ព្រោះតែការលេងសើចជាមួយស្រីផ្សេង ធ្វើឲ្យអ្នកបាត់បង់មនុស្សដែលខ្លួនស្រលាញ់ពិត

2019-01-30 08:00:00
ចំនួនមតិ 0 | ចំនួនចែករំលែក 0

សួរថាជាមនុស្សស្រីដូចគ្នា អ្នកណាមិនឈឺចាប់ពេលបុរសខ្លួនស្រលាញ់មកប្រាប់ថា ស្រីដទៃគឺគាត់គ្រាន់តែលេងសើចប៉ុណ្ណោះ? ប៉ុន្តែការលេងសើចកន្លងមកបែរជាមិនអី ស្រាប់តែជាប់ដៃជាមួយមនុស្សស្រីចុងក្រោយដែលគាត់ប្រាប់ថា ម្នាក់នោះជាស្រីចុងក្រោយហើយ ហើយគាត់នឹងឈប់រហូត។

រូបតំណាង

ពិតមែនមនុស្សស្រីម្នាក់នោះពិតជាអ្នកចុងក្រោយដែលគាត់បានលេងសើចមែន ព្រោះគាត់នឹងត្រូវរៀបការជាមួយនាង។ យើងទាំងពីរនាក់ស្រលាញ់គ្នាជិត ១០ ឆ្នាំមកហើយ ឆ្លងកាត់ឧបសគ្គច្រើនរាប់មិនអស់ ប្រៀបដូចជាការធ្វើសង្គ្រាមនៅលើសមរភូមិដ៏ធំធេងដែរ។ ចរិតខិលខូច តែលាក់មុខជាសុភាពបុរសរបស់គាត់ ខ្ញុំក៏ដឹង ហើយក៏មិននិយាយស្ដីអ្វីដែរ។ យូរៗទម្លាប់បែបនោះក៏មិនអាចកែបាន ដោយហត់ចិត្តនឹងរឿងស្រីញីច្រើន ខ្ញុំក៏សូមដកខ្លួន តែគាត់មិនព្រម គាត់ថាគាត់នឹងបញ្ចប់ជាមួយនារីម្នាក់នោះដោយខ្លួនឯង និងជាលើកចុងក្រោយ។

ព្រោះតែការជឿទុកចិត្ត ៣ ខែកន្លងទៅខ្ញុំក៏ឮដំណឹងថា គាត់បែរជាជិតចូលរោងការជាមួយម្នាក់នោះ។ រឿងទាំងនោះ គឺចេញពីមាត់សម្លាញ់គាត់ ហើយគេក៏ជាមិត្តខ្ញុំដែរ ដើម្បីចង់ដឹងចម្លើយពិត ខ្ញុំក៏ណាត់សង្សារមកនិយាយគ្នាតទល់។ គាត់ថា សូមឲ្យខ្ញុំចាំ ព្រោះគាត់ការដើម្បីបំពេញមុខខាងស្រីតែប៉ុណ្ណោះ។ មិនបាច់ឮដល់រៀបការរួច ៥ ៦ ខែក្រោយលែង គ្នាទេ ខ្ញុំឮត្រឹមតែពាក្យ «រៀបការ» ទឹកភ្នែកក៏ហូរមកបាត់ទៅហើយ។

បុរសម្នាក់នោះព្យាយាមប្រាប់ពីហេតុផលដែលត្រូវរៀបការថា មកពីពេលជ្រុលជ្រួសជាមួយគ្នាសាច់ញាតិម្ខាងទៀតចាប់បាន ហើយគេក៏បង្ខំឲ្យរៀបការ។ ប៉ុន្តែខ្ញុំមិនបន្ទោសនារីដូចគ្នានោះទេ គឺមកពីគាត់ខ្លួនឯងដែលចូលចិត្តប្រព្រឹត្តទង្វើថោកទាបនោះខ្លួនឯង។

រៀបការកសាងគ្រួសារឲ្យមានសុភមង្គលចុះថ្លៃ ហើយក៏មិនបាច់បែកគ្នាវិញដែរ ខ្ញុំមិនទទួលយកអ្នកទៀតទេ មនុស្សប្រុសដែលយកនារីត្រឹមការកំដរអារម្មណ៍បែបនេះ។

រឿងដែលខ្ញុំចង់ចែករំលែកនេះ មិនមែនចង់បន្ទោសស្រីម្នាក់នោះទេ តែចង់ឲ្យបុរសៗដឹងថា បើមានមនុស្សខ្លួនស្រលាញ់ស្មោះត្រង់ហើយ គួរតែថែរក្សាឲ្យបានគង់វង្ស។ មួយវិញទៀតរឿងដែលមនុស្សប្រុសតែងនិយាយថា មានស្រីផ្សេងគ្រាន់តែជាការលេងសើច វាជាពាក្យបំផ្លាញជំនឿចិត្តម្ខាងទៀត ព្រោះនារីណាក៏មិនចង់ឲ្យសង្សារខ្លួនចែករំលែកក្ដីស្រលាញ់ ហើយក៏ជាការមើលងាយស្រ្តីភេទ។