មនុស្សស្រីមានសង្សារ ឬ ប្តីហើយ គួររាប់អានមិត្តភ័ក្តប្រុសអត់?
- 2019-11-25 04:20:00
- ចំនួនមតិ 0 | ចំនួនចែករំលែក 0
មនុស្សស្រីមានសង្សារ ឬ ប្តីហើយ គួររាប់អានមិត្តភ័ក្តប្រុសអត់?
មានមតិជាច្រើនដែលនិយាយថា មនុស្សស្រីដែលមានសង្សារ ឬ ប្តីហើយ មិនគួរមានមិត្តភ័ក្តប្រុសនោះទេ។ តើហេតុផលអ្វីខ្លះដែលធ្វើឱ្យពួកគេមានគំនិតបែបនេះ ? អាចមកពីខ្លាចភាគីដែលជាដៃគូរបស់នាងប្រចណ្ឌ ឬ ខ្លាចពាក្យសម្តី និង កែវភ្នែករបស់អ្នកដទៃ។ បើអ្នកយកហេតុផលទាំងអស់នោះមកគិត វាអាចស្តាប់ទៅអាចទទួលយកបាន តែបើសួរថាហេតុផលទាំងអស់នោះវាសំខាន់ខ្លាំងដល់ថ្នាក់ ត្រូវផ្តាច់ការទាក់ទងជាមួយមិត្តភ័ក្តដែលធ្លាប់រាប់អានគ្នា ឬ មិត្តថ្មីដែលអ្នកមានបំណងនឹងរាប់អានដែរឬទេ?
ស្នេហាមិនមែនជាអ្វីគ្រប់យ៉ាងនោះទេ ពេលខ្លះនារីគ្រាន់តែចង់មានមនុស្សដែលខ្លួនស្រឡាញ់ផង និងអាចមានសិទ្ធរាប់អានគេឯងផង ដូចធម្មតា។ បើគ្រាន់តែមានស្នេហា ហើយធ្វើឱ្យនាងត្រូវលះបង់មិត្តភ័ក្តចោលអស់នោះ ម្ល៉ោះវាហាក់បីដូចជាស្នេហានោះបានផ្តល់សំពាធឱ្យនាងខ្លាំងពេក។ មួយវិញទៀត ការស្រលាញ់ត្រូវផ្តល់ភាពជឿជាក់ និង សេរីភាពដល់គ្នាទើបភាគីទាំងសងខាងមិនទទួលរងនូវសំពាធ ហើយមានភាពរីករាយក្នុងទំនាក់ទំនងមួយនោះ។
ការដែលនារីមានមិត្តភ័ក្តប្រុស មិនមែនមានន័យថានាងជាមនុស្សស្រីមិនល្អនោះទេ។ ពេលខ្លះ មិត្តភ័ក្តប្រុសទាំងនោះ ជាមនុស្សដែលអាចជួយជ្រុមជ្រែងនាងពេលនាងត្រូវការពិភាក្សារឿងស្នេហា ឬគ្រប់ភារកិច្ចតូច ធំទាំងឡាយ ដូចដើរតូជា បងប្រុសរបស់នាងដែរ។ ជាពិសេស មនុស្សស្រីមិនដូចគ្នាទេ អ្នកខ្លះចូលចិត្តរាប់អានមិត្តភ័ក្តស្រីដូចគ្នា តែអ្នកខ្លះវិញចូលចិត្តរាប់អានមិត្តភ័ក្តប្រុសជាង ព្រោះគេយល់ថាមិត្តភ័ក្តប្រុស អាចទុកចិត្តបាននិងមិនសូវចូលចិត្តនិយាយច្រើនជាដើម។ ដូច្នេះ បើពេលអ្នកស្ថិតនៅក្នុងដំណាក់កាលសម្រេចចិត្តថា គួរបញ្ឈប់រាប់អានមិត្តភ័ក្តរបស់អ្នកឬក៏អត់ អ្នកគប្បីថ្លឹងថ្លែងចំណុចល្អ និង ចំណុចអាក្រក់នៃការរាប់អានពួកគាត់ឱ្យបានច្បាស់សិន ចៀសវាងការស្តាយក្រោយពីការបាត់បង់មនុស្សល្អជុំវិញខ្លួនដែលតែងតែនៅក្បែរអ្នក៕