បែកគ្នាហើយតែអ្នកអាចឆ្លង ៦ ដំណាក់កាលនេះ អ្នកនឹងផ្ដើមជីវិតថ្មីបាន

2019-04-08 08:38:04
ចំនួនមតិ 0 | ចំនួនចែករំលែក 0

បែកគ្នាជារឿងមួយដែលគូស្នេហ៍មិនចង់ជួប តែពេលខ្លះយើងនៅតែមិនអាចឃាត់បាន ដូច្នេះហើយមានតែទទួលយកការពិត។ ៦ដំណាក់កាលនេះគឺជារឿងដែលអ្នកត្រូវឆ្លងកាត់ ក្រោមបែកបាក់ស្នេហា ៖

១. បេះដូងអ្នកខ្ទេចខ្ទីគ្មានសល់

ដំណាក់នេះគឺជាការបែកគ្នាភ្លាមៗដែលធ្វើឲ្យអ្នកឈឺចាប់ខ្លាំងរហូតពេលខ្លះអាចធ្វើអីផ្ដេសផ្ដាសទៀតផង។ អ្នកយំអ្នកខូចចិត្តខ្លាំងសូម្បីដែលបាយក៏មិនចង់ញ៉ាំ អ្នកណាក៏មិនចង់ជួប អ្វីក៏មិនចង់ធ្វើ។

រូបតំណាង

**២. ចាប់ផ្ដើមមានអារម្មណ៍ឯកាខ្លាំងឡើងៗ**

អ្នកចាប់ផ្ដើមឯកាខ្លាំង មានអារម្មណ៍ថាពិភពលោកនេះមានតែយើងម្នាក់។ ភាពស្ងប់ស្ងាត់កាន់តែឲ្យអ្នកមានអារម្មណ៍ពិបាកទទួលយកឡើងៗ ព្រោះពីមុនអ្នកមានគ្នា ទៅណាមកណាជាមួយគ្នា ញ៉ាំអីជាមួយគ្នា តែពេលនេះអ្នកធ្វើវាតែម្នាក់ឯងទាំងអស់។

៣. អ្នកចាប់ផ្ដើមស៊ាំនឹងការនៅម្នាក់ឯងបានខ្លះ

ពីមួយថ្ងៃទៅមួយថ្ងៃអ្នកអាចបន្តរស់នៅ និងធ្វើអ្វីតែឯងបានម្ដងបន្តិចៗ រហូតអាចចេញក្រៅ និងទទួលការពិតបានខ្លះ។ អ្នកមិនអាចញញឹមបាន តែអ្នកអាចក្រោកឈរហើយចាប់ផ្ដើមស្រឡាញ់ខ្លួនឯងឡើងវិញ។ អ្នកអាចញ៉ាំអាហារ អ្នកអាចមើលកុន ឬទៅដើរលេងខ្លះដើម្បីរំសាយភាពឈឺចាប់ដែលអ្នកមាន។

រូបតំណាង

៤. មានអារម្មណ៍ដូចចុះនរកម្ដងម្កាល

ពេលខ្លះអ្នកអាចរឹងមាំ តែពេលដែលនឹកគេ ឬរំឮកអតីតកាលអ្នកមានអារម្មណ៍ថាដូចចុះនរកអីចឹង គេនឹកគេខ្លាំង ចង់ជួបគេខ្លាំង ហើយពេលខ្លះអាចមុខក្រាស់ Call ឬ Chat ទៅគេមុនក៏មាន។ នេះជាដំណាក់កាលមួយដែលតម្រូវឲ្យអ្នកចេះគ្រប់គ្រងអារម្មណ៍ខ្លួនឯង បើមិនអីចឹងទេអ្នកអាចធ្វើអីតាមចិត្តដោយមិនគិតអីក៏ថាបាន។

៥. ចាប់ផ្ដើមធូរស្រាល

អ្នកចាប់ផ្ដើមចេះគ្រប់គ្រងចិត្តខ្លួនឯង ហើយអាចញញឹមបានខ្លះទោះបីជាឃើញមុខគេក៏អ្នកអាចទប់ចិត្តទប់ទឹកភ្នែកខ្លួនឯងបានដែរ។អ្នកចាប់ផ្ដើមស្រឡាញ់ខ្លួនឯងកាន់តែខ្លាំង និងធ្វើខ្លួនកាន់តែរឹងមាំជាងមុន។ អ្នកកាន់តែមានទំនាក់ទំនងល្អជាមួយមនុស្សជុំវិញខ្លួន ហើយព្យាយាមអ្វីដើម្បីខ្លួនឯង។

រូបតំណាង

៦. ឆ្លងកាត់វាបាន

ដំណាក់កាលដែលអ្នកអាចទទួលយកការពិតទាំងស្រុងហើយចាប់ផ្ដើមជីវិតដ៏ស្រស់ស្អាតម្ដងទៀត អ្នកចាប់ផ្ដើមលែងមើលឃើញគេមានតម្លៃទៀត ហើយក៏លែងមានអារម្មណ៍ថាគេសំខាន់ទៀត។ អ្នកលែងខ្វល់ពីរឿងដែលបានកើតឡើងរស់នៅដោយសប្បាយចិត្តឡើងវិញ។

បានដល់ដំណាក់កាលណាទៅហើយ? ព្យាយាមឡើងមិនយូរអ្នកនឹងឆ្លងផុត៕

ចុចអាន៖ជួបស្នេហាមិនសមបំណងច្រើនលើកពេក គួរតែរៀនប្រើជីវិតបែបនេះម្ដង

អត្ថបទ៖ ផេង ផលធិតា