មេរៀនធំបំផុតក្រោយស្នេហាមួយកន្លងផុត នោះគឺកុំឲ្យគេដឹងថាយើងស្រលាញ់គេច្រើនជាង
- 2019-01-28 03:00:00
- ចំនួនមតិ 0 | ចំនួនចែករំលែក 0
មេរៀនធំបំផុតក្រោយស្នេហាមួយកន្លងផុត នោះគឺកុំឲ្យគេដឹងថាយើងស្រលាញ់គេច្រើនជាង
ខ្ញុំតែងតែជឿជាក់ថា ក្នុងរឿងមនោសញ្ចេតនា ស្រលាញ់តិចឬច្រើន យូរឬរហ័សគឺមិនសំខាន់ឡើយ ឲ្យតែពេលស្រលាញ់គឺស្មោះនឹងគ្នាគឺបានហើយ តែហាក់ដូចអ្វីដែលខ្ញុំគិតមិនទាន់ត្រូវឡើយ។
រឿងស្នេហា កំហុសដ៏ធំបំផុតនោះគឺ ឲ្យភាគីម្ខាងទៀតដឹងថាយើងស្រលាញ់គេច្រើនជាងគេស្រលាញ់យើង។ ពេលខ្លះស្រីៗគ្នាខ្ញុំតែងជជែកគ្នាពីស្នេហាទាំងឡាយដែលធ្លាប់បានឆ្លងកាត់ក្នុងជីវិតពួកខ្ញុំ។ ហើយពួកបងៗ តែងមានដំបូន្មានដូចគ្នាថា៖ ពេលស្ថិតក្នុងចំណងមនោសញ្ចេតនាណាមួយ កុំទុកឲ្យគេដឹងថា យើងត្រូវការគេ ហើយក៏មិនត្រូវបង្ហាញពីមនោសញ្ចេតនាខ្លាំងពេកដែរ។ កុំឲ្យគេចាប់បានចំណុចខ្សោយរបស់យើងបានឲ្យសោះ។ ព្រោះគេអាចនឹងយកវាមកលេងសើច ឬធ្វើបាបយើងបានដោយងាយ។
ការពិតទៅ អ្វីដែលពួកគាត់និយាយគឺមិនខុសទេ ថែមទាំងត្រូវខ្លាំងចំពោះស្នេហាពេលបច្ចុប្បន្នទៀតផង។ តែនៅពេលឈានជើងចូលមនោសញ្ចេតនាខ្លួនឯងផ្ទាល់ អ្វីៗនឹងខុសប្លែក។ មនុស្សគ្រប់រូប មានការស្រលាញ់ខុសពីគ្នា ការបង្ហាញពីក្ដីស្រលាញ់ក៏ខុសគ្នា។ មិនមែនអ្នកណាក៏ឈ្លាសវៃអាចទប់អារម្មណ៍ខ្លួនឯងមិនបង្ហាញចេញក្រៅទាំងអស់ឡើយ ហើយក៏មិនមែនអ្នកណាក៏ចង់ឆោតដល់ថ្នាក់លង់ខ្លួនដកមិនរួច លះបង់គ្រប់បែបយ៉ាងដើម្បីមនុស្សម្នាក់ដែលលែងស្រលាញ់ខ្លួននោះដែរ។
តែចំពោះខ្ញុំផ្ទាល់ ខ្ញុំតែងគិតថា ស្រលាញ់យូរ ឬខ្លី តិចឬច្រើនមិនសំខាន់ទេ អ្វីដែលសំខាន់នោះគឺ យើងអាចរស់ពិតនឹងអារម្មណ៍របស់ខ្លួនឯង។ បើនៅមុខមនុស្សយើងស្រលាញ់ តែមិនអាចបង្ហាញចេញមក ហើយត្រូវព្យាយាមលាក់បាំងនោះ សួរថាស្នេហាមួយនេះមានន័យអ្វី?
តែក៏ដោយសារតែ ការស្រលាញ់បែបស្មោះត្រង់នេះហើយ ដែលធ្វើឲ្យខ្ញុំក្លាយជាជនរងគ្រោះនៃស្នេហាមិនតិចដងឡើយ។ ខ្ញុំមានទម្លាប់មួយនោះគឺ នៅពេលដាក់ចិត្តស្រលាញ់នរណាម្នាក់ហើយ គឺបង្ហាញចេញទាំងអស់ ដែលជាហេតុធ្វើឲ្យគេតែងចាប់បានចំណុចខ្សោយមួយនេះ ហើយយកវាមកធ្វើបាបខ្ញុំវិញ ព្រោះគេដឹងថា ខ្ញុំស្រលាញ់គេច្រើនជាងគេស្រលាញ់ខ្ញុំ។
ក្រោយបែកបាក់ស្នេហាជាច្រើនទើប ខ្ញុំដកពិសោធន៍ឃើញថា យើងស្រលាញ់គេ ១០ បង្ហាញតែ ៥ បានហើយ ព្រោះយើងបង្ហាញអស់ ក៏គេមិនបានឲ្យតម្លៃវាទាំងអស់ដែរ ដោយថែមទាំងយកវាមកជាន់ឈ្លីក៏ថាបាន៕
ចុចអាន៖ខ្ញុំមិនចូលចិត្តទំនាក់ទំនងមិនច្បាស់លាស់ទេ ដូច្នេះបើមិនប្រាកដទេ កុំស្រឡាញ់ខ្ញុំ