មិត្តភ័ក្ដិ៥ប្រភេទដែលអ្នកនឹងទៅវត្តជាមួយរដូវភ្ជុំនេះ
- 2018-10-04 23:16:00
- ចំនួនមតិ 0 | ចំនួនចែករំលែក 0
មិត្តភ័ក្ដិ៥ប្រភេទដែលអ្នកនឹងទៅវត្តជាមួយរដូវភ្ជុំនេះ
មួយឆ្នាំបុណ្យភ្ជុំបិណ្ឌម្ដង នាំគ្នាទៅវត្តជាមួយមិត្តភក្ដិ ឬក្រុមគ្រួសារ ដើម្បីធ្វើបុណ្យផងនឹងបានសាងអនុស្សាវរីយ៍និងភាពសប្បាយរីករាយជាមួយគ្នាអោយបានច្រើន។ បរិយាកាសទៅវត្តកាន់តែសប្បាយរីករាយ បើសិនជាអ្នកបានទៅវត្តជាមួយអ្នកណាម្នាក់ក្នុងចំណោមមនុស្សទាំង៥ប្រភេទនេះ ៖
១. អ្នកទៅវត្តលើកដំបូង
អ្នកណាក៏ធ្លាប់មានលើកដំបូងដែរ គ្នាយើងដែលមិនដែលទៅវត្តសោះនឹងជួបប្រទះរឿងទាំងអស់នេះពេលដែលទៅវត្តលើកដំបូង ដូចជា មិនសូវដឹងពីរបៀបរបបក្នុងការប្រារព្ធពិធីបុណ្យភ្ជុំបិណ្ឌ មិនដឹងថាចូលវត្តគេធ្វើម៉េចខ្លះ ហើយរណ្ដាប់ប្រគេនព្រះសង្ឃគួរតែមានអ្វីខ្លះទៀត។ បើអ្នកទៅវត្តជាមួយមនុស្សប្រភេទនេះ ប្រៀបដូចជាយកកូនតូចទៅជាមួយអញ្ចឹង។ ដូចនេះហើយជួយណែនាំគាត់ពីទំនៀមទម្លាប់នៃការចូលក្នុងវត្តអារាមផងណា។
២. អ្នកនាំផ្លូវ
មគ្គុទ្ទេសក៍ប្រចាំវត្ត គាត់ណែនាំអោយស្គាល់គ្រប់កន្លុកកន្លៀតក្នុងវត្តទាំងអស់ ហើយថែមទាំងពន្យល់ប្រាប់តាំងពីប្រវត្តិ រឿងរ៉ាវ លំនាំដើមទងតាំងពីចូលក្នុងក្លោងទ្វារវត្ត រហូតដល់ចេញទៅវិញ មិនតែប៉ុននឹងជូនយើងដើរកម្សាន្តទៅរមណីយដ្ឋានក្បែរវត្តទៀត ។ អ្នកបានទៅវត្តជាមួយមនុស្សប្រភេទនេះ សប្បាយម្យ៉ាងព្រោះបានទៅវត្តធ្វើបុណ្យហើយបានដើរលេងទៀត។
៣. ស្រីស្អាត
ជានិច្ចកាលក្នុងឳកាសបុណ្យភ្ជុំបិណ្ឌ ស្រីៗគ្នាយើងតែងតែស្លៀកសំលៀកបំពាក់អាវប៉ាក់ស សំពត់បត់ តែងខ្លួនស្អាតៗទៅវត្ត។ អ្នកបានទៅជាមួយស្រីស្អាត នឹងក្លាយជាទីចំណាប់អារម្មណ៍របស់មនុស្សជាច្រើនដែលបានចូលរួមក្នុងឱកាសបុណ្យភ្ជុំបិណ្ឌនេះ។ មួយឆ្នាំភ្ជុំបិណ្ឌម្ដងចាំកាល លេងខ្លួនអោយស្អាតម្ដង តែក៏មិនគួរភ្លេចគោរពប្រតិបត្តិនូវទំនៀមទម្លាប់ចូលទីវត្តអារាមផងណា។
៤. គូគេ
រដូវកាលបុណ្យភ្ជុំបិណ្ឌអ្នកមានគូ គេបណ្ដើរគូគេទៅធ្វើបុណ្យនៅវត្តជាមួយគ្នាហើយ។ ពេលនោះក៏ជាឳកាសល្អក្នុងការណែនាំគូស្នេហ៍គេទៅកាន់មិត្តភក្ត្រ ក៏ដូចជាក្រុមគ្រួសារគេផងដែរ។ បើអ្នកមិនទាន់មានគូបណ្ដើរគ្នាទៅវត្តទេ កុំច្រណែនគេអី ព្យាយាមបន្តទៀតក្នុងឆ្នាំក្រោយណា។
៥. ស្ដេចថតរូប
មនុស្សម្នាក់នេះប្រៀបដូចជា ជើងកាមេរ៉ាដែលចេះដើរអញ្ចឹង ដើរថត អង្គុយថត ឈរថត ថតរូបអោយច្រើនទុក បង្ហោះក្នុងបណ្ដាញសង្គម ក្នុងក្រុមមានតែគាត់ទេពូកែចាប់ប្លង់ Selfie សារ៉េពន្លឺអី អោយរូបចេញមកម៉ាអ៊ែម។ ពេលទៅវត្ត បានមនុស្សម្នាក់នឹងហើយជួយថតរូបក្រុមទុកជាអនុស្សាវរីយ៍អោយ បើអ្នកទៅវត្តហើយឃើញមនុស្សម្នាក់កាន់ទូរស័ព្ទឬ កាមេរ៉ាហើយអោនងើបៗនោះ ម្នាក់នឹងហើយជាស្ដេចថតរូប។