៥ យ៉ាង បង្ហាញថាអ្នកអាចបើកបេះដូងសាជាថ្មី បន្ទាប់ពីឈឺចាប់អស់រយៈពេលជាយូរ

2019-12-11 10:00:00
ចំនួនមតិ 0 | ចំនួនចែករំលែក 0

ពាក្យថា "ស្នេហា" តែងមានលាយឡំជាមួយនឹងភាពត្រេកត្រអាលសប្បាយរីករាយ និងក្តីឈឺចាប់។ សម្រាប់អ្នកដែលធ្លាប់បានឆ្លងកាត់បទពិសោធន៍ស្នេហាកន្លងមក ច្បាស់ជាដឹងហើយថាវាមិនមែនជារឿងងាយស្រួលនោះទេ។ រីឯអ្នកធ្លាប់ជួបវិបត្តិស្នេហាខូចចិត្តវិញ រឹតតែច្បាស់ទៀតថា វាពិតជាពិបាក ក្នុងការបើកចិត្តទទួលយកនរណាម្នាក់ម្តងទៀត។ យ៉ាងណាក៏ដោយ កុំបារម្ភខ្វល់ខ្វាយច្រើនពេក។ បន្ទាប់ពីបណ្តោយឲ្យបេះដូងស្ថិតក្នុងភាពឈឺចាប់អស់រយៈពេលជាយូរ ដល់ដំណាក់កាលចាប់ផ្តើមសារថ្មីបានហើយ ប្រសិនបើអ្នកសង្កេតឃើញថាខ្លួនឯងមានសញ្ញា ៥ យ៉ាងនេះ។

អតីតកាលគ្មានសមត្ថភាពធ្វើឲ្យអ្នកកើតទុក្ខក្រៀមក្រំដូចមុន

ទុក្ខសោក វិប្បដិសារីរួមទាំងក្តីឈឺចាប់រាប់មិនអស់ នាពេលអតីតកាល បានអណ្តែតរសាត់លេចបាត់ទៅ លែងនៅជាមួយអ្នកតទៀត។ ពេលខ្លះអ្នកគ្រាន់តែនឹកឃើញដល់បញ្ហាចាស់ៗ និងចង់រៀនយល់ពីវាបន្ថែមតែប៉ុណ្ណោះ ហើយអ្នកក៏មិនអនុញ្ញាតឲ្យភាពក្រៀមក្រំ ចូលមកគ្របដណ្តប់បានដូចមុនដែរ។ នេះមានន័យថា វាក៏ពេលវេលាមួយ ដែលស័ក្តិសមក្នុងការ ទទួលយកទំនាក់ទំនងស្នេហាថ្មីបានហើយ។

មិនខ្លាចក្នុងការប្រើជីវិតរស់នៅម្នាក់ឯង

អ្នកគ្មានអារម្មណ៍ថាសោកសៅឯកោ ទោះបីជាគ្មានគូនឹងគេ ឬត្រូវរស់នៅម្នាក់ឯងក៏ដោយ។ អ្នកមានភាពឯករាជ្យ អាចទៅណាមកណាដោយខ្លួនឯង ធ្វើអ្វីៗបានដោយខ្លួនឯង និងគ្មានបំណងចង់ទាក់ទងនរណាម្នាក់ ដើម្បីកំដរបំបាត់អផ្សុកឡើយ។

មិនគិតថាស្នេហាជារឿងចាំបាច់ ប៉ុន្តែធ្វើតាមបេះដូងច្រើនជាង

មិនមែនឲ្យតែពេលទាក់ទងគ្នា អ្នកត្រូវតែដាក់ចិត្តដាក់កាយស្រលាញ់អស់ពីថ្លើមប្រមាត់ នោះទេ ប៉ុន្តែយ៉ាងហោចណាស់ ក៏ត្រូវមានចិត្តមានមនោសញ្ចេតនាលើគ្នា ដោយមិនបង្ខំបេះដូង ឬគិតខ្វល់ខ្វាយពីសម្ដីអ្នកដទៃច្រើនជាងដែរ។

គ្មានសម្ពាធពេលឃើញអ្នកដទៃផ្អែមល្ហែមជាមួយគ្នា

ពេលឃើញអ្នកដទៃកាន់ដៃស្និទ្ធស្នាល មានភាពរ៉ូមែនទិកជាមួយគ្នា ប៉ុន្តែអ្នកមានអារម្មណ៍ធម្មតាៗ មិនត្រេកត្រអាលច្រណែន ឬចង់មានដៃគូដូចជាគេដែរ។ វាជាសញ្ញាមួយបញ្ជាក់ថា អ្នកមានគំនិតចាស់ទុំជាងមុន ចេះគិតគូរដោយហេតុផល និងមិនវាយតម្លៃតែសំបកក្រៅ។

អាចបត់បែននិងរក្សាលំនឹងខ្លួនឯងបានល្អ

អ្នកចេះសម្របខ្លួនបានល្អជាងមុន និងដឹងពីរបៀបការពារខ្លួនឲ្យមានលំនឹង មិនផុងជាប់នឹងក្តីឈឺចាប់ដូចជាពេលអតីតកាល។ ដរាបអ្នកចេះត្រៀមខ្លួន និងសង្កេតឃើញសញ្ញាដែលរៀបរាប់ខាងលើ មានន័យថា អ្នកពិតជាអាចចាប់ផ្តើមម្តងទៀតបានហើយ៕