តោះសាកល្បងធ្វើអ្វីថ្មីក្នុងភ្ជុំបិណ្ឌឆ្នាំនេះ

2018-10-05 09:21:17
ចំនួនមតិ 0 | ចំនួនចែករំលែក 0

បុណ្យភ្ជុំបិណ្ឌក្រៅពីធ្វើដំណើរទៅជួបជុំគ្រួសារ និងយកចង្ហាន់ទៅវត្តហើយ ដើម្បីឲ្យការឈប់សម្រាកនេះរឹតតែមានន័យ អាចសាកល្បងគម្រោងសម្រាប់ទៅវត្តពិសេសៗដែលគួរឲ្យចាប់អារម្មណ៍មួយចំនួនខាងក្រោមនេះ៖

១. ទៅវត្តដែលនៅដាច់ស្រយាល៖

ទៅវត្តធ្វើបុណ្យ ហើយបើទៅធ្វើបុណ្យជាមួយវត្តដែលកំពុងជួបភាពខ្វះខាតផង នឹងបានបុណ្យកាន់តែច្រើន។ មានវត្តជាច្រើននៅក្នុងប្រទេសយើងដែលពុំសូវមានឈ្មោះល្បីល្បាញ ឬក៏មិនសូវមានអ្នកចាច់អារម្មណ៍ទៅ ដូចនេះភ្ជុំបិណ្ឌឆ្នាំនេះ អាចយកចង្ហាន់ឬបច្ច័យទៅធ្វើបុណ្យសន្សំកុសលជាមួយវត្តទាំងនោះក៏ជាការល្អដែរ ព្រោះបានផ្លាស់ប្ដូរបរិយាកាស និងបានធ្វើបុណ្យចំកន្លែងដែលកំពុងត្រូវការជំនួយខ្លាំង។

២. ទៅវត្តដោយជិះឡានក្រុង៖

នៅក្នុងក្រុងភ្នំពេញមានខ្សែរថយន្តក្រុងរហូតទៅដល់១៣ខ្សែដែលអាចជូនទៅដល់ស្ទើរគ្រប់ទី កន្លែងក្នុងក្រុងភ្នំពេញ ។សម្រាប់អ្នកដែលចង់ទៅវត្តក្នុងក្រុងភ្នំពេញឆ្នាំនេះ អាចសាកល្បងជ្រើសរើសមធ្យោបាយធ្វើដំណើរដោយរថយន្តក្រុងបានព្រោះ ចំណាយតិច ត្រជាក់ស្រួល ការពារភ្លៀង ហើយណាមួយបានជួយកាត់បន្ថយការកកស្ទះចរាចរណ៍ផង។

៣. ទៅវត្តជាមួយមិត្តចាស់ៗ៖

នឹកមិត្តធ្លាប់រៀនជាមួយគ្នាតាំងពីជំនាន់វិទ្យាល័យ ដែលបែកគ្នាយូរទេ? បុណ្យភ្ជុំឆ្នាំនេះជាឱកាសល្អដែលអាចហៅមិត្តចាស់ៗជួបជុំទៅវត្តធ្វើបុណ្យជាមួយគ្នា រំលឹកអនុស្សាវរីយ៍ចាស់ៗហើយបង្កើតការចងចាំល្អៗជាថ្មីទៀត។

៤. កាត់បន្ថយការប្រើប្រាស់ប្លាស្ទិកក្នុងវត្ត៖ ឆ្នាំ២០១៨នេះ មានសកម្មភាពជាច្រើនដែលគាំទ្រនូវការកាត់បន្ថយការប្រើប្រាស់ថង់ប្លាស្ទិក ដើម្បីសម្អាតបរិស្ថានឲ្យមានភាពល្អប្រសើរ។ ការទៅវត្តដោយប្រើប្រាស់ថង់ប្លាស្ទិកតិច ឬមិនប្រើប្រាស់វាតែម្ដង ជាគំរូល្អមួយដែលគាំទ្រដល់ការគិតឡើងវិញពីការប្រើប្រាស់ថង់ប្លាស្ទិកដ៏ច្រើនលើសលុបក្នុងប្រទេសរបស់យើង និងជួយថែរក្សាបរិស្ថានក្នុងកំឡុងរដូវកាលភ្ជុំបិណ្ឌឆ្នាំនេះផងដែរ។

ចុះអ្នកមានគម្រោងអ្វីពិសេសសម្រាប់ធ្វើនៅក្នុងឱកាសបុណ្យភ្ជុំបិណ្ឌនេះដែរឬទេ?

អត្ថបទ៖ Khuon Sovanvatey