ដឹងច្បាស់ថាគេមិនមែនជាកម្មសិទ្ធិរបស់យើង តែគ្រាន់បានជួបក៏មានសុភមង្គល

2019-03-04 07:30:00
ចំនួនមតិ 0 | ចំនួនចែករំលែក 0

ស្រលាញ់មនុស្សម្នាក់ ពេលខ្លះមិនប្រាកដថាចាំបាច់នៅក្បែរគេនោះទេ ព្រោះមានហេតុផលជាច្រើន។ ពេលខ្លះ គ្រាន់តែគេដើរឆ្លងកាត់ជីវិតយើង ក៏មានអារម្មណ៍ថាសុភមង្គលទៅហើយ។

រូបតំណាង

ពួកយើងមួយណាក៏ដូចគ្នាដែរ នៅពេលស្រលាញ់នរណាម្នាក់ តែចង់ឲ្យខ្លួនឯងបាននៅក្បែរគេ បានកាន់ដៃគេដើរលើវិថីជីវិតមួយនេះ។ យ៉ាងណាក្ដី លើលោកនេះមានមនុស្សដល់ទៅ៧ ពាន់លាននាក់ ជាមធ្យមមនុស្សម្នាក់អាចជួបមនុស្សចំនួន ២៩ ២០០ ០០០ នាក់ ហើយអត្រាដែលមនុស្ស២ នាក់អាចស្រលាញ់គ្នាបានគឺត្រឹមតែ ០,០០០០៤៩%។ ជាមួយនឹងឱកាសដ៏ទាបយ៉ាងនេះ មនុស្ស២នាក់អាចបានត្រឹមតែដើរកាត់ជីវិតគ្នាតែប៉ុណ្ណោះ។

មួយខ្សែជីវិតយើង អាចជួបមនុស្សជាច្រើន។ មានអ្នកខ្លះគ្រាន់តែឈានចូលជីវិតយើងហើយ ដើរចេញដូចមនុស្សមិនដែលស្គាល់គ្នា។ ឯអ្នកខ្លះទៀតទៅក៏បន្សល់បានអនុស្សាវរីយ៍ខ្លះក្នុងបេះដូង ហើយក៏មានករណីដ៏កម្រ ដែលអ្នកខ្លះឈានជើងចូលជីវិតយើងហើយ ក៏មិនដើរចេញរហូត។ ទោះជាយ៉ាងណាក៏ដោយ អ្នកទាំងអស់នេះ គឺសុទ្ធតែមានអត្ថន័យផ្សេងគ្នាក្នុងជីវិត។

ពិភពលោកគឺចឹង មនុស្សច្រើន តែអ្នកដែលធ្វើឲ្យបេះដូងអ្នករំជើបរំជួលគឺមានតិចខ្លាំងណាស់។ ពេលខ្លះ ដឹងច្បាស់ហើយថា គេគ្រាន់តែជាអ្នកដើរឆ្លងកាត់ជីវិតយើងប៉ុណ្ណោះ តែនៅតែធ្វើឲ្យយើងមានសុភមង្គលពេលឃើញវត្តមានរបស់គេ៕