បទពិសោធន៍នារីផិតប្ដីម្នាក់ ដែលស្រីៗគួរអានយ៉ាងហោចម្ដងក្នុងជីវិត

2018-09-20 03:18:06
ចំនួនមតិ 0 | ចំនួនចែករំលែក 0

បើសិនជាអ្នកជាមនុស្សស្រី គួរអានអត្ថបទនេះយ៉ាងហោចម្ដង កុំឲ្យស្ដាយក្រោយទៅថ្ងៃអនាគត។ ពេលខ្លះខ្ញុំមានអារម្មណ៍ថាលែងយល់ពីខ្លួនឯង មិនដឹងថាខ្លួនឯងចង់បានអ្វីឲ្យពិតប្រាកដ ថាតើខ្ញុំនៅស្រលាញ់ប្ដីខ្ញុំឬអត់? ហេតុអ្វីប្ដីប្រពន្ធនៅជាមួយគ្នាយូរឆ្នាំ ស្រាប់តែថ្ងៃមួយខ្ញុំលែងមានអារម្មណ៍ថារីករាយ បេះដូងរំជួលទៀត។

រូបតំណាង

ពួកខ្ញុំបានកាន់ដៃគ្នាកាត់ព្យុះភ្លៀងយ៉ាងច្រើន រវល់រកលុយយូរ ក៏ភ្លេចស្រលាញ់គ្នា យល់ពីគ្នាច្បាស់ដល់ថ្នាក់ធុញទ្រាន់។ ខ្ញុំទោះបីជាយ៉ាងណាក៏គ្រាន់តែជាមនុស្សម្នាក់ ខាងក្រៅរឹងមាំដល់ថ្នាក់ណា ក្នុងរឿងស្នេហាក៏ត្រូវការឲ្យគេថ្នាក់ថ្នម។ តែប្ដីខ្ញុំបែរជាគិតថា ភាពរ៉ូមេនទិកសម្រាប់តែគូស្នេហ៍ទើបស្រលាញ់គ្នា មិនសម្រាប់អ្នកមានគ្រួសារដូចខ្ញុំ។

ពេលខ្លះ ខ្ញុំស្រេកឃ្លានរង្វង់ដៃមួយ ស្នាមថើបមួយក្នុងថ្ងៃអនុស្សាវរីយ៍របស់យើងទាំង២។ មិនមែនមកពីបងមិនចាំ តែបងគិតថាវាមិនសំខាន់ ហើយខ្ញុំក៏មិនចាំថា លើកចុងក្រោយដែលពួកយើងថើបគ្នាគឺនៅពេលណាដែរ។

ខ្ញុំជួបបុរសម្នាក់នោះក្នុងពិធីជប់លៀងតូចមួយ។ បុរសនោះក៏ដូចខ្ញុំដែរ មានគ្រួសាររួចហើយ តែកែវភ្នែកដែលគេមើលមកខ្ញុំ ការយកចិត្តទុកដាក់ចំពោះខ្ញុំ ធ្វើឲ្យបេះដូងខ្ញុំលោតញាប់។ មនុស្ស្ស្រីងាយទន់ចិត្តបំផុត នៅពេលពួកគេឯកា។ គេបានបង្ហាញខ្លួននៅពេលដែលខ្ញុំខ្វះខាតមនោសញ្ចេតនាបំផុត។ យប់នោះ គេជូនខ្ញុំមកផ្ទះវិញ ដោយចតឆ្ងាយពីផ្ទះខ្ញុំ ព្រោះខ្លាចប្ដីខ្ញុំយល់ច្រឡំ។

រឿងអ្វីក៏ដូចគ្នា ឲ្យតែចាប់ផ្ដើមរលូនហើយ រឿងបន្តក៏ស្រួលដែរ។ ពួកខ្ញុំចាប់ផ្ដើមផ្ញើសារឲ្យគ្នា ណាត់គ្នាញ៉ាំអី។ មួយថ្ងៃទៅមួយថ្ងៃ គឺនឹកគ្នាស្ទើរស្លាប់។ មិនមែនថា ខ្ញុំមិនដែលមានអារម្មណ៍បែបនេះជាមួយប្ដីខ្ញុំឡើយ តែវាបានបាត់បង់យូរហើយ។ បុរសម្នាក់នេះធ្វើឲ្យខ្ញុំមានអារម្មណ៍ថា មិនមែនស្ត្រីណាមានប្ដី មានកូនក៏លែងមានតម្លៃនោះដែរ គេធ្វើឲ្យខ្ញុំស្រស់បំព្រងឡើងវិញ។

រូបតំណាង

ក្រោយណាត់គ្នាបានមួយរយៈ គាត់ក៏សុំនាំខ្ញុំចូលសណ្ឋាគារ។ ពេលនោះគេមិនបានបង្ខំខ្ញុំឡើយ តែខ្ញុំស្ម័គ្រចិត្តដោយខ្លួនឯង។ ក្រោយរួចរាល់ហើយ ខ្ញុំសួរគេថា៖

តើពួកយើងអាចនៅជាមួយគ្នារហូតបានទេ?
ពួកយើងសុទ្ធតែមានគ្រួសារអស់ហើយ នៅបែបនេះមិនល្អជាងឬអូន?
ចឹងបងលែងប្រពន្ធ អូនលែងប្ដី យើងនៅក្បែរគ្នារហូតបានទេ?

ក្នុងគ្រានោះ ខ្ញុំមានអារម្មណ៍ថាគេមើលមកខ្ញុំភ្ញាក់ផ្អើល គេចាប់រ៉ាយរ៉ាប់ហេតុផលចេញមក។ ហើយពេលនោះដែរ ខ្ញុំចាញ់គេហើយ ព្រោះពួកយើងក្បត់គ្រួសារដូចគ្នា តែគេនៅគិតដល់ប្រពន្ធគេ ឯខ្ញុំបានក្បត់ប្ដីទាំងស្រុងហើយ។ ខ្ញុំចេញពីសណ្ឋាគារដោយគ្មានពោលពាក្យអ្វីមួយម៉ាត់។

ខ្ញុំសុំប្ដីទៅផ្ទះម្ដាយបង្កើត២ថ្ងៃដើម្បីធ្វើអារម្មណ៍ឡើងវិញ។ ប្រាប់ពីដំណើររឿងគ្រប់យ៉ាងឲ្យម៉ាក់ដឹង។ ម៉ាក់ប្រាប់ថា៖

“ជីវិតមនុស្សយើងមិនមែនប្រលោមលោកស្នេហាឯណាកូន កូនមិនអាចទាមទារអ្វីគ្រប់យ៉ាងឲ្យខ្លួនឯងបានទេ។ ប្ដីកូនស្រលាញ់កូន គឺនៅក្បែរកូនមួយជីវិត។ ឯបុរសម្នាក់នោះ ក៏គ្រាន់តែជាមនុស្សជួបកូនតាមផ្លូវប៉ុណ្ណោះ។ ប្ដីកូនមិនចំណាយពេលច្រើនសម្រាប់កូន ព្រោះគេចំណាយពេលច្រើនពេកសម្រាប់គ្រួសារមួយនេះហើយ។ ឯបុរសនោះ ទោះស្រលាញ់កូនស្លាប់រស់ ក៏បានត្រឹមថ្ងៃមួយ ថ្ងៃពីរប៉ុណ្ណោះ គេដេកជាមួយកូនហើយ នឹងបោះបង់កូនចោលភ្លាម។ ទោះរកឯណា ក៏កូនមិនអាចរកបានប្ដី ដែលចេះថ្នាក់ថ្នមដូចសហាយស្មន់បានដែរ។ មង្គលការគឺជារឿងសំខាន់របស់មនុស្សស្រី មុនធ្វើអ្វីមួយត្រូវគិតឲ្យច្បាស់”។

ខ្ញុំបើកភ្នែកឡើង នៅពេលដែលពន្លឺថ្ងៃបានចាំងចូលបន្ទប់ទៅហើយ។ នៅលើក្បាលដំណេក មានសំបុត្រមួយសន្លឹកសរសេរថា៖ “ឃើញម៉ាក់វាដេកលក់ស្រួលពេក បងនាំកូនទៅផ្ទះយាយវាមុន ម៉ាក់វាងើបឡើង កុំភ្លេចមកតាមក្រោយណា”។ មិនដឹងជាពេលនោះ ទឹកភ្នែកមកពីណាប្រដេញគ្នាហូរមិនឈប់។ ពេលនេះទើបខ្ញុំដឹងថា ទោះមិនបង្ហាញច្រើន តែប្ដីទើបជាអ្នកដែលស្រលាញ់ខ្ញុំជាងគេ។ ឲ្យខ្ញុំសូមទោសផងដែលបានប្រព្រឹត្តគ្មានកេរ្តិ៍ខ្មាសនេះ៕

ចុចអាន៖

ប្រភព៖ myeva ប្រែសម្រួល៖ Caramel