មិននឹកស្មានអ្នកផាត់មុខល្បីកំពូលសម្រាប់តារាថៃ ជាកូនកាត់ខ្មែរ និងមានប្រវត្តិតស៊ូមិនធម្មតា

2018-08-23 08:38:02
ចំនួនមតិ 0 | ចំនួនចែករំលែក 0

យុវជនវ័យក្មេងម្នាក់ផ្តើមអាជីពជាអ្នកផាត់មុខតាំងពីវ័យ ១៣ឆ្នាំ និងឆ្លងកាត់ការប្រកួតប្រជែងជាច្រើន បានក្លាយខ្លួនជាសិល្បករផាត់មុខដ៏ល្បី ខ្នាតអន្តរជាតិ ព្រមទាំងបានបង្កើតស្នាដៃរបស់ខ្លួននៅលើផ្ទៃមុខតារាថៃល្បីៗ ដូចជា Aum Patcharapa, Ying Ratha, Nune Wooranuch និង Nat Myria ជាដើម ក្នុងវិស័យសិល្បៈដ៏ធំក្នុងប្រទេសថៃ។ យុវជនម្នាក់នេះត្រូវបានគេស្គាល់ឈ្មោះថា ណងឆ័ត្រ ឆ័ត្រឆ័យ ផៀងអៈភិឆាត ជាកូនកាត់ខ្មែរ ថៃ មានប្រវត្តិតស៊ូដោយសមត្ថភាពពិត មុនក្លាយជាអ្នកជំនាញផាត់មុខបែបសិល្បៈដ៏មានប្រជាប្រិយភាពក្នុងប្រទេសថៃ។

កាលកុមារភាព ណងឆ័ត្រ មានក្តីស្រមៃចង់ក្លាយជាអ្នកជំនាញផាត់មុខ១រូប ទើបខិតខំព្យាយាមសុំចូលធ្វើការនៅតាមបណ្តាហាងកែសម្ផស្សនារីជាច្រើន ប៉ុន្តែជានិច្ចកាលត្រូវខកបំណងទទួលការបដិសេធពីម្ចាស់ហាង។ នេះបើតាមការបញ្ជាក់ពី អ្នកគ្រប់គ្រងរបស់លោក ផ្ញើសារថាមកកាន់ Sabay។

ក្នុងសារនោះបន្តថា យ៉ាងណាមិញភាពខ្នះខ្នែងព្យាយាម និងទេពកោសល្យរបស់ ណងឆ័ត្រ បានធ្វើឱ្យអ្នកម៉ាក់ ដែលជាជនជាតិថៃ យល់ចិត្ត និងកោតសរសើរចំពោះភាពឧស្សាហ៍ព្យាយាមរបស់កូន គាត់ក៏បានយកផ្ទះរបស់ខ្លួនជាន់ផ្ទាល់ដីបង្កើតហាងកែសម្ផស្សនារីទទួលផាត់មុខខ្នាតតូច ព្រមទាំងឱ្យលោក ណងឆ័ត្រ រៀនសូត្រនៅសាលាជំនាញផាត់មុខបន្ថែមទៀត។

នៅក្នុងរយៈពេលដែលចេញហ្វឹកហ្វឺនផ្ទាល់ចំពោះការផាត់មុខឱ្យនៅបញ្ជរលក់គ្រឿងសម្អាងល្បីឈ្មោះ អ្នកជំនាញផាត់មុខរៀមច្បងក៏បានឃើញស្នាដៃរបស់ ណងឆ័ត្រ ហើយបានបបួល លោក ចូលរួមការងារជាមួយពួកគេ។ បន្ទាប់ពីនោះ ណងឆ័ត្រ បានក្លាយជាអ្នកជំនាញផាត់មុខអាជីពប៉ុន្តែក៏មិនទាន់មានអ្នកស្គាល់ច្រើនណាស់ដែរ ប៉ុន្តែអ្វីដែលនឹកស្មានមិនដល់គឺ លោកបានទទួលការអញ្ជើញទៅផាត់មុខឱ្យតារាសម្ដែង Ying Ratha ចូលរួមក្នុងមហោស្រពភាពយន្តទីក្រុង Canne ប្រទេសបារាំង កាលពីឆ្នាំ ២០១៣ បន្ទាប់ពីលោកបានចូល Comment បង្ហាញមតិយោបល់របស់ខ្លួនក្នុង Instagram របស់តារាសម្ដែងរូបនោះ។ បន្ទាប់ពីនោះ កេរ្តិ៍ឈ្មោះរបស់លោកត្រូវបានគេស្គាល់តៗគ្នា និងមានតារាជាច្រើនទាក់ទងឲ្យលោកផាត់មុខឲ្យ។ ស្នាដៃលេចៗធ្លោរបស់លោកបន្ទាប់ពីនោះមានដូចជា ផាត់មុខឲ្យតារាសម្ដែង Poy Treechada ចូលរួមកម្មវិធីនៅហុងកុង ផាត់មុខឲ្យកូនក្រមុំជាតារាសម្ដែងដូចជា Pinky Savika , Nat Myria និងកាន់តែទទួលបានការចាប់អារម្មណ៍លើបណ្ដាញសង្គមខ្លាំងនោះគឺការផាត់មុខឲ្យ Aum Patcharapa។

មកដល់ពេលនេះ ណងឆ័ត្របានពិសោធន៍ឲ្យគ្រប់គ្នាឃើញថាបើយើងមានគោលដៅ និងបញ្ចេញសកម្មភាពធ្វើឲ្យប្រាកដ យើងនឹងអាចទៅដល់ជោគជ័យដោយមិនលំបាក។ ពីជាងផាត់មុខឲ្យគេបានម្ដង ១០បាត (១២០០រៀល) កាលនៅរៀន នៅពេលនេះ ឆ័ត្រ បានក្លាយជាអ្នកផាត់មុខជាប់ចំណាត់កំពូលម្នាក់ក្នុងចំណោមចំណាត់ថ្នាក់កំពូលទាំង ៥ក្នុងប្រទេសថៃ ដែលមានថ្លៃឈ្នួលផាត់មុខ និងថ្លៃថតពាណិជ្ជកម្ម ម្ដងៗរាប់សែនបាត ថែមទាំងមានបំណងប្រាថ្នាក្លាយជាម្ចាស់មុខជំនួញ និងមានប្រាក់ ១០០លានបាតមុនអាយុ ៣០ឆ្នាំ។ បច្ចុប្បន្ន ណង ឆ័ត្រ មានមុខជំនួញគ្រឿងសម្អាងផ្ទាល់ខ្លួនរួចហើយ ដូច្នេះគោលដៅបន្ទាប់របស់លោកក៏មិនមានអ្វីលំបាកនោះដែរ។

នាថ្ងៃទី១១ ខែវិច្ឆិកា ឆ្នាំ២០១៨ ខាងមុខនេះ លោក ណងឆ័ត្រ និងក្រុមរបស់ខ្លួននឹងបង្ហាញខ្លួនក្នុងរាជធានីភ្នំពេញដើម្បីចែករំលែកបទពិសោធន៍ និងជំនាញរបស់ខ្លួនដល់អ្នកផាត់មុខកម្ពុជា។

រូបភាពតារាស្រីថៃ ទទួលបានការផាត់មុខហើយពី លោក ណងឆ័ត្រ