ស្រីៗយើង អ្នកណាមិនចង់បាន! វិថីជីវិត ឱក សុគន្ធកញ្ញា មកដល់ពេលនេះ អ្វីក៏មានមិនខ្វះដែរ!

2020-01-15 04:21:00
ចំនួនមតិ 0 | ចំនួនចែករំលែក 0

ឱក សុគន្ធកញ្ញា បានលាជីវិតខ្លួនមួយ ក្រោយបានរៀបការជាមួយប្អូនប្រុសថៅកែហង្សមាសកាលពីខែឧសភា ២០១៩ ហើយក្រោយមកនាងបង្កើតបានកូនប្រុសម្នាក់ឈ្មោះ អ៊ឹង បញ្ញាបុត្រ ហៅ "ឆលី" ជាចំណងដៃអាពាហ៍ពិពាហ៍។ មកដល់ពេលនេះ ពួកគេបានពូនផ្ដុំគ្នាជាគ្រួសារដ៏កក់ក្ដៅមួយ នៅលើវិថីជីវិតដ៏ត្រចះត្រចង់ដែលអាចនិយាយបានថា អ្វីក៏មិនខ្វះដែរ។

ដើរមកដល់ពេលនេះ គេមើលឃើញថា កញ្ញា មានសព្វអ្វីៗ ពោលគឺ ទាំងការងារ មុខរបរអាជីវកម្ម ស្វាមី ទាំងកូន និងទ្រព្យសម្បត្តិ អាចនិយាយបានថា នាងមានសម្បូរសប្បាយឥតខ្វះហើយ ខណៈអ្នកផ្សេងទៀតច្រើនអនេកនៅលើលោកដ៏ធំធេងនេះ នៅខ្វះភ័ព្វវាសនានៅឡើយ។ ក្រៅពីការងារសិល្បៈ តាមសាមីខ្លួនប្រាប់ នាងមានអាជីវកម្មលក់ និងចែកផលិតផលថែរក្សាសម្រស់ម៉ាក "ASK" ដែលជាឈ្មោះរបស់នាងតែម្ដង។

ក្រៅពីការបង្ហើបខាងលើ សុគន្ធកញ្ញា ត្រូវបានគេដឹងថា នាងមាននាំចូលផលិតផលកាបូប កំប៉ុងទឹកក្ដៅដែលប្រើឈ្មោះរបស់នាងជា Brand ថែមទៀត ដែលទាំងនេះ កាន់តែធានាភាពរឹងមាំនៃជីវភាពរបស់នាង ស្របពេលដែលគេដឹងថា ចំណូលពីសិល្បៈរបស់នាង ក៏ក្រាស់ក្រែលរួចទៅហើយ។ តាមព័ត៌មានស្ដីពីការប៉ាន់ស្មានចំណូលប្រចាំឆ្នាំរបស់ សុគន្ធកញ្ញា គឺនាងអាចរកចំណូលពីការងារសិល្បៈមិនតិចជាង ២០ម៉ឺនដុល្លារអាមេរិកឡើយក្នុង១ឆ្នាំៗ។

ការប៉ាន់ប្រមាណនេះ ដោយផ្អែកលើការងារធំរបស់នាង ដូចជាការងារជាអ្នកតំណាងផលិតផលមួយចំនួន ដូចជាផលិតផលទូរស័ព្ទ Hauwei, នូទ្រីលៀត និងផលិត ក៏ដូចជាក្រុមហ៊ុនមួយចំនួនទៀត ដែលការងារនេះ តាមព័ត៌មាន នាងស៊ីថ្លៃកុងត្រា ខ្ទង់ពី ៦-៨ម៉ឺនដុល្លារអាមេរិកសម្រាប់កិច្ចសន្យាការងារ១ឆ្នាំ។ នេះមិនទាន់គិតការងារសិល្បៈរាំច្រៀងរបស់នាង និងការងារចូលរួមជាកិត្តិយសសម្ពោធផលិតផល ឬក្រុមហ៊ុននានាផង។

ការងារទាំងនោះ កញ្ញា ត្រូវបានគេដឹងថាមានថ្លៃពលកម្មខ្ទង់ជាង ៣០០០ដុល្លារអាមេរិក ហើយ១ខែៗ នាងមានមុខលើខុនសឺត និងកម្មវិធីក្រុមហ៊ុននានាមិនដាច់។ ដូច្នេះហើយ តួលេខប៉ាន់ប្រមាណពីចំណូលប្រចាំឆ្នាំរបស់តារាស្រី គឺអាចថាមិនខុសឡើយ។ សំខាន់ជាងនេះ ការចាប់ផ្ដើមជីវិតគូជាមួយលោក អ៊ឹង សុខលី ប្អូនប្រុសថៅកែហង្សមាសកាលពីពាក់កណ្ដាលឆ្នាំ ២០១៩ រឹតតែធ្វើឲ្យនាងសម្បូរសប្បាយលើសដើម។

ប៉ុន្តែមិនទាន់អស់នៅឡើយ គឺនៅមានរបស់ដ៏សំខាន់បំផុតមួយទៀតមិនអាចខ្វះបាននៅក្នុងសង្គមគ្រួសារ ដែលពេលនេះ ក៏ កញ្ញា បាន និងកំពុងមានវាដែរនោះ គឺ "ក្ដីស្រឡាញ់"។ ចំណុចនេះ កញ្ញា ត្រូវបានគេមើលឃើញថា នាងនៅតែមានសំណាងលើសគេ ព្រោះបានលោក អ៊ឹង សុខលី ដែលល្បីធ្លាប់មានទំនាក់ទំនងជាមួយតារាស្រីៗជាច្រើននោះ មកធ្វើជាស្វាមីពេញច្បាប់ រៀបការយ៉ាងអធិកអធមក្នុងប្រវត្តិសាស្ត្រថ្ងៃមង្គលរបស់សិល្បករ។

សំខាន់បំផុត តាមព័ត៌មាន គឺប្អូនប្រុសថៅកែហង្សមាសរូបនេះ ស្រឡាញ់ យកចិត្តទុកដាក់ និងថ្នាក់ថ្នមនាងខ្លាំងថែមទៀត។ ចំណុចផ្សេងទៀត ដែលកត់សម្គាល់បាន គឺជារឿយ កញ្ញា បានបង្ហាញឲ្យឃើញពីជីវិតកក់ក្ដៅបាន និងកំពុងមាននៅក្នុងគ្រួសារថ្មីថ្មោងរបស់នាង តាមរយៈរូបថតអនុស្សាវរីយផ្អែមល្ហែមជាច្រើនទាំងក្នុង និងក្រៅស្រុក។ ពិសេស គឺប្រសូតបានបុត្រដ៏គួរស្រឡាញ់ម្នាក់ដែលពេលនេះទើបមានវ័យជាង ២ខែ ឈ្មោះហៅក្រៅថា "ឆលី" នោះ រឹតតែធ្វើឲ្យពួកគេលង់ក្នុងក្ដីស្រឡាញ់ក្នុងសង្គមគ្រួសាររបស់ពួកគេ។

ចំណុចនេះ កញ្ញា បានបង្ហើបដែរថា នៅពេលមានកូន អ្វីៗទាំងអស់គឺដើម្បីកូន ពោលគឺនាង និងស្វាមី អាចកាត់ពេលធ្វើកិច្ចការនានា ពេលផ្ទាល់ខ្លួនទាំងអស់ យកពេលមើលថែកូនជាមួយគ្នា។ "យើងទាំងពីរនាក់ មើលកូនតែពីរនាក់ដោយខ្លួនឯង ព្រោះពួកយើងចង់សាកល្បងជីវិតជាឪពុកជាម្ដាយគេដោយផ្ទាល់...អីចឹងហើយអ្វីក៏អាចលះបង់ដែរ សូម្បីតែការងារក៏ដោយ...ខ្ញុំចង់និយាយថា ការងារសុំច្បាប់គេឈប់បាន ប៉ុន្តែរឿងកូន មិនអាចសុំច្បាប់នោះទេ"។ កញ្ញា ថ្លែង។

រឿងដ៏មង្គលមួយរបស់គ្រួសារត្រកូល "អ៊ឹង" សម្រាប់ដើមឆ្នាំ ២០២០ នេះ គឺពួកគេទើបនឹងបានសម្រេចសមិទ្ធផលធំធេងរួមគ្នាថែមទៀត ដោយកញ្ញា និងកូន ត្រូវបានជ្រើសជាអ្នកតំណាងផលិតផល នូទ្រីលេត ដែលតាមព័ត៌មានក្រៅផ្លូវការ ពួកគេទទួលថ្លៃពលកម្មដល់ទៅប្រមាណ ២០ម៉ឺនដុល្លារអាមេរិកឯណោះ សម្រាប់កិច្ចសន្យាការងាររយៈពេល ៣ឆ្នាំ។ វេលានោះ គេឃើញលោក អ៊ឹង សុខលី បីឱបកូនប្រុសចូលមក ពេញដោយស្នាមញញឹម និងភាពកក់ក្ដៅ៕