អស្ចារ្យមែន! កូនខ្មែរបញ្ចេញស្នាដៃច្នៃម៉ូដសម្លៀកបំពាក់ បង្ហាញឲ្យពិភពលោកបានស្គាល់

2019-09-12 07:40:00
ចំនួនមតិ 0 | ចំនួនចែករំលែក 0

អ្នកនាង Natacha Van ដែលមានសញ្ជាតិជាខ្មែរ បានកើតនៅលើទឹកដីនៃទីក្រុងហុងកុង ធំដឹងក្តីនៅទីក្រុងឡុងដ៍ និងបច្ចុប្បន្នមានទីលំនៅក្នុងប្រទេសកម្ពុជា។ បន្ទាប់ពីបានបញ្ចប់ការសិក្សាផ្នែកច្នៃម៉ូដសម្លៀកបំពាក់ នៅទីក្រុងឡុងដ៍ ប្រទេសអង់គ្លេសរួចមក នាងទទួលបាននូវភាពល្បីល្បាញក្នុងចំណោមអ្នកច្នៃម៉ូដអន្តរជាតិដទៃទៀត ទាំងនៅប៉ែកអឺរ៉ុបនិងអាស៊ី។

កូនខ្មែររូបនេះ បានរៀបរាប់ប្រាប់មកកាន់គេហទំព័រ កញ្ញា ថា " ដោយសារតែខ្ញុំមានដុងផ្នែកសិល្បៈនិងចូលចិត្តថតរូបតាំងពីតូចមក ជាហេតុធ្វើឲ្យខ្ញុំចាប់អារម្មណ៍លើវិស័យច្នៃម៉ូដសម្លៀកបំពាក់ ហើយក៏បានចាប់ផ្តើមមានគំនិតច្នៃប្រឌិតនិងបង្កើតស្ទីលប្លែកៗ។ "

ក្រៅពីចំណង់ចំណូលចិត្តផ្ទាល់ខ្លួន Natacha ក៏មានបុគ្គលល្បីជាគំរូប្រចាំបេះដូងគឺ Tim Walker ដែលជាអ្នកថតរូបបែបរឿងព្រេងបុរាណ និងជាអ្នកច្នៃម៉ូដឲ្យ Christian Dior និង Jacques Fath ។ មួយវិញទៀត ការធ្វើដំណើរទៅកាន់ប៉ែកអាស៊ីនិងអឺរ៉ុប បានជំរុញទឹកចិត្តនាងកាន់តែខ្លាំង ដើម្បីស្វែងយល់បន្ថែមពីប្រពៃណីវប្បធម៌ខុសៗគ្នាក្នុងជីវិតរស់នៅប្រចាំថ្ងៃ ក៏ដូចជាក្នុងរឿងព្រេង ទេវកថាផ្សេងៗ ដែលសុទ្ធតែបានច្នៃប្រឌិតឡើងលាយឡំនឹងទម្រង់ធម្មជាតិ។

ថ្វីដ្បិតនៅប្រទេសកម្ពុជា វិស័យច្នៃម៉ូដសម្លៀកបំពាក់មិនទាន់ទូលំទូលាយខ្លាំងពិតមែន ប៉ុន្តែ Natacha Van បានបញ្ជាក់ទៀតថា "ធ្វើជាអ្នកច្នៃម៉ូដ ប្រៀបបានដូចជាអ្នកសិល្បៈមួយរូប ដែលអាចបើកផ្លូវឲ្យខ្ញុំរៀនពីអ្វីថ្មីៗ ធ្វើដំណើរជុំវិញពិភពលោក បំផុសគំនិត មានឱកាសជួបមនុស្សជាច្រើន និងអាចចែករំលែកផ្លាស់ប្តូរគំនិតល្អៗឲ្យគ្នាទៅវិញទៅមក។"

Natacha បន្ត "ជាពិសេស ការច្នៃម៉ូដសម្លៀកបំពាក់ អាចធ្វើឲ្យខ្ញុំស្គាល់ច្បាស់ពីខ្លួនឯង មានទំនុកចិត្ត អាចបង្ហាញពីអារម្មណ៍ និងគំនិតថ្មីៗ ទៅឲ្យពិភពលោកបានដឹង។" ។

គួរបញ្ជាក់ដែរថា គិតចាប់ពីឆ្នាំ ២០១៨-២០១៩ អ្នកច្នៃម៉ូដដ៏ប៉ិនប្រសប់រូបនេះ បានចូលរួមក្នុងកម្មវិធីបង្ហាញម៉ូដសម្លៀកបំពាក់ ១៥ លើកមកហើយ រួមបញ្ចូលទាំងនៅអាស៊ីនិងអឺរ៉ុប។ អ្វីដែលគូរឲ្យកត់សម្គាល់ខ្លាំងជាងនេះទៅទៀត នាងគឺជាកូនខ្មែរតែម្នាក់គត់ ដែលនឹងយកស្នាដៃច្នៃម៉ូដសម្លៀកបំពាក់ ទៅបង្ហាញនៅទីក្រុងឡុងដ៍ ប្រទេសអង់គ្លេស ក្នុងសណ្ឋាគារ Hilton នៅថ្ងៃទី១៤ ខែកញ្ញា និង នៅទីក្រុងប៉ារីស Eiffel Tower ប្រទេសបារាំង នៅថ្ងៃទី ២៧ ខែកញ្ញាខាងមុខ។

ជាចុងក្រោយ Natacha Van ចង់ផ្តាំផ្ញើប្រិយមិត្តអ្នកអានទាំងអស់គ្នា ជាពិសេសអ្នកចាប់អារម្មណ៍លើផ្នែកច្នៃម៉ូដសម្លៀកបំពាក់ឲ្យមានភាពជឿជាក់លើអ្វីដែលខ្លួនគិតថាស័ក្តិសមត្រឹមត្រូវ ហើយផ្នែកនេះទៀតសោតវាមិនមែនងាយស្រួលឡើយ ដូច្នេះហើយអ្នកត្រូវតែពង្រឹងខ្លួនឯងឲ្យរឹងមាំ ជម្នះរាល់ឧបសគ្គដើម្បីឈានទៅដល់គោលដៅ។ ត្រូវចាំថា ការជ្រើសរើសមុខជំនាញមួយនេះ គឺផ្តើមចេញពីក្តីស្រលាញ់និងអារម្មណ៍៕