ក្តីស្រមៃធំ១ ជម្រុញអ្នកស្រឡាញ់ភេទដូចគ្នាម្នាក់មានជំនាញ និងចំណូលខ្ពស់ក្នុងសង្គម

2019-10-28 13:30:00
ចំនួនមតិ 0 | ចំនួនចែករំលែក 0

ចេះឲ្យប្រាកដ នោះប្រាក់នឹងរត់តាមហៅ! នេះជាបណ្ដាំព្រះភិរម្យភាសាអ៊ូ ហៅ ង៉ុយ ដែលមានតម្លៃ និងអត្ថន័យជ្រាលជ្រៅមកទល់សម័យបច្ចុប្បន្ននេះ។ មិនខុសពីមនុស្សមួយភាគធំ ពាក្យមួយឃ្លានេះ បានជំរុញឲ្យបុរសម្នាក់ ដែលជាក្រុមអ្នកស្រឡាញ់ភេទដូចគ្នា អាចបន្តក្ដីស្រមៃ និងចាប់យកការងារជាអ្នកជំនាញផាត់មុខឲ្យហាងសម្អាងការ និងតារាល្បីៗយ៉ាងស្ទាត់ជំនាញ។

រូបភាពផ្តល់ឲ្យដោយ ស៊ា ម៉េងលាង

ចំណែកការស្វែងរកប្រាក់ចំណូលក៏មានភាពល្អប្រសើរ ជាប្រចាំ ពិសេសខែមានកម្មវិធីការ គឺអាចហក់ដល់ខ្ទង់ពាន់ៗដុល្លារ (សុំមិនបង្ហាញតួលេខ) ព្រោះតែលោកមានស្នាដៃល្អ បូករួមនឹងកេរ្តិ៍ឈ្មោះ និងការងារមានការទទួលខុសត្រូវខ្ពស់។

ក្នុងកិច្ចសម្ភាសជាមួយវេបសាយ កញ្ញា លោក ស៊ា ម៉េងលាង បានប្រាប់ដោយមិនលាក់បាំងថា លោកជាក្រុមអ្នកស្រឡាញ់ភេទដូចគ្នា ហើយមានស្រុកកំណើតនៅឯខេត្តកំពង់ធំ។ លោកបានបញ្ជាក់ថា ជំនាញនេះគឺជាក្ដីស្រមៃ នៃការងារដែលលោកស្រឡាញ់បំផុតតាំងពីតូចមក ព្រោះលោកចង់ក្លាយជាអ្នកផាត់មុខល្បីឈ្មោះម្នាក់។

មុនមានការទទួលស្គាល់ស្នាដៃផាត់មុខដូចសព្វថ្ងៃ លោកបានឆ្លងកាត់ចូលរៀនវគ្គខ្លីតុបតែងសម្អាងការច្បាស់លាស់ ជាមួយក្រសួងវប្បធម៌ និងវិចិត្រសិល្បៈ ក៏ដូចជាការរៀនបន្តវគ្គខ្លីនានា ទាំងក្នុង និងនៅក្រៅប្រទេសផងដែរ។ ភាគច្រើន ដល់ខែសំបូរកម្មវិធីគឺម៉េងលាង តែងរវល់ជាប់កក់តាមកម្មវិធីសឹងគ្មានពេលសម្រាក។

រូបភាពផ្តល់ឲ្យដោយ ស៊ា ម៉េងលាង

រំលឹកដល់ប្រវត្តិគ្រួសារ លោកជាកូនកំព្រាឪពុកម្ដាយដែលបានចែកផ្លូវគ្នា តាំងតែពីលោកនៅកុមារមកម្ល៉េះ។ ដូច្នេះលោកត្រូវបន្តរស់នៅក្នុងជីវភាពក្រលំបាក ជាមួយជីដូនចាស់ម្នាក់ នៅឯស្រុកកំណើត។ ទោះជាកុមារភាពកើតមកជាកូនកំព្រា និងរស់នៅមានជីវភាពលំបាក មិនដែលបានអ្វីដូចចិត្តនឹងគេ ប៉ុន្តែ ម៉េងលាង ជាក្មេងរឹងមាំ និងមានប្រវត្តិតស៊ូជានិច្ច។

រូបភាពផ្តល់ឲ្យដោយ ស៊ា ម៉េងលាង

លោកបន្តថា ដំបូងៗមនុស្សនៅជុំវិញខ្លួនពិតជាបានរើសអើង និងមិនសូវឲ្យតម្លៃការងារ ដែលលោកស្រឡាញ់តាំងពីក្មេងនេះប៉ុន្មានទេ។ ព្រោះថានៅពេលដែលយើងនិយាយដល់ការងារផ្នែកសម្អាង មនុស្សភាគច្រើន ប្រហែលជាគិតថា នេះជាអាជីពសម្រាប់តែមនុស្សស្រី ដែលស័ក្ដិសមធ្វើ។

កាលនៅស្រុកអ្នកភូមិតែងថាឲ្យលោកថាប្រុសៗអីចឹង មិនគួរធ្វើការងារស្រីទេ។ មិនអន់ចិត្ត ឬខឹងអ្នកភូមិ ម៉េងលាង គឺគិតតែបន្តខំប្រឹងរៀនជំនាញនេះ មិនខ្វល់អ្វីច្រើននោះទេ។ លោកបញ្ជាក់ថា ម្យ៉ាងកាលនោះលោកក៏មិនទាន់ហ៊ានបើកចំហពីខ្លួនឯង ថាជាអ្នកស្រឡាញ់ភេទដូចគ្នាផងដែរ។

រូបភាពផ្តល់ឲ្យដោយ ស៊ា ម៉េងលាង

ម៉េងលាង បន្តថា ពេលនោះលោកពិតជាមានសំពាធផ្លូវចិត្តម្ដងម្កាលដែរ ប៉ុន្តែដោយសារមានជីដូនម្នាក់ជួយ ផ្ដល់កម្លាំងចិត្ត ទើបលោកអាចតស៊ូព្យាយាមតស៊ូរហូតជោគជ័យដូចសព្វថ្ងៃ។ ក្រោយពីសម្រេចក្តីស្រមៃ ចាប់ជំនាញដែលខ្លួនស្រឡាញ់ជាជាងផាត់មុខអាជីព មានចំណូលល្អ លោកក៏ចង់តបស្នងសងគុណជីដូន ឲ្យរស់នៅបានស្រួលព្រោះលោកយាយជាអ្នកមានគុណ និងជាស្រ្តីតែម្នាក់គត់ ដែលតែងចាំលើកចិត្តខ្លួនជានិច្ច។

សូមទស្សនាវីដេអូ សម្ភាសលម្អិតពីគន្លឹះតែងសម្អាង និងប្រវត្តិជីវិតមុនមានភាពជោគជ័យ។