គួរឱ្យស្ញប់ស្ញែង! នារីខ្មែរ៦រូបនៅរស់នៅក្រៅប្រទេស ជាធនធានផ្នែកកីឡាដ៏សំខាន់សម្រាប់កម្ពុជា

2018-12-26 04:44:48
ចំនួនមតិ 0 | ចំនួនចែករំលែក 0

កីឡាការិនីកូនកាត់ជាច្រើននាក់រស់នៅក្រៅប្រទេសក្នុងនោះកីឡាការិនីមួយចំនួនប្រកួតតំណាងឲ្យប្រទេសកម្ពុជា និងបានលើកទង់ជាតិកម្ពុជាលើឆាកអន្តរជាតិជាច្រើនមកហើយដែរ។ ពួកគាត់ជាធនធានកីឡាដ៏សំខាន់សម្រាប់កម្ពុជាត្រៀមចូលរួមព្រឹត្តិការណ៍សំខាន់ៗនាពេលខាងមុខ។ នេះសូមបង្ហាញកីឡាការិនីខ្មែរ៦នាក់កំពុងរស់នៅក្រៅប្រទេស។

១- កីឡាការិនី ស្រួង ភាវី

ស្រួង ភាវី ជាកីឡាការិនីដ៏មានទេពកោសល្យផ្នែកកីឡាស្នូកឃ័រ និងប៊ីយ៉ាដែលតែងតែធ្វើឲ្យពលរដ្ឋកម្ពុជាមានមោទនភាពចំពោះរូបនេះដែលឈ្នះការប្រកួតកម្រិតតំបន់ និងពិភពលោកជាច្រើនក្នុងរយៈពេលប៉ុន្មានឆ្នាំចុងក្រោយនេះ។ មែនទែនទៅ កីឡាការិនីកម្ពុជារូបនេះមានកេរ្តិ៍ឈ្មោះល្បីនៅប្រទេសកូរ៉េខាងនៅប្រទេសកំណើតថែមទៀត។

កីឡាការិនីដែលមានដើមកំណើតនៅខេត្តត្បូងឃ្មុំរូបនេះមិនមែនមានទេពកោសល្យកីឡាពីតូចនោះទេ ប៉ុន្តែការផ្ញើជីវិតទៅរស់នៅប្រទេសទី២នៅពេលរូបនាងពេញវ័យទៅហើយបានធ្វើឲ្យនាងមានឱកាសហ្វឹកហាត់កីឡាប្រភេទនេះ។ ការខិតខំហ្វឹកហាត់ និងជម្នះរាល់ការលំបាកទើបធ្វើឲ្យទទួលបានលទ្ធផលគួរទីមោទនៈ។

២- កីឡាការិនី ខាន់ ចេសា

កីឡាការិនីចំបាប់ជឺជិតស៊ូ ខាន់ ចេសា បានធ្វើឲ្យផ្ទុះខ្លាំងទាំងនៅប្រទេសកម្ពុជា និងសហរដ្ឋអាមេរិកនៅពេលរូបនាងតំណាងឲ្យកម្ពុជាឈ្នះមេដាយមាសកីឡាទ្វីបអាស៊ីកាលពីខែកញ្ញា ឆ្នាំ២០១៨នេះ។ កីឡាការិនីជាកូនស្រីរបស់ឪពុកជាជនជាតិខ្មែរ និងម្តាយជាជនជាតិអាមេរិកបានហ្វឹកហាត់កីឡាជឺជិតស៊ូតាំងពីអាយុ៦ឆ្នាំ និងឈ្នះមេដាយ ព្រមទាំងជើងឯកជាច្រើនក្នុងរយៈពេលប៉ុន្មានឆ្នាំកន្លងទៅនេះ។ ខាន់ ចេសា បានក្លាយជាសេចក្តីសង្ឃឹមរបស់កម្ពុជាសម្រាប់ការចូលរួមប្រកួតក្នុងព្រឹត្តិការណ៍កីឡាអន្តរជាតិធំៗនាពេលខាងមុខ។

៣- កីឡាការិនី ឯម សុវណ្ណារី

ទើបលេចមុខក្នុងពិភពប្រដាល់គុនចម្រុះថ្មីៗនេះទេ ប៉ុន្តែកីឡាការិនី ឯម សុវណ្ណារី ក៏បានលើកទង់ជាតិកម្ពុជានៅលើសង្វៀន ONE Championship ដែលមានមនុស្សរាប់លាននាក់ឃើញការប្រកួតរបស់នាង។ នាពេលខាងមុខ កីឡាការិនីដែលមានដើមកំណើតនៅអាមេរិករូបនេះនឹងបន្តតំណាងឲ្យកម្ពុជាចូលរួមប្រកួតគុនចម្រុះក្នុងសង្វៀនដ៏ធំនេះទៀត ហើយត្រូវគេរំពឹងថា នឹងក្លាយជាកីឡាការិនីខ្លាំងម្នាក់លំដាប់ពិភពលោករបស់កម្ពុជា។

៤- កីឡាការិនី Sandra Hill

កីឡាការិនីបាល់ទាត់ខ្មែរ-អូស្ត្រាលី កញ្ញា Sandra Hill បានមកចូលរួមជាមួយក្រុមជម្រើសជាតិនារីកម្ពុជាកាលពីពាក់កណ្តាលខែមិថុនាកន្លងទៅនេះដើម្បីតំណាងឲ្យកម្ពុជាចូលរួមប្រកួតពានរង្វាន់នារីកម្រិតអាស៊ាន AFF Women's Championship ឆ្នាំនៅប្រទេសឥណ្ឌូណេស៊ី។ កីឡាការិនីដែលជាក្មួយស្រីរបស់លោក ប្រាក់ សុវណ្ណារ៉ា លេងឲ្យក្រុមជម្រើសជាតិនារីកម្ពុជាបាន៤ប្រកួតក្នុងព្រឹត្តិការណ៍នេះដែលរួមចំណែកឈ្នះក្រុមនារីទីម័រខាងកើត ១២-០ ប៉ុន្តែចាញ់៣ប្រកួត។ កញ្ញាដែលត្រូវបានគេមើលឃើញថា មានកម្រិតគុណភាពខ្ពស់ជាងកីឡាការិនីកម្ពុជាមានរូបសម្ផស្សស្រស់ស្អាតគួរឲ្យចាប់អារម្មណ៍។

៥- កីឡាការិនី Tubb Casandre Nicole

កីឡាការិនីខ្មែរកាត់អាមេរិកកញ្ញា Tubb Casandre Nicole ទទួលបានការចាប់អារម្មណ៍ខ្លាំងពីបណ្តាប្រទេសផ្សេងៗដែលបានចូលរួមប្រកួតក្នុងព្រឹត្តិការណ៍កីឡាស៊ីហ្គេមកាលពីឆ្នាំ២០១៧។ កីឡាការិនីរូបនេះមានជំនាញកីឡាតេក្វាន់ដូ និងឈ្នះមេដាយសំរឹទ្ធស៊ីហ្គេមជូនជាតិ។ គ្រូបង្ហាត់តេក្វាន់ដូកម្ពុជាសញ្ជាតិកូរ៉េខាងត្បូងលោក Choi Yong Sok រំពឹងថា កីឡាការិនីរូបនេះនឹងក្លាយជាធនធានដ៏សំខាន់សម្រាប់កម្ពុជាក្នុងការចូលរួមប្រកួតព្រឹត្តិការណ៍អូឡាំពិកនៅទីក្រុងតូក្យូប្រទេសជប៉ុនឆ្នាំ២០២០។

៦- កីឡាការិនី Ka Andrea Daravy

កីឡាការិនីវាយកូនបាល់កម្ពុជា Ka Andrea Daravy បានចូលរួមតំណាងឲ្យជម្រើសជាតិកម្ពុជាលើប្រភេទកីឡាវាយកូនបាល់ច្រើនឆ្នាំហើយ។ កីឡាការិនីកើតនៅប្រទេសបារាំងដែលមានឪពុកម្តាយជាខ្មែររៀនជំនាញទីផ្សារនៅសាកលវិទ្យាល័យ San Francisco សហរដ្ឋអាមេរិក។ កីឡាការិនីរូបនេះធ្លាប់ចូលរួមប្រកួតកីឡាស៊ីហ្គេម២ដងហើយគឺឆ្នាំ២០១៥ និង២០១៧។ កាលពីឆ្នាំ២០១៧កន្លងទៅ កញ្ញាឈ្នះបានមេដាយសំរឹទ្ធលើវិញ្ញាសាវាយទោលឲ្យកម្ពុជាដែរ៕

អត្ថបទ៖ ជាន ចាន់រ៉ា