មន្ត្រីជាន់ខ្ពស់ទម្លាយថា Fan Bingbing គ្មានថ្ងៃត្រលប់ចូលសិល្បៈបាន អាជីពចប់ត្រឹមនេះ

2018-09-11 02:59:42
ចំនួនមតិ 0 | ចំនួនចែករំលែក 0

ក្រៅពីនោះ ក្រុមហ៊ុនឈរឈ្មោះដោយកំពូលតារាសម្ដែងស្រី Fan Bingbing ទាំង២នៅប៉េកាំងក៏ត្រូវបិទទ្វារធ្វើឲ្យគេរឹតតែសង្ស័យ។

មុននេះបន្តិច បណ្ដាញព័ត៌មាន ETToday បានឲ្យដឹងថា នៅពេលសុំជួបជាមួយមន្ត្រីថ្នាក់ខ្ពស់ម្នាក់ដើម្បីស៊ើបសួរពីស្ថានភាពរបស់តារាសម្ដែងស្រីល្បីឈ្មោះ Fan Bingbing លោកក៏បានឲ្យដឹងថា តាំងពីត្រូវចាប់ខ្លួនមក នាងមិនដែលបានត្រូវគេដោះលែងដូចពាក្យចចាមអារ៉ាមនោះឡើយ (គឺត្រូវឃុំជាប់រហូត)។ លោកបានបន្ថែមថា៖ “លទ្ធផលរបស់ Fan Bingbing គឺអណោចអធ័មខ្លាំងណាស់ អាជីពរបស់នាងហាក់ដូចជាចប់ទាំងស្រុងហើយ នាងមិនអាចវិលត្រលប់ចូលសិល្បៈវិញបានទេ”.

ជាមួយគ្នានេះដែរ ស្រីស្អាតខាងលើមុនពេលកើតហេតុការណ៍នេះឡើង គឺមានក្រុមហ៊ុន២នៅទីក្រុងប៉េកាំង។ យ៉ាងណាក្ដី នៅពេលអ្នកកាសែតទៅដល់ការិយាល័យរបស់ក្រុមហ៊ុនទាំង២នេះគឺត្រូវបានបិទទ្វារចោលហើយ។ អ្នកសំអាត និងសន្តិសុខយាមបានឲ្យដឹងថាពួកគេមិនដឹងថានេះជាក្រុមហ៊ុនរបស់ Fan Bingbing អីនោះទេ។ គួរបញ្ជាក់ផងដែរថា នៅក្នុងកំឡុង៥ឆ្នាំចុងក្រោយនេះ គេសន្និដ្ឋានថា Fan Bingbing បានរកចំណូលបាន ១ពាន់លានយាន់ (១៤៥លានដុល្លារ) តែបានគេចពន្ធអស់រាប់សិបលានដុល្លារ។ ដោយសាររឿងរ៉ាវរបស់តួរឿង “ព្រះនាងយេយេ” មន្ទីរពន្ធដាចិនបានធ្វើការស៊ើបអង្កេតលើតារាល្បីឈ្មោះចំនួនជាង១០០នាក់ពាក់ព័ន្ធនឹងរឿងគេចពន្ធនេះ៕