កប់ណាស់! មកមើលទិដ្ឋភាពដេគ័រមង្គលការអ្នកមានៗនៅឌូបៃ (វីដេអូ)

2018-08-19 02:09:02
ចំនួនមតិ 0 | ចំនួនចែករំលែក 0

យោងតាមទស្សនាវដ្ដី Weddingideas ទីក្រុងឌូបៃគឺជាដែនដីនៃរបស់ថ្លៃៗ ជាពិសេសសូម្បីតែការរៀបចំមង្គលការក៏ត្រូវប្រើតម្លៃកប់សេរីផងដែរ។ សម្រាប់អាពាហ៍ពិពាហ៍ដែលចាត់ទុកថាខ្នាតតូចសម្រាប់គ្រួសារអភិជនក្នុងទីក្រុងឌូបៃ ហោចណាស់ក៏អញ្ជើញភ្ញៀវ១០០តុ ឬពី១០០០ ទៅ៣០០០នាក់ដែរ។ គម្រោងរៀបចំនៃមង្គលការនីមួយៗត្រូវបានគិតគូរយ៉ាងល្អិតល្អន់ជាច្រើនខែមុនកាលកំណត់ ហើយការដេគ័រក៏ត្រូវជ្រើសរើសម៉ូដណាមិនជាន់គ្នា ឬប្រើម៉ូដដែលគូផ្សេងធ្លាប់ប្រើដែរ។

ខាងក្រោមនេះគឺជាកម្រងរូបភាពការដេគ័រខ្លះៗនៃមង្គលការប្រណីតៗនៅអ្នកក្រុងអ្នកមាននេះ ដោយប្រើគ្រឿងតុបតែងថ្លៃៗ៖

មង្គលការផ្កា Lily of the Valley

អាពាហ៍ពិពាហ៍នេះតុបតែងលម្អទៅដោយផ្កា Lily of the Valley ស្ទើរតែគ្រប់ពណ៌នៅលើតុ តាមផ្លូវដើរ និងគ្រប់ទីកន្លែងក្នុងសាលតែម្ដង។ ជាមួយនឹងផ្កាពាសពេញបែបនេះសាលទាំងមូលគ្របដណ្ដប់ដោយក្លិនក្រអូបឈ្ងុយឈ្ងប់។ ក្រៅពីនេះ ក៏មានភ្លើងទំនើបៗជះមកលើវាំងននបង្កើតបានជាទស្សនីយភាពអស្ចារ្យផ្សេងៗ។

មង្គលការគ្រីស្ដាល់

វិចិត្រករ និងជាអ្នកថតរូបនៅទីក្រុងឌូបៃ Sheika Lateefa វ័យ២៩ឆ្នាំបាននឹកឃើញគំនិតដេគ័រដ៏អស្ចារ្យមួយសម្រាប់អាពាហ៍ពិពាហ៍កូនកំលោះក្រមុំដោយប្រើអំពូលគ្រីស្តាល់។ អ្នកនាង Sheika បានប្រើអំពូលភ្លឺផ្លេកចំនួន១ម៉ឺន៥ពាន់អំពូល គ្រីស្តាល់ប្រភេទ Swarovski ចំនួន៦ម៉ឺន៥ពាន់គ្រាប់ ចាបក្រដាសចំនួន៤ពាន់ដើម្បីរំលេចពីលើការតុបតែងបែបជាផ្ទៃមេឃភ្លឺចិញ្ចាំងចិញ្ចែង។

មង្គលការសួនផ្កាស្គុះស្គាយ

ដោយប្រើពណ៌សជាគោល សាលអាពាហ៍ពិពាហ៍ទាំងមូលត្រូវតុបតែងលម្អដោយសួនផ្កាចម្រុះ។ ចំណុចដ៏លេចធ្លោមួយទៀតក្នុងការដេគ័រនេះ គឺចង្កោមផ្កាពណ៌សស្គុសព្យួរទម្លាក់ពីលើពិតានមកប្រៀបដូចពពកលើវេហាស៍។ បន្ថែមពីនេះ ភ្លើងពណ៌ស្វាយភ្លឺចិញ្ចាចត្រូវបានបង្កប់និងបន្ថែមយ៉ាងស្ទាត់ជំនាញដើម្បីបន្ថែមភាពឥតខ្ចោះសម្រាប់មង្គលការមួយនេះ។

មង្គលការលក្ខណៈ Outdoor នារដូវរងា

សម្រាប់ដែនដីដែលមានអាកាសធាតុក្ដៅដូចទីក្រុងឌូបៃ ទិដ្ឋភាពខែរងាដោយមានព្រិលធ្លាក់គឺជារឿងដ៏កម្រមួយ។ ហេតុនេះទើបមង្គលការដែលរៀបចំឡើងក្នុងរដូវរងាត្រូវបានរៀបចំឡើងនៅទីវាលខាងក្រៅ ដោយបង្កើតជាសួនផ្ការដូវត្រជាក់ដ៏ល្អប្រណីត។ នៅដើមផ្លូវដើរចូលនៃអាពាហ៍ពិពាហ៍នេះមានប្រក់ដំបូលកញ្ចក់ថ្លារាងក្រឡូម ដោយព្យួរទម្លាក់ត្បូងគ្រឹស្តាល់រាប់ពាន់គ្រាប់ភ្លឺចិញ្ចាចដើម្បីទុកជាតំណាងនៃព្រិលនិងទឹកកក៕