មានផ្ទះ មានឡាន មានលុយច្រើនធ្វើអី បើចិត្តរបស់គេមិនស្មោះនោះ?
- 2019-02-12 04:00:00
- ចំនួនមតិ 0 | ចំនួនចែករំលែក 0
មានផ្ទះ មានឡាន មានលុយច្រើនធ្វើអី បើចិត្តរបស់គេមិនស្មោះនោះ?
ត្រូវការអីផ្ទះធំល្វឹងល្វើយ ឡានទំនើប លុយរាប់មិនអស់នោះ សុមត្រឹមតែបុរសដែលនៅក្បែរយើង មានចិត្តស្មោះមួយនឹងមួយគឺគ្រប់គ្រាន់ហើយ។
មនុស្សប្រុសមានធ្លាប់ឆ្ងល់ទេថា មនុស្សស្រីដែលយើងស្រលាញ់ចង់បានអ្វីនោះ? មិនមែនលុយអ្នកដែលរកបានទេ ហើយក៏មិនមែនកាដូថ្លៃៗដែលអ្នកខ្ញុំនោះដែរ។ អ្វីដែលមនុស្សស្រីត្រូវការបំផុតនោះគឺចិត្តស្មោះរបស់មនុស្សប្រុសទៅវិញទេ។ ស្រីអាចស្លៀកពាក់មិនសូវស្អាត ហូបមិនសូវឆ្ងាញ់ដូចគេក៏បាន តែមានដំណែងច្បាស់លាស់មួយក្នុងបេះដូងគេក៏ស្កប់ស្កល់ដែរ។
ផ្ទះធំល្វឹងល្វើយបានការអីបើគ្មានសុភមង្គល។ មានស្ដុកស្ដម្ភធ្វើអីបើចិត្តមនុស្សងាយផ្លាស់ប្ដូរនោះ។ មនុស្សស្រីគ្រាន់តែរំពឹងថា ក្រោយព្យុះភ្លៀង ឧបសគ្គទាំងប៉ុន្មាន អ្នកទាំង២ អាចកាន់ដៃគ្នាបង្កើតជាគ្រួសារកក់ក្ដៅមួយតែប៉ុណ្ណោះ។ បាយម្ហូបសាមញ្ញមួយពេល ក៏មានក្ដីសុខ ជាងម្ហូបស៊ីវិល័យ ហុតជាមួយទឹកភ្នែកដែរ។
ឲ្យតែបេះដូងគេចំពោះយើងកក់ក្ដៅ ទោះផ្ទះឈើរងារប៉ុណ្ណា ក៏ក្នុងអារម្មណ៍បានស្ងប់។ ផ្ទុយមកវិញ ទោះផ្ទះវីឡាស្កឹមស្កៃ តែចិត្តគេល្ហល្ហេវជាមួយយើងទៅហើយ ក៏អស់ន័យដែរ។ ពេលខ្លះ អាចនិយាយបានថា មិនចង់ឲ្យខ្លួនមានលុយច្រើនពេកផង ព្រោះលុយកាន់តែច្រើនហានិភ័យកាន់តែខ្ពស់។
បុរសលុយច្រើន ប្រៀបដូចផ្កាផ្អែមបណ្ដូល កន្លង់ណាក៏ចង់ចោមរោម។ ទោះមិនចង់ ក៏មានគេហុចចំណីដល់មាត់ ពិបាកទប់អារម្មណ៍ខ្លាំង។ មនុស្សស្រីដែលឲ្យតម្លៃភាពស្មោះត្រង់ ទោះមនុស្សប្រុសរបស់គេ ធ្លាក់ខ្លួនទៅជាក្រ ក៏អាចនៅរួមសុខ រួមទុក្ខជាមួយគ្នា ហើយកសាងឡើងវិញពីបាតដៃទទេ។ តែពួកគេនឹងបោះបង់គ្រប់យ៉ាង ប្រសិនបើមនុស្សប្រុសនោះ ផិតក្បត់គេសូម្បីតែមួយដង។
ដូចនេះ ប្រុសៗជួយចាំផងថា កុំស្មានស្រីៗងប់តែនឹងលុយនោះ តែត្រូវដឹងថា ចិត្តស្មោះរបស់អ្នកគឺជាអ្វីគេពួកគាត់ចង់បានបំផុត៕