មិនមែនតែនៅកំពត! បាត់ដំបងក៏មានកន្លែងអុំទូកកៃយ៉ាក់ និងកញ្ចុះតាមមាត់ព្រែកដែរ

2018-10-12 08:40:48
ចំនួនមតិ 0 | ចំនួនចែករំលែក 0

កញ្ចុះមាត់ព្រែកមួយកន្លែងដែលមានទីតាំងស្ថិតនៅក្នុងភូមិសាលាបាឡាត់ សង្កាត់អូរម៉ាល់ ក្រុងបាត់ដំបង ខេត្ដបាត់ដំបង ខាងជើងរង្វង់មូលនាងរំសាយសក់ ៨០០ម៉ែត្រ ក្នុងបរិវេណសួនទឹកសុភមង្គល។ នៅកន្លែងមួយនេះ មានសួនច្បារដ៏ស្រស់ស្អាត មានកញ្ចុះសម្រាប់អង្គុយបរិភោគអាហារ និងអាចអុំទូកកៃយ៉ាក់លេងយ៉ាងសប្បាយ ដែលមានតម្លៃត្រឹម៥០០០រៀលក្នុងមួយម៉ោង។

តាមការរៀបរាប់របស់ លោក អ៊ឹង ឈីវឡេង អ្នកចាត់ការទូទៅ នៅក្នុងសួនទឹក សុភមង្គល បានប្រាប់មកកាន់វិបសាយ "កញ្ញា" ថា "សម្រាប់អ្នកដែលបានទៅដល់ទឹកដីខេត្តបាត់ដំបង អាចឆៀងចូលទៅអង្គុយលេងកញ្ចុះដោយឥតគិតថ្លៃក្នុងថ្ងៃធម្មតា ប៉ុន្តែនៅពេលថ្ងៃមានបុណ្យទាន ភ្ញៀវត្រូវបង់២០០០០រៀលក្នុងមួយកញ្ចុះ"។

អ្នកចាត់ការទូទៅបានបន្តទៀតថា "ភ្ញៀវទាំងអស់មិនអនុញ្ញាតឲ្យយកម្ហូបពីខាងក្រៅចូលឡើយ ប៉ុន្តែអាចកុម្ម៉ង់ម្ហូបនៅទីនេះក្នុងតម្លៃសមរម្យ ដូចជាមាត់ដុតមួយ៥០០០០រៀល (មាន់ខ្មែរ) និង៤០០០០រៀលសម្រាប់មាន់៣សាសន៍”។

គួរបញ្ជាក់ដែរថា កញ្ចុះមាត់ព្រែក ទើបតែបើកដំណើរការមិនយូរប៉ុន្មានទេ ឃើញមានអ្នកចាប់អារម្មណ៍ និងទៅលេងយ៉ាងច្រើនកុះករ ថែមទាំងមានកន្លែងស្អាតៗអាចថតរូបលេងផងដែរ។ សម្រាប់ពត៌មានលម្អិិត អាចចូលទៅកាន់ទំព័រហ្វេសបុក មជ្ឈមណ្ឌល សុភមង្គល ក្រុងបាត់ដំបង - Sopheak Mongkul Center