ប្រវត្តិមង្គលការតារាល្បីៗរបស់កម្ពុជាក្បែរ១០គូ កក្រើកពិភពសិល្បៈកម្រនឹងជួបប្រទះ

2019-06-06 07:29:18
ចំនួនមតិ 0 | ចំនួនចែករំលែក 0

ការរៀបការមានគូស្រករ ដើម្បីកាន់ដៃគ្នាដើរលើជីវិតគូជាមួយគ្នា គឺជាអ្វីដែលគ្រប់គ្នារមែងប្រាថ្នាចង់បាន។ គោលបំណងនៃពិធីនេះ គឺដើម្បីបំពេញតាមទំនៀមប្រពៃណីរបស់ជាតិខ្មែរដែលថា គូស្វាមីភរិយា ឬគូស្នេហ៍មិនអាចរស់នៅជាមួយគ្នាដោយមិនបានរៀបការឡើយ ពុំនោះទេ គេជឿថា នឹងធ្វើឲ្យដូនតាក្ដៅក្រហាយដោយសារតែក្ដីអាម៉ាស់កូនចៅយកគ្នា មិនបានរៀបការ។ ដូច្នេះហើយដូនតា នឹងមិនឲ្យកូនចៅរកស៊ីមានបាន ឬរស់នៅសុខស្រណុកស្រួលទេ។

បើទោះធ្វើក្នុងគោលបំណងដូចគ្នា ប៉ុន្តែពិធីនេះ ប្រែប្រួលរូបរាងតូចធំ អធិកអធមទៅតាមលទ្ធភាព និងមុខមាត់កិត្តិយសម្ចាស់សាមីកម្មវិធី។ យោងលើហេតុផលនេះហើយ បើងាកមកមើលប្រវត្តិនៃការរៀបអាពាហ៍ពិពាហ៍របស់សិល្បករខ្មែរវិញ ឃើញថា កម្មវិធីរបស់គូខ្លះ គឺអធិកអធមខ្លាំងមែនទែន រហូតដល់មានថ្នាក់ដឹកនាំប្រទេសចូលរួមទៀតផង។ ខាងក្រោមនេះ ជាពិធីរបស់គូដែលគគ្រឹកគគ្រេងកម្រប្រទះ៖

១.ឱក សុគន្ធកញ្ញា និងលោក អឹ៊ង សុខលី ៖ សុគន្ធកញ្ញា បានរៀបការជាមួយប្អូនប្រុសថៅកែផលិតកម្មហង្សមាស ការរៀបការនៅថ្ងៃទី ១៦ ឧសភា ២០១៩។ ប្រារព្ធនៅសណ្ឋាគារផ្កាយ ៥ ពិធីរបស់ តារាស្រីហង្សមាស អាចជាពិធីមង្គលដ៏មហោឡារិកបំផុតប្រចាំឆ្នាំ ២០១៩នេះ ក្នុងនោះ សូម្បីសម្ដេចតេជោ ហ៊ុន សែន ក៏ផ្ដល់កិត្តិយសចូលរួមកាត់សក់បង្កក់សេរីដល់ពួកគេដោយផ្ទាល់ដែរ។ ដូច្នេះ មិនមានអ្វីត្រូវសង្ស័យទៀតនោះទេ គឺថា មង្គលការ ឱក សុគន្ធកញ្ញា មានឯកឧត្ដម រដ្ឋមន្ត្រី អ្នកឧកញ៉ា អ្នកមុខ អ្នកការរាប់រយនាក់ឯណោះ៕

២.អ្នកស្រី ហូវ ដានេ នាយិកា ឌែរម៉ូគ្លីនិក បានសម្រេចចិត្តចូលរោងជ័យ ជាមួយអ្នកជំនួញល្បីឈ្មោះម្នាក់ឈ្មោះ Thammarat Thurathong មានប្រាក់វាល់លានដុល្លារមកពីស្រុកថៃ កាលពីថ្ងៃទី ៣១ ធ្នូ ២០១៨។ ស្វាមីរូបនេះ ត្រូវបានគេស្គាល់ថា គឺជាកូនពៅ ក្នុងត្រកូលអភិជនដែលមានកូនតែ២នាក់ និងជាអ្នកជំនួញជួរមុខក្នុងប្រទេសថៃ ដែលមានក្រុមហ៊ុនធំៗក្នុងដៃជាច្រើនដូចជា ក្រុមហ៊ុនយន្តហោះឯកជន ក្រុមហ៊ុនកប៉ាល់ឯកជន ក្រុមហ៊ុនលក់មាស ក្រុមហ៊ុនផលិតជី ក្រុមហ៊ុនលក់ដី សណ្ឋាគារ និងភោជនីយដ្ឋានលំដាប់ផ្កាយ៥ និងក្រុមហ៊ុនកែសម្ផស្សជាដើម។

ដោយឡែក អ្នកស្រី ហូវ ដានេ ក៏ជាពាណុិជ្ជករល្បីឈ្មោះមួយរូបក្នុងស្រុកដែរ។ នៅថ្ងៃមង្គលនោះ អ្នកស្រី ដានេ បានទទួលអំណោយយ៉ាងក្រាស់ក្រែលពីម្ដាយក្មេក គឺខ្សែកពេជ្រ ១ខ្សែ តាមដឹងតម្លៃប្រហែល ៤៧ម៉ឺនដុល្លារ និងចិញ្ចៀនពេជ្រ ១វង្សមានតម្លៃប្រហែលជាង៣០ម៉ឺនដុល្លារអាមេរិកឯណោះ។

៣.កូនស្រីថៅកែថោន វ៉ា នីតា និងលោក ធី ឥន្រ្ទ័ធនី ៖ កូនស្រីម្ចាស់ផលិតកម្មថោន កញ្ញា វ៉ា នីតា បានរៀបការជាមួយកូនប្រុសលោកឧកញ៉ា គា ធី នៅថ្ងៃទី ៨ ឧសភា ២០១៨។ ជាកូនស្រីរបស់ឯកឧត្ដម វ៉ា សុធា អគ្គនាយកថោនគ្រុប និងជាមន្ត្រីមានមុខមួយរូបនៅសាលារាជធានីភ្នំពេញ ពិធីទាំងមូល ត្រូវបានធ្វើយ៉ាងអធិកអធមបំផុតប្រចាំឆ្នាំ។

មង្គលការមួយនេះ មានការរៀបចំ និងតុបតែងយ៉ាងអស្ចារ្យ ដោយគ្រាន់តែការតុបតែងគេហដ្ឋាន និងផ្កាភ្ញីទាំងនៅផ្ទះ ទីតាំងទទួលភ្ញៀវ ចំណាយដល់ទៅរាប់សិបម៉ឺនដុល្លារឯណោះ។ក្នុងថ្ងៃពិសេសនេះដែរកូនក្រមុំវ័យក្មេង វ៉ា នីតា ដែលមានតួនាទីជា CEO នៃស្ថានីយទូរទស្សន៍ ថោន និងកូនកំលោះរូបសង្ហា បានគ្រងនូវឈុតសំលៀកបំពាក់ប្រពៃណីខ្មែរ ក្នុងទឹកមុខញញឹម ពព្រាយ៕

៤.សុគន្ធ និសា និងលោក ចៅ សម្បត្តិ ៖ ដូចគ្នានឹង ស្រីមុំ ដែរ ពិធីរបស់ សុគន្ធ និសា បានប្រព្រឹត្តិទៅនៅសណ្ឋាគារសូហ្វីតែ នៅថ្ងៃទី ០១ ធ្នូ ឆ្នាំ ២០១៧។ ស្វាមីរបស់តារាចម្រៀង ប៉ុន សុគន្ធា ហៅ សុគន្ធ និសា ឈ្មោះ ចៅ សម្បត្តិ ហៅ សាំបា ជាអាណិកជនខ្មែរអាមេរិក បច្ចុប្បន្នបម្រើការជាថ្នាក់ដឹកនាំ និងជាម្ចាស់ហ៊ុនមួយនៃក្រុមហ៊ុនធានារ៉ាប់រងមួយ។

ដូច្នេះហើយ ពិធីរបស់នាង មានភ្ញៀវកិត្តិយសជាច្រើនរយនាក់ ភាគច្រើនបំផុត គឺជាភ្ញៀវលំដាប់ខ្ពស់ ឬលំដាប់អភិជន។ ពេលនោះ មិនមានតួលេខពីការចំណាយលើការរៀបចំពិធីឡើយ។ ប៉ុន្តែគេប៉ាន់ប្រមាណថា ការចំណាយមិនក្រោម ១០ម៉ឺនដុល្លារនោះឡើយ៕

៥.គង់ ចាន់ស្រីមុំ និង គឹម សីហា ៖ ក្រោយស្រឡាញ់គ្នាប្រមាណ ៩ឆ្នាំ គង់ ចាន់ស្រីមុំ និង គឹម សីហា បានរៀបចំយ៉ាងអធិកអធមនៅសណ្ឋាគារសូហ្វីតែលកាលពីថ្ងៃច័ន្ទ ទី ១៤ មីនា ២០១៦ និងជាពិធីដ៏អធិកអធមប្រចាំឆ្នាំហើយនាពេលនោះ ព្រោះថា អ្នកទាំងពីរ ត្បិតវ័យក្មេងក៏ពិតមែន ប៉ុន្តែពួកគេមានជំនួញក្នុងដៃធំមួយចំនួនរួចស្រេចមុនសម្រេចរៀបការ។ ដូច្នេះហើយ ពិធីជ័យប្រចាំជីវិតរបស់ពួកគេ ក៏អស្ចារ្យទៅតាមនោះដែរ។

គូស្វាមី ភរិយា វ័យក្មេងមួយគូនេះ បានជ្រើសរើសយកសណ្ឋាគារសូហ្វីតែល ធ្វើជាកន្លែងប្រារព្ធពិធីជ័យមង្គលរបស់ពួកគេ។ នាពេលនោះ មានព័ត៌មានថា ពួកគេបានចំណាយលើការរៀបការ អស់ប្រមាណ ១០ម៉ឺនដុល្លារឯណោះ នេះដោយមិនទាន់បូកបញ្ចូលចិញ្ចៀនពេជ្រ តម្លៃ ១០ម៉ឺនដុល្លារដែល ស្វាមី ទិញជូនភរិយានោះឡើយ៕

៦.ស្រីតូច ចំណាន និងអ្នកឧកញ៉ា គិត ម៉េង ៖ មិនមានអីសង្ស័យទេ ពិធីរបស់សេដ្ឋីលំដាប់ប្រទេសម្នាក់ទៅហើយ រឿងអីមិនកក្រើក ពោលគឺនេះគឺជាពិធីដ៏អធិកអធមបំផុតប្រចាំឆ្នាំ ២០១៥។ អ្នកឧកញ៉ា គិត ម៉េង និងស្រីតូច ចំណាន ធ្វើនៅថ្ងៃទី ២១ មីនា ២០១៥ ដោយបានចំណាយប្រមាណ ១លានដុល្លារលើពិធីទាំងមូល ក្នុងនោះតុអាហារសុទ្ធតែរៀបចំលំដាប់ផ្កាយប្រាំ អំណោយជូនភ្ញៀវ សុទ្ធតែទឹកអប់កុម្ម៉ង់ពីបារាំង។

ដោយឡែកភ្ញៀវកិត្តិយសវិញ ដែលសុទ្ធជាលំដាប់អភិជន ឯកឧត្ដម ឧត្ដមមន្ត្រី បានកើនលើសគម្រោង រហូតពង្រីក៤.អគារពី ៥ ទៅ ៦ ឯណោះ៕

៧.សារ៉ាយ សក្ខណា និងលោក កែវ ប៊ុនមេត្រី ៖ មួយគូនេះ រៀបការនៅថ្ងៃ នៅថ្ងៃទី១២ ខែធ្នូ ២០១៣។ ត្បិតថា ពិធីរបស់អតីតតារាសម្ដែងល្បីឈ្មោះរូបនេះ មិនមានមន្ត្រីធំចូលរួម ប៉ុន្តែថ្ងៃមង្គលរបស់នាង អធិកអធមខ្លាំងសម្រាប់ឆ្នាំនោះ ដោយសារតែស្វាមីនាង គឺជាមេធាវីមកពីសហរដ្ឋអាមេរិក។ ពិធីទាំងមូល ត្រូវបានគេប៉ាន់ប្រមាណថា បានចំណាយថវិការៀបចំយ៉ាងច្រើន ក្នុងនោះគ្រាន់តែចំណាយលើរ៉ូបកូនក្រមុំមួយឈុត អស់១ម៉ឺនដុល្លារបាត់ទៅហើយ៕

យ៉ាងណាពេលនោះ សក្ខណា ក៏ទទួលបានការរិះគន់ច្រើនដែរ ក្រោយបង្ហើបតម្លៃនៃរ៉ូបមួយឈុតនោះ។ ប្រិយមិត្តមួយចំនួនយល់ថា នោះគឺជាការចំណាយខ្ជះខ្ជាយ ព្រោះប្រាក់ ១ម៉ឺនដុល្លារក្នុងពេលនោះ មិនងាយរកឡើយ៕

៧.គង់ សុជាតិ និង ជា វិបុល ៖ ពិធីការិនី ពិធីករទាំងទ្វេនេះ បានរៀបការនៅថ្ងៃទី ៩ វិច្ឆិកា ២០១៣។ នេះជាពិធីមង្គលបន្ទាប់ក្នុងឆ្នាំតែមួយជាមួយ សារ៉ាយ សក្ខណា ស្របពេលគេដឹងថា អ្នកនាង គង់ សុជាតិ គឺជាតារាស្រីទ្រព្យស្តុកមួយរូប។ ដោយឡែកកូនកំលោះ ជា វិបុល ក៏ជាបុគ្គលក្នុងគ្រួសារខ្ពង់ខ្ពស់ដែរ ដូច្នេះហើយ ពិធីមង្គលរបស់ពួកគេ បានជ្រើសយកសណ្ឋាគារលំដាប់ផ្កាយប្រាប់ អ៊ីនធើកុងទីណង់តាល់ យ៉ាងកម្រនាគ្រានោះ៕

៩.អ៊ុក ណារីម ឆោម ឆពុំ ៖ ឆោម ឆពុំ និងលោក អ៊ុក ណារីម បានរៀបការក្លាយជាគូស្វាមីភរិយានឹងគ្នាកាលពីថ្ងៃទី២៩ ខែមិថុនា ឆ្នាំ២០១២ បន្ទាប់ពីព្យាយាមបិទបាំងចំណងស្នេហ៍អស់ពេលជាច្រើនឆ្នាំ។ មង្គលការនេះ បានទទួលការផ្ចុងផ្ដើមដោយសម្ដេចនាយករដ្ឋមន្ត្រី និងលោកជំទាវ ព្រោះថា ពួកគេគឺជាកូនធម៌របស់ថ្នាក់ដឹកនាំប្រទេស។

ដូច្នេះហើយ ទើបក្នុងថ្ងៃមង្គលនោះ របស់ពួកគេ គេឃើញមានមន្ត្រីថ្នាក់ខ្ពស់ក្នុងជួររដ្ឋាភិបាលជាច្រើន បានចូលរួមជាភ្ញៀវកិត្តិយស ស្របពេលដែល ឯកឧត្ដមនាយឧត្ដមសេនីយ៍ផ្កាយមាស៤ ហ៊ីង ប៊ុនហៀង មេបញ្ជាការនៃបញ្ជាការដ្ឋានអង្គរក្ស ទទួលភារជាតំណាងសម្ដេច ហ៊ុន សែន ធ្វើជាមេបារបស់ពួកគេទៀតផង៕

អត្ថបទ៖ ទារិកា