យល់អារម្មណ៍មួយនេះអត់? ធ្វើយ៉ាងណាក៏នៅតែជាជម្រើសទី២សម្រាប់គេ
- 2019-11-20 10:15:00
- ចំនួនមតិ 0 | ចំនួនចែករំលែក 0
យល់អារម្មណ៍មួយនេះអត់? ធ្វើយ៉ាងណាក៏នៅតែជាជម្រើសទី២សម្រាប់គេ
ធ្លាប់មានអារម្មណ៍មួយនេះអត់? ខំធ្វើអ្វីច្រើនដើម្បីគេ តែគេមើលមិនឃើញ។ ពេលខ្លះឆ្ងល់ហើយក៏សួរខ្លួនឯងថា តើខ្ញុំធ្វើអត់គ្រប់គ្រាន់ ឬ ក៏គេអត់ត្រូវការ ? ហេតុផលអាចមានដូចជា គេមើលអត់ឃើញ គេអត់ខ្វល់ យើងអត់សំខាន់ ឬ សំខាន់ដែរតែចាញ់ម្នាក់ទៀតដែលគេយកចិត្តទុកដាក់។ តែទោះជា ហេតុផលយ៉ាងណាក៏ដោយ សំខាន់យើងអាចទ្រាំទ្រវាដល់ពេលណា? ដល់ពេលណាទៀតដែលត្រូវទទួលរងអារម្មណ៍មួយហ្នឹង? ដែលមានអារម្មណ៍ថាខ្លួនឯងតែងតែ ជាជម្រើសទី២អត់?
ពេលគេអផ្សុក ឬ ពេលមនុស្សម្នាក់ទៀតមិននៅ ទើបយើងទទួលបានការយកចិត្តទុកដាក់ពីគេ។ ជារួម នៅក្នុងរឿងស្នេហាក្តី គ្រួសារក្តី ឬ មិត្តភាពក្តី ប្រហែលជាអ្នកធ្លាប់បានឆ្លងកាត់ហើយ។ ហើយបើធ្លាប់ឆ្លងកាត់ហើយ អ្នកប្រាកដជាយល់ហើយថាវាមានអារម្មណ៍យ៉ាងណា។ ពេលខ្លះ អ្នកខំទ្រាំនៅក្នុងទំនាក់ទំនងមួយហ្នឹង ព្រោះអ្នកស្រលាញ់ មែនអត់? តែចង់ឱ្យដឹងថា ពេលខ្លះបើមានអារម្មណ៍ហត់ខ្លាំង សម្រាកខ្លះក៏ល្អដែរ មិនបាច់បង្ខំខ្លួនឯងឱ្យធ្វើរឿងដែលមិនចាំបាច់ទេ ព្រោះបើតាមដឹង ទោះអ្នកធ្វើអ្វីក៏មិនអាចយកចិត្តអ្នកដែលគេមិនសូវខ្វល់ខ្វាយពីអ្នកដែរ។
បើអ្នកដឹងថា អ្នកគ្រាន់តែជាជម្រើសទី២ នៅក្នុងចិត្តគេ យោបល់ល្អដើម្បីកុំឱ្យហត់ចិត្តតែឯងគឺ ធ្វើបែបនោះដាក់គេវិញ។ វាពិតស្រួលនិយាយតែពិបាកធ្វើបន្តិច ប៉ុន្តែបើគិតថា គេមានអ្នកក៏បាន អត់អ្នកក៏បាន នោះវត្តមានអ្នកមិនសូវមានន័យសម្រាប់គេផង ដូច្នេះអ្នកនៅទុកគេជាមនុស្សទី១ ឬ ជាមនុស្សសំខាន់ដល់ណាទៀត?
អានបន្ត៖ តើពិតទេ ដែលស្រលាញ់ត្រូវតែហួងហែង?