតក្លាយជាសហស្ថាបនិកនៃសហគ្រាសសង្គម រួមទាំងស្នាដៃជាច្រើនទៀត
កញ្ញា អៀង លីនដា ដែលធ្លាប់ជាក្មេងស្រីម្នាក់ មានភាពអៀនខ្មាសច្រើន តែនាងបានជម្នះវា តាមរយៈការពង្រឹងសមត្ថភាពដោយការខិតខំរៀនសូត្រយកចំណេះដឹងដាក់ខ្លួន ដោយការចូលរួមការងារស្ម័គ្រចិត្ត និងដោយការចូលរួមកម្មវិធីប្រកួតប្រជែងនានា រហូតបានក្លាយខ្លួនជាជ័យលាភីក្នុងកម្មវិធីជជែកតទល់មួយមានឈ្មោះថា “អ្នកបន្តវេន” ។
ភាពប៉ិនប្រសប់ផ្នែកវោហារសព្ទ ដេញដោលតស៊ូមតិ បានធ្វើឲ្យកញ្ញា លីនដា ឈ្នះនូវការប្រកួតមួយចំនួនផ្សេងទៀតនៅក្នុងស្រុក រួមទាំងការប្រកួតថ្នាក់តំបន់មួយនៅប្រទេសចិន ជាមួយយុវជនអាស៊ាន។ នាងត្រូវបានគេអញ្ជើញទៅទស្សនកិច្ចសិក្សានៅ សហរដ្ឋអាមេរិក ២ដង គឺនៅឆ្នាំ២០១៤ និងឆ្នាំ២០១៥ អំពីភាពជាអ្នកដឹកនាំរបស់យុវជននិងការងារស្ម័គ្រចិត្ត។
នាងក៏ត្រូវបានគេបោះឆ្នោតជាប្រធានសភានិស្សិតនៃសកលវិទ្យាល័យបញ្ញាសាស្រ្តកម្ពុជាក្នុងឆ្នាំ២០១៥ផងដែរ។ បច្ចុប្បន្ននេះ កញ្ញា អៀង លីនដា គឺជាសហស្ថាបនិកនៃសហគ្រាសសង្គម LIFE Group ដែលជាកន្លែងមួយផ្តល់ការបណ្ដុះបណ្តាលជំនាញទន់ ជួយផលិតវីដេអូដើម្បីឲ្យគេស្គាល់ពីសេវាកម្មនិងផលិតផលល្អៗ ព្រមទាំងរៀបរៀងនិងចែកចាយសៀវភៅល្អៗផងដែរ។
បើនិយាយពីផលលំបាកដែលបានឆ្លងកាត់ទម្រាំដើរមកដល់ចំណុចដូចសព្វថ្ងៃ យុវនារីពោរពេញដោយសមត្ថភាពរូបនេះ បានរៀបរាប់ប្រាប់មកកាន់វិបសាយ "កញ្ញា” ថា "នរណាក៏ជួបការលំបាកដែរក្នុងជីវិតជៀសមិនផុតនោះទេ។ ពេលខ្លះយើងអាចគិតថា គេប្រហែលជាគ្មានការលំបាកអ្វីសោះ តែតាមពិត គេអាចឆ្លងកាត់ការលំបាកជាច្រើនដែលយើងមើលមិនឃើញ។"
កញ្ញាបន្តទៀតថា "ចំពោះខ្ញុំ ខ្ញុំឆ្លងកាត់ការលំបាកដែលស្រដៀងនឹងយុវតីផ្សេងទៀតក្នុងជំនាន់នេះដែរ ដោយខ្ញុំធ្លាប់ជាក្មេងស្រីដែលមិនមានទំនុកចិត្តលើខ្លួនឯង ត្រូវបានអ្នកដទៃមើលងាយមិនឲ្យតម្លៃ មិនស្គាល់ខ្លួនឯងជាដើម តែខ្ញុំតែងតែអរគុណចំពោះរាល់ការលំបាកទាំងឡាយដែលខ្ញុំបានឆ្លងកាត់ ព្រោះវាបានធ្វើឲ្យខ្ញុំក្លាយខ្លួនជាមនុស្សម្នាក់ដែលកាន់តែរឹងមាំជាងមុន។ ការលំបាកគឺជាផ្នែកមួយដែលធ្វើឲ្យជីវិតខ្ញុំកាន់តែមានន័យ អ្វីដែលសំខាន់គឺយើងត្រូវរៀនសូត្រពីការលំបាកដែលយើងបានឆ្លងកាត់ទុកជាបទពិសោធទៅថ្ងៃក្រោយ។"
លទ្ធផលផ្លែផ្កាដែលទទួលបាន សុទ្ធសឹងចេញមកពីការខិតខំប្រឹងប្រែង រួមទាំងចំណេះវិជ្ជាដែលពុំអាចខ្វះបាន។ ហេតុនេះហើយទើបបានជា សហស្ថាបនិក អៀង លីនដា ចូលរួមលើកទឹកចិត្តឲ្យស្រ្តីគ្រប់រូប ពុះពាររាល់ឧបសគ្គដើម្បីបានរៀនសូត្រខ្ពង់ខ្ពស់ អាចសម្រេចគោលដៅដែលខ្លួនប៉ងប្រាថ្នា។ លើសលពីនេះទៅទៀត ចំណេះវិជ្ជាជួយឲ្យស្ត្រីមើលឃើញពិភពលោកធំជាងមុន អាចចាប់យកឱកាសនិងមានជម្រើសកាន់តែច្រើននៅក្នុងជីវិត ជាពិសេសអាចប្រើប្រាស់សក្តានុពលរបស់ខ្លួន ដើម្បីចូលរួមចំណែកជួយគ្រួសារ សង្គមជាតិ និងពិភពលោកទាំងមូលឲ្យកាន់តែល្អប្រសើរ។
យ៉ាងណាមិញការរៀនសូត្រមិនមែនមានតែនៅក្នុងសាលានោះទេ គឺអាចរៀនសូត្របាននៅគ្រប់ទីកន្លែង គ្រប់ពេលវេលា។ អ្នកអាចករៀនសូត្រពីជីវិត ពីអ្នកនៅជុំវិញខ្លួន ពីធម្មជាតិ ពីការអាន ការសរសេរ ការអនុវត្ត ការមើល ការសង្កេត និងការត្រិះរិះពិចារណាផ្សេងៗ។ ការរៀនសូត្រមិនចេះចប់ បូកផ្សំនឹងការអភិវឌ្ឍខ្លួន (self-improvement) ជាផ្នែកមួយដែលជួយឲ្យជីវិតកាន់តែល្អប្រសើរជាងមុន៕
ចុចអាបបន្ត៖ គួរឲ្យសរសើរ! ប្រវត្តិស្រ្តីឆ្នើមផ្នែកសុខាភិបាល លោកជំទាវ ឱ វណ្ណឌីន