វ៉ាមុខ៩០ប្រទេស វៀតណាមគ្រងមកុដបវរកញ្ញាផែនដីជាលើកទី១

2018-11-04 06:20:00
ចំនួនមតិ 0 | ចំនួនចែករំលែក 0

មុនវគ្គផ្ដាច់ព្រ័ត្រប្រព្រឹត្តឡើង តំណាងមកពីប្រទេសវៀតណាមត្រូវបានគេសន្និដ្ឋានថា អាចនឹងជាប់ត្រឹមចំណាត់ថ្នាក់លេខ១០ ក្នុងការប្រលងបវរកញ្ញាផែនដី២០១៨ តែទីបំផុត នាងបានលើកពានលេខ១តែម្ដង។

កាលពីយប់ថ្ងៃទី៣ ខែវិច្ឆិកានេះ កម្មវិធីប្រលងបវរកញ្ញាផែនដី (Miss Earth) 2018 ត្រូវបានធ្វើឡើងនៅប្រទេសហ្វីលីពីន ក្រោមការចូលរួមប្រកួតពីបេក្ខនារីមកពី៩០ប្រទេសទូទាំងពិភពលោក។ ក្រោយរយៈពេលប្រលងអស់ជាង១ខែ នៅទីបំផុត មកុដបវរកញ្ញាឆ្នាំថ្មីក៏រកបានម្ចាស់ហើយ ដោយម្ចាស់មកុដឆ្នាំនេះ គឺតំណាងមកពីប្រទេសវៀតណាម បវរកញ្ញា Nguyen Phuong Khanh។

មុនពេលឈានដល់វគ្គចុងក្រោយ គេហទំព័រ វាយតម្លៃសម្រស់ Missosology ទស្សន៍ទាយថា ស្រីស្អាតវ័យ២៤ឆ្នាំ មានសង្ឃឹមអាចចូលដល់វគ្គជម្រុះ១០នាក់ តែមិនអាចជ្រៅជាងនេះបានឡើយ។ យ៉ាងណាក្ដី នាងបានធ្វើឲ្យគេភ្ញាក់ផ្អើល ពេលមិនត្រឹមតែបានចូលដល់វគ្គជម្រុះ៥នាក់នោះទេ គឺថែមទាំងលើកពានបវរកញ្ញាតែម្ដង។

Nguyen Khanh Phuong កើតនៅឆ្នាំ១៩៩៤ មានកម្ពស់ ១.៧២ម ទម្ងន់៥១គីឡូ មានស្រុកកំណើតនៅខេត្ត Ben Tre វៀតណាម។ មុនពេលគ្រងមកុដលើឆាកអន្តរជាតិ នាងគឺជាបវរកញ្ញាសមុទ្រលេខ២ឆ្នាំ២០១៨ នៅវៀតណាម។ គួរបញ្ជាក់ផងដែរថា នេះគឺជាលើកទី១ហើយ ដែលតំណាងមកពីវៀតណាមទទួលបានជយលាភីខ្ពស់បំផុត ក្នុងកម្មវិធីប្រលងបវរកញ្ញាផែនដី Miss Earth៕