រមណីយដ្ឋាន៣កន្លែងស្អាតបំផុតនៅកំពង់ចាម ទៅលេងវិលល្ងាចបានយ៉ាងសប្បាយ
- 2019-07-02 07:30:00
- ចំនួនមតិ 0 | ចំនួនចែករំលែក 0
រមណីយដ្ឋាន៣កន្លែងស្អាតបំផុតនៅកំពង់ចាម ទៅលេងវិលល្ងាចបានយ៉ាងសប្បាយ
សម្រាប់អ្នកចង់លំហែអារម្មណ៍នៅខេត្តកំពង់ចាម មានរមណីយដ្ឋានកែច្នៃ៣កន្លែងទេសភាពស្អាតបំផុត។ ទីកន្លែងនេះ នៅមិនឆ្ងាយពីភ្នំពេញប៉ុន្មានឡើយ ដែលលោកអ្នកអាចធ្វើដំណើរវិលល្ងាចបាន។ ដើម្បីឲ្យមានអារម្មណ៍ល្អ ស្រស់ស្រាយកុំភ្លេចមកកម្សាន្តនៅរមណីយដ្ឋាន៣កន្លែងដូចខាងក្រោម៖
១. រមណីយដ្ឋានស្មៅទន្លេ
ភាពទាក់ទាញរបស់រមណីយដ្ឋាននេះ អ្នកទេសចរអាចថតរូបលេងកម្សាន្តជាមួយការរៀបចំយ៉ាងពិសេសខុសពីរមណីយដ្ឋានដទៃ។ ខ្យល់អាកាសនៅតាមមាត់ទន្លេមេគង្គ មានសួនច្បារស្រស់ស្អាត អមដោយព្រៃត្រែងនៅដីជំរាល កាន់តែធ្វើឲ្យកន្លែងនេះស័ក្ដិសមសម្រាប់អ្នកចង់មកលេងខេត្តនេះ។ រមណីយដ្ឋានស្មៅទន្លេ មានទីតាំងនៅភូមិទី២ សង្កាត់វាលវង់ ក្រុងកំពង់ចាម ខេត្តកំពង់ចាម នៅជាប់មាត់ទន្លេមេគង្គ ត្រង់ចំណុចជិតគល់ស្ពានទៅកោះប៉ែន។
២. រមណីយដ្ឋានសួនមុនី
សួនផ្កាស្រស់បំព្រង ខ្យល់អាកាសបរិសុទ្ធ ធ្វើឲ្យអ្នកទសចរជាប់ចិត្តនឹងរមណីយដ្ឋានសួន មុនី។ លើសពីនេះ លោកអ្នកច្បាស់ជាសប្បាយនឹងការថតរូប ដោយសារទីនេះមានការតុបតែងប្រណិត ទីធ្លាធំទូលាយ ងាយស្រួលសម្រាប់ដំណើរកម្សាន្តជាក្រុម លក្ខណៈគ្រួសារផងដែរ។ ទីតាំងនៅភូមិអណ្តូងច្រុះ ឃុំអំពិល ស្រុកកំពង់សៀម ខេត្តកំពង់ចាម ចម្ងាយពីភ្នំប្រុសភ្នំស្រីប្រហែល៥០០ម៉ែត្រ ។
៣. រមណីយដ្ឋានកសិទេសចរណ៍ថ្មដាទឹកឆា
រមណីយដ្ឋានស្រស់បំព្រងនេះ មានសួនច្បារផ្កាចម្រុះពណ៍ យ៉ាងធំដែលធ្វើឲ្យលោកអ្នកដើរមើលទេសភាពមិនជិនណាយ។ ក្រៅពីនេះ ក៏មានសួនសត្វសម្រាប់លោកអ្នកទស្សនាកម្សាន្តផងដែរ ដូចជា ស្វា អូទ្រីស ខ្លា ក្រពើ អណ្តើក ក្តាន់ ជាដើម។ លោកអ្នកដែលបានទៅដល់ទីនេះ ច្បាស់ជាចង់មកលេងម្ដងទៀត ដោយសារជាប់ចិត្តនឹងការរៀបចំយ៉ាងល្អប្រណិត។ ទីតាំងនៅភូមិថ្មដា ឃុំបឹងណាយ ស្រុកព្រៃឈរ ខេត្តកំពង់ចាម ចម្ងាយប្រហែល៩៩គីឡូម៉ែត្រពីភ្នំពេញ។
ចុចអាន៖ ទៅលេងកោះកុងក្រៅ មើលសមុទ្រថ្លាឆ្លុះជាប់មេឃ ទុក្ខធំប៉ុនណាក៏រលាយអស់