ធ្វើការកុំគិតតែពីប្រាក់ខែ អនុវត្ត ៦ ជំហាននេះ ដើម្បីជោគជ័យធំទៅថ្ងៃមុខ
- 2019-07-30 04:35:00
- ចំនួនមតិ 0 | ចំនួនចែករំលែក 0
ធ្វើការកុំគិតតែពីប្រាក់ខែ អនុវត្ត ៦ ជំហាននេះ ដើម្បីជោគជ័យធំទៅថ្ងៃមុខ
តើអ្នកធ្លាប់មានអារម្មណ៍ថាធុញដែរទេ ឲ្យតែពេលភ្ញាក់បើកភ្នែកឡើង ដល់ម៉ោងត្រូវទៅធ្វើការឲ្យគេទៀតហើយ? អ្នកអាចនឹងគិតថា ស៊ីប្រាក់ខែពីគេមិនដឹងថ្ងៃណា ទើបក្លាយជាអ្នកមានបាននោះទេ។
បើនៅប្រកាន់គំនិតអវិជ្ជមានបែបនេះ ទោះចង់ធ្វើអ្វីផ្សេងក៏មិនងាយឈានទៅដល់គោលដៅដែរ។ មុនពេលអាចមានរបស់ធំកាន់ក្នុងដៃ លុះត្រាតែអ្នកឆ្លងកាត់ចំណុចតូចៗជាច្រើនសិន។
រឿងមុខតំណែង ប្រាក់ខែ មិនមែនមិនសំខាន់ទេ ប៉ុន្តែត្រូវបែងចែកទុកមួយឡែកសិន ហើយងាកមកផ្តោតលើលទ្ធផលការងារ ដើម្បីឲ្យប្រាកដថា អ្នកអាចសម្រេចដល់គោលដៅដែលបានគ្រោងទុក។
មិនខ្វះទេមនុស្សជោគជ័យ ដែលធ្លាប់ឆ្លងកាត់បទពិសោធន៍ធ្វើការឲ្យគេ រហូតទទួលបានផ្លែផ្កា មានមុខមាត់និងកិត្តិយសគួរឲ្យយកគំរូតាម។ មនុស្សប្រភេទនេះ មិនមែនប្រើចំណេះដឹងតែមួយមុខឡើយលើការងារ ប៉ុន្តែមានគន្លឹះសំខាន់ៗផ្សេងទៀត ទម្រាំអាចទទួលបានជោគជ័យធំនៅក្នុងដៃ។
១. រីករាយនឹងធ្វើការងារ រហូតដល់ចប់រួចរាល់
ជំនួសឲ្យការស្រ្តេស អ្នកគួររីករាយ ធ្វើការឲ្យអស់ពីចិត្ត ពោរពេញដោយថាមពល ទើបការងារអាចដើររលូនទៅមុខ។ ធ្វើការ ៨ ម៉ោងរាល់ថ្ងៃ អ្នកអាចនឹងឆាប់ធុញទ្រាន់ គ្មានអារម្មណ៍រកនឹកអ្វីថ្មីៗ ដូច្នេះហើយគួរចេះវិធីដើម្បីលើកទឹកចិត្តខ្លួនឯង។ ត្រូវមានក្តីសង្ឃឹមជានិច្ច ហើយគិតថាការងារពិតជាមានប្រយោជន៍សម្រាប់អ្នក។ ពេលជួបបញ្ហា កុំព្យាយាមគេចវេះ ត្រូវតែហ៊ានប្រឈមនិងរកវិធីដោះស្រាយ ទើបហៅថាជាមនុស្សខ្លាំង មោះមុតជាមួយការងារ។
២. មានគំនិតច្នៃប្រឌិតថ្មីៗ
ក្រៅពីភាពរីករាយជាមួយនឹងការងារប្រចាំថ្ងៃហើយ ចំណុចសំខាន់មិនអាចខ្វះបាន គឺការតាំងចិត្ត ផ្លាស់ប្តូរមតិយោបល់ល្អជាមួយមិត្តរួមការងារ និងចេះបង្កើតគំនិតថ្មីៗ ដើម្បីឲ្យការងាររីកចម្រើន។ ស្វាគមន៍រាល់ឧបសគ្គទាំងឡាយ ដែលកើតមានចំពោះមុខ ហើយខិតខំតតាំងជាមួយវាឲ្យដល់ទីបំផុត។ នៅពេលអាចធ្វើបាន នេះហើយជាចំណុចអស្ចារ្យរបស់អ្នក។
៣. មានភាពអំណត់តស៊ូ ចង់ចេះចង់ដឹងបន្ថែម
ទោះបីជាពេលខ្លះ ការងារពិតជាលំបាកបន្តិចមែន ប៉ុន្តែត្រូវមានភាពអំណត់តស៊ូ មិនបោះបង់ចោលដាច់ខាត។ ការងារប្រៀបបានជាបទពិសោធន៍ដល់ល្អសម្រាប់ជីវិត និងជាការអនុវត្តជាក់ស្តែង លើសពីអ្វីដែលជាមេរៀននៅក្នុងសាលា។ យ៉ាងណាមិញ កុំសំងំធ្វើការដដែលៗយូរខ្លាំងពេក គួរផ្តល់ឱកាសឲ្យខ្លួនឯង បានប្រឡូកគ្រប់ជ្រុង ដើម្បីអាចស្គាល់និងរៀនសូត្រនូវអ្វីដែលថ្មី។
៤. កុំស្រ្តេសពេក ហើយត្រូវចេះកំណត់គោលដៅឲ្យបានច្បាស់លាស់
អ្នកដែលពូកែស្រេ្តស កើតទុក្ខ ចូលតួ នឹងធ្វើឲ្យគុណភាពការងារថយចុះ ដោយសារគ្មានកម្លាំងកាយនិងចិត្តគ្រប់គ្រាន់។ ដំណោះស្រាយល្អបំផុតគឺ ត្រូវធ្វើអារម្មណ៍ឲ្យធូរស្រាល សម្រាកឲ្យបានគ្រប់គ្រាន់ និងសើចឲ្យបានច្រើន។ លើសពីនេះទៅទៀត ត្រូវចេះកំណត់គោលដៅ មានយុទ្ធសាស្ត្រច្បាស់លាស់ ក្នុងការជំរុញឲ្យការងារដើរទៅមុខ។
៥. មានជំនឿទុកចិត្តលើខ្លួនឯង
មនុស្សដែលមានទំនុកចិត្តលើខ្លួនឯង តែងជឿជាក់លើសមត្ថភាពដែលខ្លួនមាន ប៉ុន្តែគេក៏មិនមើលរំលងពីចំណុចខ្វះខាត ដើម្បីកែប្រែឲ្យល្អប្រសើរដែរ។ ភាពខ្លាំងរឹងមាំចំពោះការងារ ស្ថិតលើទំនួលខុសត្រូវ ការតាំងចិត្ត ភាពក្លាហាន ហ៊ានជម្នះនឹងបញ្ហា រួមទាំងគោរពនិងជឿជាក់លើខ្លួនឯងជានិច្ច។
៦. មានអត្តចរិត និងទំនាក់ទំនងល្អ នៅកន្លែងការងារ
អត្តចរិត និងទំនាក់ទំនងល្អ ជាមួយមិត្តរួមការងារ អាចជួយឲ្យអ្នករីករាយនឹងមកធ្វើការ បង្កើតក្តីស្រលាញ់ អនុស្សាវរីយ៍ល្អៗ ចេះចែករំលែក នោះការងារក៏ទទួលបានប្រសិទ្ធភាពល្អទៅតាមហ្នឹងដែរ។ គួរញញឹមឲ្យបានច្រើន មានទឹកចិត្តល្អ ចេះជួយគ្នាទៅវិញទៅមក អត់ឱនអធ្យាស្រ័យ បំភ្លេចចោលនូវកំហុសអចេតនាទាំងឡាយ មិនច្រណែនឈ្នានីស បើកចិត្តទូលាយ និងប្រកាន់គំនិតវិជ្ជមាន នោះបរិយាកាសនៅកន្លែងការងារ នឹងស្រស់ស្រាយរាល់ថ្ងៃ។
សង្ឃឹមថាគន្លឹះខ្លីៗខាងលើ អាចនាំអ្នកទៅកាន់ភាពជោគជ័យ ទោះមិនមែនឃើញលទ្ធផលនៅថ្ងៃនេះ ប៉ុន្តែនាថ្ងៃមុខ អ្នកអាចទទួលបានជោគជ័យធំលើសពីការរំពឹងទុកទៅទៀត៕
ចុចអានបន្ត៖ ៨ សញ្ញាបញ្ជាក់ថាអ្នកអស់អារម្មណ៍ចង់ធ្វើការរៀនសូត្រ