ឃើញទឹកចិត្ត ហង្ស ម៉ារិនី អ្នកនិពន្ធលាន់មាត់អាណិតតារាស្រីរូបនេះ

2019-03-25 04:31:15
ចំនួនមតិ 0 | ចំនួនចែករំលែក 0

ម្ចាស់រឿង "ថ្ងៃមុនស្អប់ថ្ងៃនេះស្រលាញ់" ដែលកំពុងល្បីនៅប៉ុស្តិ៍ភីអិនអិន បានបញ្ចេញប្រលោមលោកថ្មីរឿង "អាគមបរព្រៃ" ជាសៀវភៅថ្មីហើយថែមទំាងត្រូវបានផ្តាច់មុខដោយតារាស្រី ហង្ស ម៉ារីនី។

តារាស្រីរូបនេះបានប្រកាសកាលពីថ្ងៃសុក្រថា នាងទទួលលក់សៀវភៅរឿង"អាគមបរព្រៃ" នេះផ្តាច់មុខដោយសារតែនាងមានគំនិតចង់ចូលរួមជួយជំរុញការអាននៅកម្ពុជា។ នាងថា ពីមុន នាងក៏មិនចូលចិត្តការអានដូចគ្នា តែក្រោយពីសៀវភៅមួយចំនួនបានកែប្រែជីវិតរបស់នាង នាងយល់ថាការអាន គឺជាជំហាននៃជោគជ័យ។

ដោយឃើញតារាស្រីដែលលក់ដូរលើអនឡាញយ៉ាងមមារញឹកបែរមកជួយលើកតម្កើងស្នាដៃតែងនិពន្ធបែបនេះ អ្នកនិពន្ធ ម៉ីសន សុធារីបានសរសេរនៅលើ Page ផ្លូវការរបស់ខ្លួននៅព្រឹកនេះថា "អាណិតហង្ស ម៉ារិនី! គេងបានបីបួនម៉ោងក្នុងមួយថ្ងៃ ឥឡូវមកថែមលក់សៀវភៅទៀតទំាងដឹងហើយថា លក់សៀវភៅមួយខែបានកម្រៃមិនស្មើលក់គ្រឿងសម្អាងមួយថ្ងៃ! នាងធ្វើដើម្បីអ្វី?”

ក្នុងជំនួបតាមទូរសព្ទព្រឹកមិញនេះ អ្នកស្រី ម៉ីសន សុធារីបានឱ្យដឹងថា សៀវភៅអាគមបរព្រៃ ជាខ្សែរឿងបែបមន្តអាគមនិងជំនឿខ្មែរ។ រឿងនេះនិយាយពីត្រណមជាច្រើននៅតំបន់នានាក្នុងការរំកិលឬកាប់ឈើសង់ផ្ទះ។ អ្នកស្រុកមានជំនឿថា ឈើនីមួយៗមានអ្នកថែរក្សាជាពិសេសបណ្តាដើមណាដែលមានមែកញែកជាពីរដូចចម្ពាមកៅស៊ូ គឺត្រូវការរំកិលចេញពីរបងផ្ទះ ហើយមានពិធីស្មុគស្មាញទើបបានសុខ។

សៀវភៅនេះមានបង្កប់នូវគតិអប់រំជៀសវាងការបៀតបៀនចង់បានទ្រពរបស់ដែលពុំមែនមកដោយធម៌។ ទោះយ៉ាងណា រឿងប្រលោមលោកមួយនេះពុំមែនបោះពុម្ពជាមួយគម្រោង RyNa ដែលមានឌីជេណាណាជាដៃគូទៀតទេ។ អ្នកនិពន្ធអះអាងថា មានរឿងស្នេហាជាច្រើនដែលកំពុងត្រៀមបោះពុម្ពជាមួយឌីជេណាណា ព្រោះត្រូវនឹងចំណូលចិត្តហ្វេនដ៏ធំរបស់គាត់ ចំណែកឯអាគមបរព្រៃ អ្នកនិពន្ធចង់បានក្រុមគោលដៅថ្មីមកបូកបន្ថែម។

អ្នកនិពន្ធសង្កត់ធ្ងន់ថា "ខ្ញុំបានទៅនិយាយជាមួយតារាពីរបីរូបដែលល្បីលើអនឡាញ ខ្ញុំប្រាប់ទំាងអស់ថា លក់សៀវភៅមិនបានធ្វើឱ្យភាគីណាមួយមានបានទេ សូម្បីអ្នកនិពន្ធ អ្នកបោះពុម្ព ឬអ្នកលក់ដុំ លក់បន្ត ប៉ុន្តែសៀវភៅជាអ្វីមួយដែលចូលទៅកែប្រែសង្គមយើងបានតាមរយៈឥទ្ធិពលសម្ងាត់របស់វា ចុងក្រោយម៉ារិនីបានយល់ព្រម! ខ្ញុំអាណិតគាត់ដែលគេងបានបីបួនម៉ោង ហើយថែមទំាងកាត់មួយម៉ោងរាល់ថ្ងៃមកលក់សៀវភៅ! រកឯណាបាន?”

តាមគម្រោង រឿងអាគមបរព្រៃនឹងចេញជាសៀវភៅពិតនៅថ្ងៃទី២ ខែមេសានេះ ក្នុងទម្រង់ក្របរឹង (HardCover) និងទំហំ ១២,២ ស.ម x ១៧ ស.ម កម្រាស់២០០ទំព័រ លក់ចេញក្នុងតម្លៃ ២៥ ០០០ រៀល។ តម្លៃនេះ តារាស្រី ហង្ស មារិនី ទទួលបាន ៥ ០០០ រៀលក្នុងមួយក្បាល។ នាងបានប្រកាសថា នឹងយកចំណូលពីការលក់សៀវភៅនេះទៅធ្វើសកម្មភាពសប្បុរសធម៌ និងជ្រោមជ្រែងក្រុមអ្នកលក់។

បើតាមអ្នកនិពន្ធឱ្យដឹង អាគមបរព្រៃបោះផ្សាយតែ១ពាន់ក្បាលប៉ុណ្ណោះ គឺតិចជាងចំនួនសៀវភៅបោះមុនៗ។ អ្នកស្រីពន្យល់ត្រង់ណេះថា នេះជាការសម្រេចចិត្តរបស់ក្រុម តម្រា ដែលជាក្រុមយុវវ័យលើកកម្ពស់ការអានមួយ ហើយដោយសារគេមានលទ្ធភាពទិញយកសិទ្ធិបោះពុម្ពតែមួយពាន់ក្បាល អ៊ីចឹងចំនួនសៀវភៅមិនអាចលើសពីនេះបាន៕

អត្ថបទ៖ សរ សុគន្ធី