អាយុម្ភៃក្រាស់ហើយនៅលីវ ខ្លាចជាងគេគឺទៅញ៉ាំការគេតែម្ដង

2019-01-31 04:00:00
ចំនួនមតិ 0 | ចំនួនចែករំលែក 0

មិននិយាយបំផ្លើសទេ ខ្ញុំមានអារម្មណ៍ថាជីវិតនៅលីវសព្វថ្ងៃគឺស្រណុកពិតមែន តែឲ្យតែត្រូវញ៉ាំការគេម្ដងៗ គឺភ័យខ្លាច និងធុញទ្រាន់ជានិច្ច នៅពេលដែលតែងត្រូវគេសួរថា ពេលណាបានដល់វេនខ្ញុំ។

ឆ្នាំនេះខ្ញុំអាយុ២៩ ឆ្នាំ កម្ពស់បាន សម្រស់ក៏សមល្មម អ្នកជុំវិញតែងនិយាយថាខ្ញុំល្អគន់។ សព្វថ្ងៃខ្ញុំគឺជាគណនេយ្យកររបស់ក្រុមហ៊ុនធំមួយ ចំណូលច្រើនគួរសម។ អាចនិយាយបានថាជីវិតសព្វថ្ងៃគឺសមប្រកបខ្លាំងណាស់ ឯករាជ្យរឿងលុយកាក់ អាចមើលថែខ្លួនឯង និងឪពុកម្ដាយបានយ៉ាងល្អ។ យ៉ាងណាមិញ ឪពុកម្ដាយខ្ញុំមិនបានគិតដូចនេះឡើយ ជាពិសេសគឺម៉ាក់តែម្ដង។ គាត់មិនស្ងប់ចិត្ត ព្រោះមិនដឹងថាពេលណាទើបខ្ញុំមានប្ដី នៅពេលដែលមិត្តរួមជំនាន់ខ្ញុំ សុទ្ធតែមានកូន១ ២អស់ហើយ។

រាល់ពេលបាយជុំគ្នា ប្រធានបទដែលមិនអាចជៀសផុតនោះគឺពេលណាទើបខ្ញុំមានគ្រួសារ។ គាត់ថា ខ្ញុំរៀនសូត្រ ការងារមានត្រឹមត្រូវ ម៉េចក៏អន់ជាងអ្នកដទៃ ដែលរៀនទាបជាងខ្ញុំ។ ហើយរវល់តែការងាររហូតបែបនេះ រើសបែបនេះ ពេលណាទើបពួកគាត់មានចៅពរនឹងគេ។ នៅពេលខ្លះ នៅពេលដែលមិត្តភ័ក្ដិហៅការ ខ្ញុំតែងទៅចូលរួមដោយលាក់ពួកគាត់ជានិច្ច ព្រោះបើគាត់ដឹងថា មិត្តខ្ញុំម្នាក់ទៀតការ ប្រាកដជារអ៊ូពេញមួយថ្ងៃមិនខាន។ បើរោងការណាដែលខ្ញុំលាក់មិនជិត គឺដឹងតែជីកសួរខ្ញុំពេញមួយថ្ងៃតែម្ដង ថាគេការអស់ហើយ ពេលណាបានដល់វេនខ្ញុំ។

តាមការពិត មានគេស្រលាញ់ខ្ញុំដែរ តែរកបានអ្នកដែលនៅក្បែរគ្នាអស់មួយជីវិតគឺមិនងាយទេ មិនអាចចេះតែរើសឲ្យតែបានឡើយ។ ខ្ញុំតែងពន្យល់ប្រាប់ប៉ាម៉ាក់ថា ការយឺតក៏បានដែរ កុំឲ្យតែការខុស។ ស្ងាត់បានតែប៉ុន្មានថ្ងៃ បទចម្រៀងចាស់ ក៏ត្រូវពួកគាត់ផ្សាយឡើងវិញទៀត។

ម៉ាក់ខ្ញុំទៅណាមកណា ក៏តែងសួរថា មានកូនប្រុសអ្នកណាល្អអត់ អាងណែនាំឲ្យខ្ញុំ ធ្វើដូចខ្ញុំ អត់ខ្លាំងណាស់ចឹង។ ពេលខ្លះខ្ញុំគិតថា ប៉ាម៉ាក់ចង់រកបានតែអ្នកណាម្នាក់ ហើយលើកខ្ញុំឲ្យបាត់ៗទេ។ សម្ពាធការងារហើយ មកដល់ផ្ទះ សម្ពាធរឿងយកប្ដីទៀត។ ថ្ងៃខ្លះគិតខ្លួនឯងដែរថា យកអ្នកណាមួយឲ្យហើយ ឲ្យប៉ាម៉ាក់ឈប់តឿនទៀត តែគិតថាសុភមង្គលរបស់យើងទាំងមូល មិនអាចលេងសើចបាន ក៏សម្ងំស្ដាប់ពួកគាត់រអ៊ូតទៀតទៅ៕

ចុចអាន៖មិនចាំបាច់ចង់បញ្ឈឺសង្សារចាស់ទេ ធ្វើរឿង ៥ យ៉ាងនេះឲ្យតែបានទៅជីវិតក៏ល្អណាស់

ប្រភព៖ Guu អត្ថបទ៖Caramel